Umuti Uucelela

KU MPELA ya January nelyo ku kutendeka kwa February, mu mbali ya mpili sha mu Israele mulaaluka apakalamba. Ilyo yabuuka cilya impepo yapwa, imiti ya mualmonde ilabalula. Apo iyi miti ilabalula bwangu, ilingi ilamoneka konse. Amaluba ya uyu muti ayabuuta na ya pinki yalayemfya impanga, ukulenga twaibukisha amashiwi ya kwa Solomone aya pali Lukala Milandu 12:5. Palya alinganya imfwi sha bukote ku “umualmonde wafwala amabuula ayabuuta bu.”

Pa mulandu wa kubalula bwangu ukwa mualmonde, ishiwi lya ciHebere ilya mualmonde lipilibula “uubuuka.” E co uyu muti walibomfiwa mu filangililo fya maka ifingi ifya mu Baibolo. Ku ca kumwenako, kasesema Yeremia amwene mu cimonwa umusonga, nelyo umusambo, wa muti wa mualmonde. Walepilibula cinshi? Yehova amwebele ukuti: “Ndelinde cebo candi ku kucicita.” (Yeremia 1:11, 12) Kwena, Yehova tanaka nelyo ukulaala. Lelo amashiwi yakwe yalekosha icishinka ca kuti afwaya ukupwisha umulimo wakwe.—Esaya 40:28.

Imyaka iingi ilyo Yeremia ashilabako, inkonto ya mualmonde uwabalula yaleishibisha untu Yehova asontele ukuba shimapepo mukalamba. Inkonto ya mikowa 12 iya bena Israele yabikilwe pa ntanshi ya kwa Yehova mwi hema lya kulaishanya. Ulucelo ubushiku bwakonkelepo inkonto ya kwa Aarone iya mualmonde yalibalwile mu cipesha mano no kutwala ifisabo fyapya! Iyi nkonto ya mualmonde yasungilwe mu cipao ca cipingo pa kashita nge cishibilo ku nko ukuti tabafwile ukuilishanya pabo Yehova asonta ukumwimininako.—Impendwa 16:1-3, 10; 17:1-10; AbaHebere 9:4.

Yehova alefwaya ukuti ifimpashanya fya maluba yasuma aya mualmonde fileyemfya ica kutekapo inyali 7 ica golde, inyali ishalebuutusha Icifulo ca Mushilo mwi hema. Ukulingana no bulondoloshi Mose alembele, “intuntu shitatu ishalengwa nga maluba ya mualmonde mu musambo umo, icituutu ne luba; ne ntuntu shitatu ishalengwa nga maluba ya mualmonde mu musambo ubiye, icituutu ne luba: ifyo fine ku misambo mutanda iyafuma mu ca kutekapo inyali. Na mu ca kutekapo inyali mwali intuntu shine ishalengwa nga maluba ya mualmonde, ifituutu fya shiko na maluba ya shiko.”—Ukufuma 37:19, 20.

Nangu ca kuti Baibolo tayalandapo sana pa mualmonde, ilatulanga ukuti uyu muti walikwata amaluba yasuma kabili ulacelela. Uyu muti usuma utucinkulako maka maka ukuti Yehova takatuushe mpaka ubufwayo bwakwe bukafishiwepo.—Esaya 55:11.