BUSHE CAPANGILWE FYE?

Icuni Beta Ukuti Bar-Tailed Godwit Ifyo Cishiba Uko Cileya

ABANTU abengi balapapa sana pa fyo icuni beta ukuti Bar-tailed Godwit cipupuka intamfu iyalepa sana pa kukuuka. Cipoosapo inshiku ukucila pali 8 pa kupupuka intamfu iya makilomita 11,000.

Tontonkanyenipo: Abafwailisha pa fyuni batila ifyuni fimo fyaba kwati fyalikwata kampasi muli bongobongo kabili pa kwishiba intunga fileyako ilyo filekuuka fikonka amaka yatinta ayashimoneka ayaba mu mushili. Nalimo ici cuni ca godwit cibomfya akasuba pa kwishiba uko cileya elyo mu nshita ya bushiku cibomfya intanda. Cimoneka kwati ici cuni cileshiba na lintu kwalaba umwela uukalamba pa kuti cingasendwako na ku mwela ilyo cilepupuka. Na lyo line, abasambilila sana tabaishiba fyonse pa fyo caba pa kuti ifi fyuni filepupuka intamfu iyalepa pa kukuuka, cilabapesha amano. Bob Gill, uwasambilila sana, atile: “Napapita imyaka 20 apo natampila ukusambilila pali ifi fyuni, kabili ifyo nasanga, filampesha amano.”

Muletipo Shani? Bushe amano ayo ici cuni ca bar-tailed godwit aya kwishiba uko cileya pa kukuuka, caikwatiile fye icine? Nelyo bushe pali uwacipangile?

[Icikope pe bula 16]

Photo: Courtesy Grandpa@50