Amepusho Ukufuma ku Babelenga

Bushe ilembo lya kwa Lukala Milandu 5:8 lilanda fye pali bakateka abantunse nelyo lilalanda na pali Yehova?

Ili ilembo litila: “Wilapapa nga wamona aba cuma baletitikisha umupiina no kumufyenga mu milandu no kukanacita ubulungami kuli ena mu citungu ca bulashi, pantu uwacila uwasansabala alemona, kabili kuli na bambi abasansabala ukubacila.”—Luk. Mil. 5:8.

Nga tatulemona ifintu nge fyo Yehova afimona, kuti twalamona kwati ili ilembo lilalanda fye pali bakateka abantunse. Lelo nga twatontonkanyapo sana kuti twamona ukuti lilalanda fimo pali Yehova ifingatusansamusha no kutupeela isubilo.

Ilembo lya kwa Lukala Milandu 5:8 lilalanda pali kateka uucusha abapiina kabili uushaba no mulinganya. Uyu kateka afwile ukulaibukisha ukuti kufwile kwaliba uwa mu buteko uwamucila icifulo nelyo amaka uumona ifyo acita. Na kuba, kufwile kwaliba na bambi abakwata ififulo ifikalamba sana ukumucila. Ku ca bulanda, nalimo bakateka bonse mu mabuteko ya bantunse te kuti babe no mulinganya, kabili kuti balefyenga abantu yaweyawe.

Nomba nangu ifintu fingafya shani, kuti twasansamushiwa nga twaishiba ukuti Yehova ena ‘alamona abacila abasansabala’ aba mu mabuteko ya bantunse. Kuti twapepa kuli Lesa ukuti atwafwe, kabili kuti twapoosa ne fisendo fyesu pali ena. (Amalu. 55:22; Fil. 4:6, 7) Twalishiba ukuti “amenso ya kwa Yehova, yalamona mu calo conse pa kuti alange amaka yakwe aya kwafwa ababa ne mitima ya cishinka kuli ena.”—2 Imila. 16:9.

Kanshi ilembo lya kwa Lukala Milandu 5:8, lilenga twaishiba ifyo bakateka abantunse baba no kuti kwaliba uwakwata amaka ayengi ukubacila. Ne cacindama sana ca kuti, ili ilembo kuti lyalenga twalatontonkanya pa cishinka ca kutila Yehova e wacila pali bakateka bonse kabili e wakwatisha amaka. Pali ino nshita aleteka ukubomfya Umwana wakwe, Yesu Kristu, Imfumu ya Bufumu bwakwe. Uwa Maka Yonse, uumona bonse kabili uumona fyonse, aliba sana no mulinganya, kabili ifi fine e fyo no Mwana wakwe aba.