Icitabo Icingafwilisha Ukupususha Ifyupo
UMWANAKASHI WE SHINA LYA LESLIE, uwikala ku Louisiana, mu United States of America, apokelele lamya ukufuma ku mwiminishi wa pa Tulane University uyu mwaka wapwile. Uwatumine lamya atile aba pa university ya Tulane na university imbi, balefwailisha ifyebo pa lwa bopeene nomba line mu Louisiana.
Pa numa ya kusumina ukwasuka ifipusho fya balefwailisha ifyebo, umwanakashi apokelele ipepala lya mepusho, alembelepo fyonse ifyalefwaikwa, no kulitumina pamo ne citabo ca Icaba Inkaama ku Nsansa sha Lupwa. Uyu mwanakashi alondolwele ukuti ena no mulume wakwe ni Nte sha kwa Yehova kabili balisomene ici citabo ilyo baleteyanya icupo cabo.
Ilyo papitile imilungu inono, umukalamba wa balefwailisha ifyebo atumiine umwanakashi kalata umwali na mashiwi yaleti: “Tuleshininkisha ukuti abapala imwe abaupana kumo na balume benu kuti mwatusambilisha ifikabilwa ku kulenga ifyupo ukuba ifyakosa kabili ifya nsansa. Icishinka ca kuti mwafumine mu ndupwa shapusana nge fyo cintu cacindama pantu ilingi line ici e cileta amafya mu cupo. Lelo ukuteyanishisha kabela icupo, maka maka ukubomfya icitabo nge ci mwatutumine, cikamulenga ukupwisha bwino ukupusana konse ukwingesa. Kabili, ukwabula ukutwishika, ukutungululwa ne mipepele mu cupo cintu cacindama sana. Bonse babili mwalishuka pa kukwata icitetekelo cimo cine icakosa na pa kucetekela mu kwaafwa kwa kwa Lesa.
“Nalibika icitabo mwantumine pe tebulo lyandi apo onse engacimona, kabili ndalanga abasambi bandi nga banjipusha ukubapandako amano pa lwa kuupwa nelyo ukuupa. Nshabala monapo icitabo caba nge ci, kabili cisuma.”
Tulecetekela ukuti na imwe mukamona ukuti ici citabo cakwafwa nga nshi. Nga mulefwaya ici citabo, mukwai isushisheni akapepala kali pe samba no kukatuma ukubomfya akeyala kalipo nelyo akeyala kalingile pe bula 5 ilya uno magazini. Mukapokelela imitubululo ya kulungatika iingamwafwa ukupwisha amafya no kulenga ubumi bwa lupwa ukuba ubusuma nga filya fine Kalenga afwaile ukuti bube.
□ Ntumineni icitabo ca Icaba Inkaama ku Nsansa sha Lupwa.
□ Mukwai kuti mwaisamona pa lwe sambililo lya Baibolo pa ng’anda ilyabula ukulipilisha.