Ubupe Ubo Uwapeelwe Atashishe Sana

Uupeela ubupe no upokelela bonse bene balasekelela nga ca kuti ubo bupe bwafika pa nshita isuma kabili uwapokelela abutemwa sana. Ni nomba line umukalamba mu buteko, alembeele ku maofesi ya Nte sha kwa Yehova mu Mexico. Alitashishe sana pa kupokelela icitabo ca kuti Sambilila Kuli Kasambilisha Mukalamba. Fimo ifyali muli kalata alembele ni fi:

“Ifyebo fili muli cino citabo fisuma nga nshi. Nangu ca kuti ifi fyebo fifumine mu citabo ca kale sana, filabomba na muno nshiku kabili na mu mikalile yesu yine kuti fyatwafwa.

Nimona bwino bwino ukutila fwe bafyashi tufwile ukusambilisha abana besu amasambililo ayengabafwa ukwishiba ifyo bafwile ukulacita, e lyo no kucita ifyo fine. Tufwile ukubasambilisha no kuba aba mucinshi ne cishinka muno calo umo abantu bashaba ifi. Ne cacila pali fyonse, tufwile ukubafwa ukwishiba ukuti Lesa Mukulu, uwaba no kutemwa, e ko aba. Nshiletwishika ukuti ifyebo mwatumine fikangafwa icine cine, mu ncito yandi na lintu ndebomba umulimo uo Kabumba apeela abafyashi uwa kwafwilisha abana besu, pa kuti nga bakula bakatemwe abena mupalamano babo.”

Uyu mubomfi wa buteko alimwene ukutila ifyo Yesu alesambilisha abantu ne fyo alecita, ifyalembwa mu citabo ca Sambilila Kuli Kasambilisha Mukalamba, kuti fyatwafwa nga twafikonka. Na imwe kuti mwapokako ici citabo cishaiwamina ica mabula 256 icaba ne fikope ifisuma na mabula ayalingana ubukulu na yaba muli uno magazini. Kuti mwapokako cino citabo pa kulemba pa kapepala kali pe samba no kukatuma. Bomfyeni adresi ilipo nelyo adresi yalinga pa yali pe bula 5 muli uno wine magazini.

□ Kuti natemwa mwantuminako icitabo citila Sambilila Kuli Kasambilisha Mukalamba.

□ Kuti natemwa muleisa mu kunsambilisha Baibolo pa ng’anda ukwabula ukundipilisha.