Te Banono Aba Kuti Bafilwa Ukusambilila

● E fyalembele umufyashi umo uwikala ku California, ku America, ilyo alelanda pa lyashi balemba mu citabo citila Sambilila Kuli Kasambilisha Mukalamba. Atile: “Umulungu wapwile ilyo umwana wesu Javan, uuli ne myaka itatu, twamutwele kuli dokota, aipwishe nga ca kuti ine na balume bandi twalilanshanya na Javan pa lyashi ilyakuma ifya mfwalo. Nalitemenwe sana ukumulondolwelako ifyaba mu citabo citila Kasambilisha Mukalamba icilondolola ukuti umuntu uuli onse tafwile ukula-angasha ifya mfwalo fya muntu umbi. Dokota alitemenwe sana ukumfwa ukuti twalilanshanya pali ili lyashi.”

Uyu mufyashi alandile no kuti: “Ili lyashi balililondolola bwino sana muli ici citabo.” Alelanda pa cipande icitila “Ifyo Yesu Acingililwe.” Ici cipande cilondolola ifyo Lesa, Wishi wa kwa Yesu uwa ku muulu, acingilile Umwana wakwe ku Mfumu Herode iyalefwaya ukumwipaya. Pali iyi nshita Yesu ali umwaice ica kutila te kuti aicingilile. (Mateo 2:7-23) Ici citabo lyena cilanga ifyo abafyashi bengasambilisha abana abanono ukuicingilila ku bantu abengafwaya ukula-angasha ifya mfwalo fyabo.

Kuti mwalomba ici citabo icakwata amabula 256, icakwata ifikope ifisuma, kabili amabula yakula fye nga ino ine magazini. Kuti mwalemba pa kapepala kali pe samba no kukatuma kuli adresi iilipo nelyo kuti mwatuma kuli adresi ya mu calo cenu iili pe bula 5 muli ino magazini.

□ Mukwai ndefwaya mukantumineko ici citabo.

□ Kuti natemwa ukuti muleisa mu kunsambilisha Baibolo pa ng’anda ukwabula ukundipilisha.