Yona
1 Kabili icebo ca kwa Yehova caishile kuli Yona+ mwana Amitai, aciti: 2 “Ima, kabiye ku Ninebe+ umusumba uukalamba, no kubila kuli wena ukuti nimona ububi bwabo.”+
3 Awe Yona aliimine no kubutukila ku Tarshishi+ ukufuma ku cinso ca kwa Yehova;+ atentemukila ku Yopa+ no kusanga ubwato ubwaleya ku Tarshishi. E ico alipile umutengo wa lwendo no kwingilamo, pa kuti aye na bo ku Tarshishi ukufuma ku cinso ca kwa Yehova.
4 E lyo Yehova aletele umwela uukalamba pali bemba,+ kabili kwali icipuupu icikalamba+ pali bemba; no bwato bwapene bonaike. 5 Kabili abale-ensha ubwato balitiinine kabili cila muntu atendeke ukulilila kuli lesa wakwe.+ Kabili balepoosa ifipe ifyali mu bwato muli bemba, pa kuti bwangukeko.+ Lelo Yona aile mu kati ka bwato, kabili alisendeme no kupona mu tulo.+ 6 E lyo umukalamba wa bwato apaleme kuli ena no kumweba ati: “Cili shani, we uleele? Ima, lilila kuli lesa obe!+ Nalimo Lesa wa cine alatusakamana, kabili tatwalobe.”+
7 E lyo balalanshanya abati: “Iseni, kabili natupendule,+ pa kuti twishibe ni pa mulandu wa kwa nani ubu bwafya bwaishila pali ifwe.”+ Awe balapendula, kabili icipendwilo casukile cawila Yona.+ 8 E ico batile kuli ena: “Shi twebe, ni pa mulandu wa kwa nani ubu bwafya bwaishila pali ifwe?+ Mulimo nshi ubomba, kabili ni kwi wafuma? Uli wa ku calo nshi, kabili ni ku bantu nshi wafuma?”
9 E lyo abebele ati: “Ndi muHebere,+ kabili Yehova Lesa wa mu muulu+ e o ntiina,+ uwapangile bemba no mulundu.”+
10 Awe abaume balitiinine nga nshi, kabili bamwipwishe abati: “Nga cinshi ici wacita?”+ Pantu balya baume baishibe ukuti alefulumuka ku cinso ca kwa Yehova, pantu alibebele. 11 E lyo bamwipwishe ati: “Cinshi twalakucita+ pa kuti bemba atalale?” Pantu bemba alecililako fye ukululunkana. 12 E ico abebele ati: “Njimyeni no kumpoosa muli bemba, na bemba alamutalalila; pantu ninjishiba ukuti ni pa mulandu wandi ici cipuupu icikalamba ica mwela cishiile pali imwe.”+ 13 Lelo abaume balibombeshe ukuti babweseshe ubwato ku mulundu; lelo balifililwe, pantu bemba alecililako fye ukululunkana.+
14 E lyo baliliile kuli Yehova no kutila:+ “Iye, nomba, mwe Yehova, shi twifwilamo pa mulandu wa uyu muntu! Kabili mwibika pali ifwe umulopa wa kaele,+ pantu imwe mwe bene, mwe Yehova, namucita ifyo mutemenwe!”+ 15 E lyo baimishe Yona no kumupoosa muli bemba; na bemba alekele ukululunkana.+ 16 Awe aba bantu batiinine Yehova nga nshi,+ kabili batuulile ilambo kuli Yehova+ no kulapa imilapo.+
17 Nomba Yehova atumine icisabi icikalamba ica kumina Yona,+ na o Yona ali mu nda ya cisabi inshiku shitatu akasuba no bushiku.+