Abantu Bateka Abantu Banabo Ulucu

IFYACITIKA filanga ukuti amashiwi ya pali Lukala Milandu 8:9 ya cine, aya kuti: “Abantu bacito lukambo ku bantu ku kubabifya.” Nelyo nga fintu Baibolo wa Mushilo uwa 1983 asosa ukuti, “abantu bamo bateeka abanaabo noo kulaabacushapo.” Abantu abengi balafyengwa, kabili e fyo caba na mu mitekele yonse iyatekapo abantu. Icalengele abantu ukwibukisha uku kucula cali lyashi lya nkonkani ya kwa kalemba wa kabungwe ka Affairs of the U.S. Department of the Interior ilyo kwali ukusefya kwa pa caka ukwalenga 175 ukwa kwimika kwa kabungwe ka Office of Indian Affairs.

Atile ukucila ukusefya yali ni nshita ya “kulanda pa fishinka ifya bulanda, inshita ya kulapila.” Atile umulimo wa ntanshi uwa aka kabungwe muli ba 1830 wali kufumya mu fyalo fyabo inko shabela pa kati ka kapinda ka ku kulyo na kabanga—isha bena Cherokee, abena Creek, abena Choctaw, abena Chickasaw, na bena Seminole. “Ukubomfya icintiinya, ubufi, na maka, ishi nko shikalamba shalengelwe ukwenda amakilomita 1,600 ukulola ku masamba, no kushiika abakote abengi, abana na balwele balefwila mu nshila mu nshishi sha kwimba lubilo lubilo pa lwendo baleti Trail of Tears (ulwendo lwa filamba).”

Akonkenyepo ukuti: “Lelo muli ino nshita abantu balisalapuka, tufwile ukusumina ukuti ukutandanya amalwele ku mufulo, ukwipaya imboo ishingi isha maka, ukonaula umuntontonkanya no mubili ku bwalwa ubulimo sumu, no kwipayaulula abanakashi na bana fyalengele akayofi kabipisha icine cine ica kuti te kuti tutile ifi fintu fyaleicitikila fye pa mulandu wa kuti imikalile ya bena India na babuuta inkanda yalipusene.”a Atile: “Aka kabungwe kaiminine pa kulofya abena India ne fintu fyabo fyonse. Aka kabungwe kabindile ukulanda indimi sha bena India . . . no kulenga abena India ukumfwa insoni pa mulandu wa kuba abena India. Icabipishe ca kuti, akabungwe ka Bureau of Indian Affairs kalecite fi ku bana bali mu masukulu ya kukuuka aya aka kabungwe, ukubacusha mu nkuntu, mu muntontonkanya, ku mubili, na ku mupashi.”

Pa kusondwelela atile: “Natutendekele no kuloosha pa fyo aka kabungwe kacitile kale. . . . Tatwakebe na kabili ifipe fya bena India. . . . Tatwakasanse na kabili imipepele yenu, indimi, intambi, nelyo ifili fyonse ifyo mutundu wenu ucita.” Icikalamba asosele ca kuti: “Bonse pamo, tufwile ukufuuta ifilamba fya nkulo 7. Bonse pamo, tufwile ukufumyapo bulya bulanda bwaba mu mitima.—Vital Speeches of the Day, October 1, 2000.

Icingapwisha ukuteka abantu banabo ulucu Bufumu bwa kwa Lesa, ubukaleta ubulungi kuli bonse no “[kufuute] filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”—Ukusokolola 21:3, 4.

[Futunoti]

[Abatumtuminishe Ukubofya Ifikope Fili pe bula 13]

Indian: Ifilengelwe fya pa cikope ca kwa Edward S. Curtis; Map: Mountain High Maps® Copyright © 1997 Digital Wisdom, Inc.; Amayanda ya bena India: Leslie’s