Balingafwile

Ba Bob bekala mu Alberta, ku Canada. Bushiku bumo baleya ku ng’anda muli motoka ninshi nakutalala, umupeto wa motoka walipulike ninshi motoka naibutuka. Pa kubala ba Bob tabaishibe ukuti umupeto naupulika, e ico balyenseshe motoka pa kilomita 5.

Muli kalata ba Bob batumine ku Ng’anda ya Bufumu iya Nte sha kwa Yehova, balondolwele ifyacitike. Batile: “Abacaice 5 abali muli motoka baishileensha motoka mupepi na motoka yandi kabili baliswile iwindo lya motoka yabo pa kuti banjishibishe ukuti umupeto naupulika. Nalimike motoka nabo baimika, kabili banjebele ukuti balangafwa ukufumya umupeto uwaonaike. Nshaishibe no kwishiba nga nalikwete umupeto umbi uwa kubikako nelyo jeke. Ilyo naikele mu mbali ya musebo pa ncinga ya balemana, aba bacaice balingile pa nshi ya motoka apo basangile umupeto uutuntulu na jeke, kabili balifumishe iyaonaike no kubikako iisuma. Bulya bushiku kwalitalele icine cine kabili ne mfula ya bungululu yaleloka. Balifwele bwino sana na lyo line balifumishe umupeto waonaike, pa numa nalile ku ng’anda. Nga tabangafwile nga nshakumanishe ukufumya umupeto.

“Ndetasha ba Nte bacaice 5 abangafwile. Baleya mu kubila ubukombe ku mayanda ya bantu ilyo bansangile. Ukwabula no kutwishika aba bacaice balacita ifyo basambilisha. Nga tabangafwile nga naliculile sana kabili nga palikokwele ukusanga abakungafwa, ala ndi pa nshi ndekunkula. Nshaishibe ukuti pano calo paliba abacaice abawama umweo nga aba!”