“Bushe Abafungwa Kuti Bayaluka?”

Ici e cipusho cali pa nkupo ya “Loleni!” uwa May 8, 2001. Abengi abaibelengeleko balitashishe pa fyebo fyalimo, kabili mu kati mwali ne lyashi pa mulimo wa kusambilisha Baibolo uo Inte sha kwa Yehova balebomba mu cifungo ca ku Atlanta, mu Georgia, ku U.S.A. Ifi e fimo fimo fye ifyo abalembele bakalata basosele.

◼ “Apo nali umufungwa imyaka 8 iyapita, nalishiba ukuti icaafwa sana abantu, kubasambilisha ifyaba mu Baibolo nga filya Inte sha kwa Yehova basambilisha mu fifungo. Ilyo nali mu cifungo mu Atlanta, nali ne shuko lya kubomba na basano abalumbulwa mu cipande. Ala aba bantu bali no kutemwa kabili balengafwa. Ndatasha aba bwananyina ba musango yu, abatemwa abantu fye bonse kumo na fwe bacite filubo lelo fwe baletulukusha ukuleka ukucita ifyabipa pa kuti tube abantu abasuma.”—R. J.

◼ “Pali ino nshita naba mu cifungo, kabili aba bwananyina baba pa Ng’anda ya Bufumu iyaba mupepi balipekanya bwino sana ukuti baletusambilisha. Na pa mulandu wa ico, umufungwa munandi aliibatishiwa no kubatishiwa, kabili ine, nangu nalitamfiwe mu cilonganino ca Bena Kristu, nomba nalibweshiwa. Bambi na bo abengi balesambilila Baibolo. Ndakoseleshiwa ukwishiba ukuti fwe balesambilila tatwaba fye fweka lelo kwaba na bambi icalo conse. Ala cisuma sana ukubombela Yehova, te mulandu ne ko twingaba!”—J. M.

◼ “Mu 1970, nalikakilwe pa mulandu uo nshacitile. Balinkakile pa myaka 14. Ilyo nali mu cifungo, natendeke ukusambilila Baibolo ne Nte sha kwa Yehova. Nalitemenwe ubufumacumi bwabo no fyo balesakamana abantu. Ilyo nakakwilwe, natwalilile ukusambilila kabili tapakokwele na kukokola, nalibatishiwe. Limo limo cilankalipa sana pa kufyengwa nafyengelwe. Lelo, ndaicinkulako ne mwine ukuti nomba line Yehova alapwisha ulufyengo lonse no kucula. Abafungwa kuti bayaluka nga balekonka amafunde ya mu Baibolo. Kabili bafwile no kutasha bamunyinefwe abaipeelesha ukubafwilisha. Ine kwena ndabatasha icine cine!”—R. S.

◼ “Naingile mu cifungo ninshi ndapeepa fwaka, ndabomfya imiti ikola, ndatukana, kabili nshakwete mucinshi ku balashi. Kabili nali mwi bumba lya bampulamafunde. Ukulunda pali ifi fyonse, nalitamfiwe mu cilonganino ca Bena Kristu. Nomba nalibweshiwa, kabili njile ndekosa mu kupepa. Pa mulandu wa kuti nalishiba icine, ndi muntungwa!”—I. G.