Amenshi Ayapeela Ubumi
Bushiku bumo Yesu alepita mu musumba wa Samaria, uwali ku kapinda ka ku kuso aka Yerusalemu. Alinakile kabili aali ne cilaka. Ilyo aikele lwa pa cishima, alombele amenshi ku mwanakashi umwina Samaria. Uyu mwanakashi alipapile ukumfwa umuYuda amulomba amenshi, pantu ilya nshita abaYuda na bena Samaria tabaleumfwana.
Uyu umwanakashi aipwishe Yesu ukuti: “Nga cinshi iwe, we muYuda ulenombela amenshi ya kunwa, ne mwanakashi umwina Samaria?”
Yesu amwaswike ati: “Awishiba ubupe bwa kwa Lesa, no ulekweba ati, ‘Mpeelako amenshi ya kunwa,’ nga naumulomba, na o nga nakupeela amenshi ya mweo.”
Na o Yesu akonkenyepo ukumweba ukuti: “Onse uulenwako aya menshi akomfwa icilaka na kabili. Onse uulenwako amenshi ayo ndemupeela, takomfwe icilaka iyo, lelo amenshi ayo ndemupeela yakaba muli ena kwati kamfukumfuku ka menshi ayalefukaukila ku kupeela umweo wa muyayaya.”—Yohane 4:1-15.
Menshi ya musango nshi Yesu alelandapo?
BAIBOLO ita Kabumba wesu, Yehova Lesa, ukuti “akamfukumfuku ka menshi ya mweo.” (Yeremia 2:13) Ubumi bupe ubo Lesa atupeela, kabili pa kuti tube no mweo kano tulenwa amenshi ya cine cine e lyo na menshi Yesu alandilepo.
Abantu pali lelo balafwaya sana ukwishiba ifintu ifyacindama mu bumi ukucila ne fyo cali kale. Kanshi, abantu pano calo bali ne cilaka ca kwishiba ifya kwa Lesa. Abantu balafwaya ukwishiba ifyasuko ku mepusho pamo nga: Bushe abafwa baba kwi? Bushe tukabamona na kabili? Mulandu nshi Lesa asuminishisha ukucula? Bushe ku ntanshi inkondo, ubunkalwe, insala, no kulwala fikapwa? Inte sha kwa Yehova balishiba ukuti ifyasuko kuli aya mepusho kuti fyasangwa fye mu Cebo ca kwa Lesa, Baibolo, icaba nga “amenshi” ayapembesula.
Ilyo Yesu alandile no mwanakashi umwina Samaria pa cishima, alelanda pa cine ca mu Baibolo atemwa pa menshi ayapeela umweo ayafuma mu Cebo ca kwa Lesa. Inte sha kwa Yehova balemwita ukwisanwa aya menshi yasanguluka ayafuma mu Baibolo. Ne buuku lya kulekelesha mu Baibolo lyalilandapo pali ubu bwite aliti: “Na onse uuli ne cilaka ese; onse uulefwaya anwepo amenshi ya mweo aya bupe fye.”—Ukusokolola 22:17.
Nga mulefwaya ukwishiba ifisuma ifyo Ubufumu bwa kwa Lesa bukacitila abantu, mukwai landeni ne Nte sha kwa Yehova pa Ng’anda ya Bufumu iyabela mupepi na ku mwenu. Nelyo lembeleni ku maofesi ya baNte ukubomfya adresi iili pe bula 5 muli uno wine magazini. Nga mulefwaya kuti mwamona na pa Intaneti pa www. watchtower. org.
[Akabokoshi pe bula 16, 17]
BUSHE ABA MAPEPO BALYAFWA ABANTU UKWISHIBA ICINE?
Ukulaya fye ku calici nelyo ukuimona fye ukuti muli bakapepa te cilenga mwaishiba icine icishaiwamina. Icishinka ca kuti, imipepele iingi iyaishibikwa yaliletela abantu amafya na yambi, mu nshita ya kubafwa. Katulande pali cimo icicitika: Ilyo kuba inkondo, ba Katolika balepaya ba Katolika banabo, ba Protestanti nabo balepaya ba Protestantii banabo. Ilyo balelwa, bonse bapepa kuli Lesa ukuti abafwe ukucimfya!
Na cimbi ca kuti kwaba imilandu iingi iyo bashimapepo bacita, iya kwiba indalama nelyo iya ukulungana na bana abanono. E co, amenshi nelyo ifyo bashimapepo abengi basambilisha abantu fyalikowela. (Ukusokolola 17:4-6; 18:1-5) Caba fye nga fintu Baibolo ilanda pali Tito 1:16 apatila: “Basosa abati balishiba Lesa, lelo ku fyo bacita balamukaana.” Kanshi bashimapepo abengi balifilwa ukupwisha icilaka ca bantu ica kwishiba icebo ca kwa Lesa muli shino nshiku.
[Akabokoshi ne Cikope pe bula 17]
Icitabo citila Bushe Cinshi Baibolo Isambilisha?, icakwata ifipandwa 19 na mabula 224 cilasuka bwino ifipusho fya mu Baibolo pamo nge fi:
“Bushe Lesa afwaya isonde ukuba shani?”
“Bushe abafwa baba kwi?”
“Bushe tuleikala mu ‘nshiku sha kulekelesha’?”
“Mulandu nshi Lesa asuminishisha ukucula?”
[Icikope pe bula 17]
‘Amenshi ayafuma mu Cebo ca kwa Lesa’ kuti mwayasanga pa Ng’anda ya Bufumu iyabela kuntu mwikala