Ukulingana na Baibolo

Bushe Cine Cine Lesa Alasakamana Abana?

ABANA abengi nga nshi balacushiwa no kusanswa buluku buluku cila mwaka. Abengi babomba kwati fye basha mu ncende sha busanso. Bambi na bo balekatwa no kubapatikisha ukuba abashilika nelyo bacilende. Abana abengi balacendwa no kusungwa bubi bubi pa mulandu wa bufumacumi bwabo.

Abantu bamo aba cikuuku balalunguluka ukumona uko abana balecula. Nangu cingatila balasumina ukuti icilenga umucusha onse uyu, mulandu wa bukaitemwe no mushikila wa bantu, na lyo line bamo cilabafya ukusumina ukuti Lesa wa kutemwa kuti asuminisha ulufyengo lwabipisha nge fi. Kuti limbi batontonkanya ukuti Lesa alilekelesha abana no kuti nalimo tasakamana. Bushe ca cine? Bushe icishinka ca kuti abana balalulunkanishiwa no kucushiwa sana calola mu kuti Lesa tabasakamana? Baibolo itila shani?

Lesa Alipata Abalulunkanya

Tacabala aciba kufwaya kwa kwa Yehova Lesa ukuti abana balecushiwa ku bantu babula uluse. Ukucusha abana e cimo ica fya kufumamo fyabipisha ukufuma pa kupondoka kwa bantunse mwi bala lya Edene. Kulya kukaana bumulopwe bwa kwa Lesa kwatungulula ku bunkalwe bwa kucusha abantu ku bantu banabo.—Ukutendeka 3:11-13, 16; Lukala Milandu 8:9.

Lesa alipata abashukila abashakwata maka na bashingaicingilila. Inko sha ku numa ishingi ishishalepepa Yehova balepeela abana amalambo, lelo te fyo Yehova ‘asosele, kabili tacaimine mu mutima wakwe.’ (Yeremia 7:31) Lesa asokele abantu bakwe aba kale ukuti: “Ukucusha nga wamucusha [umwana wa nshiwa], na o ukulila nga andilila, cine cine nkomfwa ukulilila kwakwe; no bukali bwandi bukema.”—Ukufuma 22:22-24.

Yehova Alitemwa Abana

Ukusakamana kwa kwa Lesa ukwa bana kumonekela mu kufunda kusuma uko Lesa afunda bafyashi. Abana abakulila mu mayanda ya mutende ilingi line balakula bwino, abakanshiwa bwino. Kabumba wesu atendeke icupo, icilingile ukubelelela kabili e co “umwaume alekela wishi na nyina, alambatila na ku mukashi wakwe, na bo babo mubili umo.” (Ukutendeka 2:24) Ukulingana na Baibolo, ukwampana kwasuminishiwa fye mu cupo pa kuti nga kwaba abana kuti basakamanwa ukwabula ubwafya.—AbaHebere 13:4.

Amalembo yakomaila na pa bucindami bwa kukansha abana. Baibolo itila: “Abana baume cikwatwa icafuma kuli Yehova; ubufyashi bwa mwi fumo e cilambu apeela. Nge mifwi mu minwe ya mpalume, e fyaba abana baume aba ku bulumendo.” (Amalumbo 127:3, 4) Abana ca bupe ca mutengo icafuma kuli Lesa, kabili alafwaya ukuti bakule bwino. Lesa akonkomesha abafyashi ukupeela ubutungulushi busuma ku bana kwati fye ni filya fundi alungika ubuta bwakwe ilyo talalasa. Icebo ca kwa Lesa cisambilisha ukuti: “Mwe bashibo, mwilakalifya abana benu, lelo mulebakusha mu kusalapula no kukonkomesha kwa kwa Yehova.”—Abena Efese 6:4.

Inshila na imbi iyo Yehova alangilamo ukuti alitemwa bana kusambilisha bafyashi ukucingilila abana ku balwani. Muli Israele wa ku kale nangu fye “baice” baebelwe ukulakutika ku mafunde, ayasanshishemo ifyo bengeshiba imibele yalinga ne ishalinga iya kwampana kwa bwaume no bwanakashi. (Amalango 31:12; Ubwina Lebi 18:6-24) Lesa afwaya abafyashi ukubombesha apapela amaka yabo ukucingilila abana ku muntu onse uwingafwaya ukubashikila no kubacusha.

Isubilo ku Bana

Ukutemwa kwa lyonse ukwa kwa Yehova ku bana kwalilangililwe bwino nga nshi na Yesu Kristu, uubelebesha ubuntu bwa kwa Wishi. (Yohane 5:19) Ilyo abatumwa bakwe mu kuluba baeseshe ukulesha abafyashi ukuleta abana kuli wene alibalungike bukali bukali. Yesu abebele ati: “Lekeni abana banono bese kuli ine. . . . Kabili afukatile abana, alabapaala.” (Marko 10:13-16) Abana balicindama nga nshi kuli Yehova Lesa na ku Mwana wakwe.

Na kuba, ukupitila mu Mfumu yasontwa, Yesu Kristu, Lesa mu kwangufyanya akapokolola abana abalulunkanishiwa. Bakalulunkanya baitemwa na bacululusha abantu banabo bakonaulwa ku ciyayaya. (Amalumbo 37:10, 11) Lelo ku batambalala abafwaya Yehova, Baibolo itila: “Akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo. Ifya ntanshi nafiya.”—Ukusokolola 21:3, 4.

Pali ino nshita ilyo Lesa ashilafumyapo imbifi, alalanga ukutemwa lintu apeela ukwafwa kwa ku mupashi no kwa ku muntontonkanya ku bacushiwa no kupumwa. Alaya ukuti: “Iyaluba nkafwaya, ne yauluba nkabwesha, ne yafunika nkakakako, ne yalwala nkakosha.” (Esekiele 34:16) Ukupitila mu Cebo cakwe, umupashi wakwe uwa mushilo, na mu cilonganino ca Bena Kristu, Yehova alasansamusha abana abacula kabili ababula amaka. Ifyo cawama ukwishiba ukuti, pali ino nshita, nga filya akacita na ku ntanshi, ‘Shifwe wa nkumbu kabili Lesa wa cisansamushi conse, alatusansamusha mu bucushi bwesu bonse.’—2 Abena Korinti 1:3, 4.

[Abatusuminishe Ukubomfya Icikope pe bula 17]

© Mikkel Ostergaard/Panos Pictures