Ukulila kwa Nyense Ukwa Cintemwa

APO inyense yalepa fye bamilimita 50 no kucepako, napamo te kuti imoneke kwati kuti yatemwikwa. Lelo, ukulila kwa nyense kulacebusha abantu abengi sana mwi sonde lyonse. Bushe ici cibumbwa cacepesha cilila shani kabili cinshi cililila?

Kwena, pa misango 2,400 iya nyense, ishilume fye e shilila. Ukucila ukulilila ku kanwa, inyense ishilume shililila ku mapindo. Icitabo cimo citila inyense ishilume shilila ing’wema pa kukumya amapindo ya ku ntanshi ku meno ya shiko ayaba 50 ukufika kuli 250. Imiku ipindo likumya ameno ayengi muli sekondi umo e ilenga ukuti inyense ilile sana nelyo panono. Uku ukulila ing’wema kupanga iciunda caibela nga nshi ica nyense.

Lelo kwena umulume wa nyense talila pa kuti fye abantunse bomfwe bwino! Kwaliba imilandu acitile fyo! Embila umukota. Icitabo ca mutwe wa kuti Exploring the Secrets of Nature citila: “Pa kusapika inyense iikota, iilume iyaishibisha ifya kumfwana ne nyense shimbi, ilemba inyimbo shitatu: lumo ku kulanga ukuti e po ili, lumbi lwa kwishishanya na lumbi lwa kutamfishako ifilwani.” Inyense shimo shilatwalilila ukwimba ulwimbo lwa kubalilapo ukufikila iikota yaankulako. Ilyo iikota yaumfwa ulwimbo ukubomfya amolu ya ku ntanshi, taifwaya ukuti cipelele fye mu kwishishanya kwa patali. Itendeka ukukonka ukulefumina ulwimbo, iilume ilatendeka ukulaimba akalwimbo akasuma nga nshi, e kutila ulwimbo lwa kwishishanya. Ulu lwimbo lwa cintemwa lulalembula iikota ku ilume, kabili ishi nyense shibili shilapapakana.

Ku Kabanga ka Asia bamo balateka inyense ishilume pantu balitemwa ifyo shilila. Bambi bena bomfwa fye bwino filya fine shilila ilyo ishine nashiikalila. Ukulila kwa nyense, isha kuteka pamo pene ne shiikalila fye kulacincimusha abantunse mwi sonde fye lyonse kabili kulalumbanya Kelenganya wa shiko.