Ilyo umwana afwa

◼ Imfwa ya mwana ilakalifya abashele, no kucilisha abafyashi bakwe. Nyina uo umwana wakwe umulumendo uwa myaka ya kufyalwa 16 afwile pa numa ya kupya ku mulilo mu busanso, pa kuloosha atile: “Lesa tasuminisha ukutila fwe bafyashi ni fwe twafwilamo ukucila abana besu, tasuminisha no kuti tufwile pamo na bo.”

Lelo nangu aleloosha muli uyu musango, alikwete isubilo, pantu atile: “Lesa alitweba icishinka pa mfwa, kabili ifyebo ifyo atweba, fyalenga ukutila ine no mwina mwandi twilakalipa nelyo ukupelenganishiwa pa catucitikila.” Alisumine ukutila, “Lesa wesu te wipeye umwana, kabili ubulayo Bwakwe bwa kuti akabwesha abafwa mu calo ilyo cikaba paradaise. Nga twakutumana, twatontonkanya pa mwana wesu, ciba kwati tulemumona ali umumi, kabili ali ne nsansa, pamo ne fibusa fyakwe no lupwa.”

Lelo kwena, na bantu bakwata isubilo lyakosa mu bulayo bwa kwa Lesa ubwa kuti akabuusha abafwa balakabila icisansamushi, kabili uyu nyina wafwililwe alisansamushiwe ku fibusa fyakwe ifingi. Alandile ukutila: “Ifyebo ifingi ifya mu Malembo ifyo abaletusansamusha baletweba fyafumine mu kabuuku katila Ilyo Untu Watemwa Afwa kabili babelengelemo ne milimo isuma iyo bengabombela abafwilwa. Twakoseleshe bonse abaleisa ku mwesu ukubelenga aka kabuuku pa kuti beshibe bwino ifyo bengatusansamusha no kwishiba ubulanda ubo tukatwalilila ukuba na bo.”

Nakalimo na imwe nangu bambi abo mwaishiba kuti basansamuka nga babelenga akabuuku katila Ilyo Untu Watemwa Afwa. Pa kupokako aka kabuuku, lembeni fye aka kapepala e lyo no kukatuma ukubomfya adresi yalinga pa yali pe bula 5 muli uno magazini.

□ Ndelomba ukuntumina akabuuku katila Ilyo Untu Watemwa Afwa.

□ Mukwai kuti mwaisamona, ndelomba ukusambilila pa fya Baibolo pa ng’anda.