PA 14 April, 1989, ninshi ndetungulula ukulongana mu musumba wa Maumere pa cishi ca Flores, ababomfi ba buteko baishileingila mu ng’anda no kunjikata banjikata pamo na ba bwananyina batatu.

Abalinshi ba mu cifungo balitupatikisha ukupika salyuti kuli flagi. Apo twalikene, balitumine sana kabili balitwiminike na mu kasuba pa nshiku 5. Twalelaala fye pa nshi pali sementi mu tumiputule utwalamba utwa mu cifungo kabili ubushiku, twaletutuma sana ku mpepo ninshi natunaka ne mibili ilekalipa ku mpumo. Abalinshi ba mu cifungo batwalilile fye ukutupatikisha lelo twalebasuka fye ukuti, “Tatwakatale atupika salyuti kuli flagi mpaka fye ne mfwa.” Nga filya fine cali na ku Bena Kristu ba kubalilapo, twalimwene ukuti lishuko icine cine ‘ukuculila ubulungami.’—1 Pet. 3:14.

PA 19 January, 1999, ulupato lwali pa baShilamu na Bena Kristu lwalikulileko ica kuti kwalibukile ne fimfulunganya ifyafikile mupepi sana na apo naleikala, nalimo pali fye amakilomita yatatu. Ala ifintu fyalibipile nga nshi.a

Ilyo nashininkishe ukuti ulupwa lwandi talwali mu busanso, nalitumiine bakasabankanya amafoni pa kuti njishibe ifyo bali. Nalibakoseleshe ukuti batwalilile ukuba abashipa kabili nabebele no kuti belaya ku ncende ukwali ifimfulunganya. Lyena baeluda balile ku kwafwilisha aba bwananyina mu fya kwa Lesa no kubakoselesha ukuti batwalilile ukulalongana mu mabumba ayanono.

Aba kwi ofeshi lya musambo balitwebele ukuti tufwile ukukuusha aba bwananyina bonse abaleikala mu ncende umwali ifimfulunganya kabili aya yene e mashiwi twatumine ku ndupwa shonse. Munyinefwe umo uwakeene ukukuuka balimwipeye ku bali mwi bumba lya balecita ifimfulunganya. Lelo bonse abaumfwile ifyo aba kwi ofeshi lya musambo batwebele balipuswike.