ULUBALI 5

Bweleleni ku “Mucemi Kabili Kangalila wa Myeo Yenu”

Bushe mwalikwatapo ubwafya bumo pa mafya ayo tulandilepo muli ino broshuwa? Nga e fyo caba, ninshi te imwe mweka. Ababomfi ba kwa Lesa abengi aba ku kale balekwata amafya ayo na ba muno nshiku bakwatako. Yehova alibafwile ukupwisha amafya, kanshi na imwe kuti amwafwa.

Yehova akulamwafwa nga ca kuti mwabwelela kuli ena

MULINGILE ukwishiba ukuti Yehova akulamwafwa nga ca kuti mwabwelela kuli ena. Akamwafwa pa kuti mwaleka ukusakamikwa no kumfwa ububi nga kuli abamukalifye, kabili akalenga mwaba no mutende wine wine uo umuntu akwata nga alebombela Lesa na kampingu iisuma. Yehova nga amwafwa, mukafwaya ukulamubombela capamo na bakapepa bakwe. Nga mwacita ifi, mukaba nga filya Abena Kristu bacitile aba mu nshita sha batumwa abo umutumwa Petro aebele ati: “Mwali kwati ni mpaanga ishaluba; lelo nomba mwalibwelela ku mucemi kabili kangalila wa myeo yenu.”—1 Petro 2:25.

Icacindama sana ico mufwile ukucita, kubwelela kuli Yehova. Cinshi mufwile ukucitila ifi? Nga mwabwelela kuli Yehova, mukalenga umutima wakwe ukasekelele. (Amapinda 27:11) Nga fintu mwaishiba, ifyo tucita kuti fyalenga Yehova atemwa nelyo kuti fyalenga aumfwa ububi. Na lyo line, Yehova tatupatikisha ukuti tumutemwe no kuti tulemubombela. (Amalango 30:19, 20) Uwasambilila sana ifya mu Baibolo atile: “Takuli uwingamona mu mutima wenu. Ni mwe fye mwaishiba ifyaba mu mutima wenu.” Kanshi nga tulepepa Yehova no mutima wesu onse, ninshi tuleisula umutima wesu. Nga tulepepa Yehova no mutima onse ninshi tulemupeela ica bupe icisuma, e kutila bucishinka, ne ci cilalenga Yehova alesekelela. Takwaba iciletela umuntu insansa ukucila pa kupepa Yehova mu nshila afwailamo.—Imilimo 20:35; Ukusokolola 4:11.

Nkashi uwalekele ukulongana bamupokelela bwino sana

Ne cawamisha ca kuti, nga mwatendeka ukupepa Yehova na kabili, mukaba ne nsansa pantu mukalasambilila ifingi pali ena. (Mateo 5:3) Finshi mukalasambilila? Abantu abengi balepusha abati, ‘Cinshi twabela pano calo?’ Abantu balafwaisha ukwishiba amasuko ku mepusho pa fyo twabela pano calo pantu e fyo Yehova atubumbile. Afwaya tuleba ne nsansa ilyo tulemubombela. Icilenga tuleba sana ne nsansa kwishiba ukuti tulabombela Yehova pantu twalimutemwa.—Amalumbo 63:1-5.

Mufwile ukwishiba ukuti Yehova afwaya mwabwelela kuli ena. Mwaishiba shani ukuti e fyo afwaya? Tontonkanyeni pali ici: Pa kulemba ino broshuwa, abalembele balipepele sana. Nalimo eluda nelyo Umwina Kristu munenu e wamuleteele ino broshuwa pa kuti mulebelengamo. Lyena mwalibelengele kabili mwalikonkele ifyo mwabelengele. Ifi fyonse, filelangilila fye ukuti Yehova tamulaba, lelo alafwaya mwatendeka ukumubombela na kabili.—Yohane 6:44.

Kanshi kuti mwaba ne nsansa ukwishiba ukuti Yehova talaba ababomfi bakwe abaleka ukumubombela. Nkashi Donna alitemenwe ilyo aishibe ukuti Yehova talaba ababomfi bakwe. Alandile ati: “Natendeke ukufuma mu cilonganino ca kwa Lesa panono panono, lelo ilingi line naletontonkanya pa mashiwi ayaba pa Amalumbo 139:23, 24, apatila: ‘Fwayeni muli ine, mwe Lesa, no kwishiba umutima wandi. Nceeceeteni, no kwishiba amalangulushi yandi, mumone nga muli ine mwaba amapange ya kuntwala mu nshila iibi, kabili muntungulule mu nshila ya muyayaya.’ Nalishibe ukuti nshalingile ukulacita ifya muli ici calo, lelo nalingile ukuba mu cilonganino ca kwa Yehova. Lyena nalemona ukuti Yehova tandekeleshe, nalingile fye ukubwelela kuli ena. Naliba ne nsansa pantu nalibwelela kuli Yehova!”

“Nalemona ukuti Yehova tandekeleshe, nalingile fye ukubwelela kuli ena”

Tulemupepelako ne mitima yesu yonse ukuti ‘mukalesekelela muli Yehova’ na kabili. (Nehemia 8:10) Mukatwalilila ukuba ne nsansa nga ca kuti mwabwelela kuli Yehova.

Amasuko ku Mepusho ayo Abafwaya Ukubwelela Kuli Yehova Bepusha

FINSHI MFWILE UKUBALILAPO UKUCITA?

Umuntu uwalwele tatendeka ukubomba imilimo pa muku umo fye, lelo atendeka panono panono. Na imwe bene kuti mwakosa mu kupepa nga ca kuti mwatendeka ukulacitako ifya kwa Lesa fimo fimo cila bushiku. Tamulingile ukulamona kwati mufwile ukutendeka ukulacita fyonse pa muku umo. Nalimo kuti mwatendekela pa kubelenga Baibolo, ukubelengako ulupapulo lumo nelyo ukumona ifyebo fimo pa Webu saiti yesu. Kuti cawama nga ca kuti mwatendeka no kuya mu kulongana bwangu bwangu. Cimbi ico mwingacita, kupepa kuli Yehova pa kuti amwafwe pantu Baibolo itila: “Mulepoosa amasakamika yenu yonse pali ena, pantu asakamana imwe.”—1 Petro 5:7.

“Ilyo nalekele ukubombela Yehova, naleumfwa ububi ica kuti nalefilwa no kupepa. Bushiku bumo ilyo napepele, eluda alintandalile. Uyu eluda alingafwile ukwishiba ukuti Yehova tandekelesha kabili anjebele ukuti mfwile ukutendeka ukulabelenga Baibolo cila bushiku. Ifyo nalebelenga mu Baibolo fyalengele ntendeke ukulaya mu kulongana na kabili. Mu kuya kwa nshita, nalitampile no kubila imbila nsuma na kabili. Naliba sana ne nsansa pantu Yehova tandekeleshe.”—Ba Eeva.

BUSHE ABA MU CILONGANINO BAKAMPOKELELA?

Mulingile ukwishiba ukuti aba mu cilonganino bakamupokelela bwino sana. Mu nshita ya kumusuusha nelyo ukumuseka, bakamulanga ukuti balimutemwa kabili bakamukoselesha nga nshi.—AbaHebere 10:24, 25.

“Naleumfwa insoni ukutendeka ukuya ku Ng’anda ya Bufumu na kabili. Naletontonkanya pa fyo bamunyinane baali no kumpokelela. Nkashi umukoloci uo twalongenepo nankwe ninshi palipita ne myaka 30 anjebele ati, ‘Wacita bwino ukutendeka ukulongana na kabili!’ Ifyo uyu nkashi alandile fyalimfikile sana pa mutima kabili nalimwene ukuti cine cine nalingile ukutendeka ukupepa Lesa na kabili.”—Ba Javier.

“Ilyo naile ku Ng’anda ya Bufumu, naikele pa cipuna ca ku numa pa kuti umuntu nangu umo enjishiba. Na lyo line, apo nalelongana ilyo nali umwaice, abengi balinjishibe. Balimpokelele bwino kabili balinkumbatile kabili nalitemenwe nga nshi. Cali kwati nabwelela uko mfwile ukuba.”—Ba Marco.

BUSHE BAELUDA BAKANGAFWA?

Baeluda bakamupokelela bwino sana. Bakamutasha pa fyo mulelanga ukuti mwalitemwa Lesa ‘nga filya mwamutemenwe pa kutendeka.’ (Ukusokolola 2:4) Bakamwafwa ukulungika ifilubo ifyo mwacitile “no mutima uwafuuka.” (Abena Galatia 6:1; Amapinda 28:13) Baeluda kuti bafwaya uwa kumusambilisha Baibolo mu citabo icitila Palameni Kuli Yehova nelyo icitila “Ikalilileni mu Kutemwa kwa kwa Lesa.” Baeluda bakamukoselesha kabili bakamwafwa sana mu fintu ifingi.—Esaya 32:1, 2.

“Pa myaka 8 iyo nalekele ukubombela Yehova, baeluda balitwalilile ukungafwa. Bushiku bumo, eluda alinangile ifikope ifyo atukopele kale. Ifi ifikope fyalengele njibukishe inshita sha kale ilyo nalebombela Yehova ne nsansa. Baeluda balingafwile ukuti ntendeke ukubombela Yehova na kabili.”—Ba Victor.

“Akamukosha”

Mu citabo cesu ica nyimbo icitila Imbileni Yehova, mwaliba inyimbo ishingamusansamusha no kumukosha nga mwatendeka ukubombela Yehova na kabili. Ku ca kumwenako, tontonkanyeni pa mashiwi ayaba mu lwimbo namba 60. Amashiwi yaba muli ulu ulwimbo yafuma pali 1 Petro 5:10, kabili umutwe wa ulu ulwimbo utila, “Akamukosha.”

Kwalibe co Lesa amifumishishe

Mu mfifi kuti mwishibe cine.

Alimwene kuti mwalefwaya nga nshi

Kumwishiba no kumusekesha.

Lyo mwaipeele alimyafwile;

Na ino ine nshita ‘kamwafwa.
Alipeelo Mwana pa mulandu wenu;

Afwaye fintu fimiwamine.

Apo Lesa tamitanine Umwana,

Ninshi akamipeela na maka.

Takalabe icitetekelo

No kutemwa uko mulanga pe.

(KORASI)

Lesa ‘limishita mu mulopa wa Mwana.

Akalamwikasha, no kulamukosha.

Kamitungulula no kumicingilila.

Akalamwikasha no kulamukosha.

Nga mulefwaya ukukutika kuli ulu lwimbo lwa mashiwi fye na ku nyimbo shimbi isha Bufumu, citeni scan iyi code nelyo kuti mwaya pa www.pr418.com/bem. Kuti mwaya apo balemba ukuti IMPAPULO > INYIMBO.