Pali Bemba wa Nicaragua paliba icishi icisuma nga nshi ica Ometepe. Pali ici cishi paba ne mpili shibili
IFYALO NA BANTU | NICARAGUA
Icalo ca Nicaragua
ABANTU balitemwa ukwita icalo ca Nicaragua ukuti calo ca fibemba ne mpili ishipuulika. Muli ici calo, e mwaba bemba wakulisha mu Central America monse, uo beta ati Lake Nicaragua. Abekala calo beta uyu bemba ati Cocibolca, icalola mu kuti “Bemba Umusuma.” Muli iyi bemba mwaba ifishi ifingi kabili nangu ca kuti yakwata amenshi umushaba umucele, mwaliba ifisabi ifikalamba ifisangwa fye muli fibemba ifyakwata amenshi ya mucele.
Iluba ilyaseeka sana mu Nicaragua ilyo beta ati sacuanjoche (frangipani)
Mu Nicaragua e mwaba ne cifulo ico beta ukuti Mosquito Coast, icabela ukutali ne fifulo fimbi ifya mu Central America. Ici icifulo icabela lwa ku kabanga aka lulamba lwa bemba, calepa amakilomita 65 kabili cayafika mu calo ca Honduras. Pa mitundu iyikala mu Nicaragua paliba na bena Miskito, nelyo Mosquito, abatendeke ukwikala muli ici calo kale sana ninshi na bantu ba ku Bulaya tabalatendeka ukufika mu myaka ya ba 1500.
Abena Miskito balomfwana sana kabili balikwata intambi ishaibela. Ku ca kumwenako, tabakwata amashiwi nga aya tubomfya pa kulanga umucinshi pamo nga “Ba.” Mu mishi, abaice beta abakalamba abali bonse ati “Tata” nelyo “Mayo.” Abena Miskito balikwata no lutambi lwa kale. Muli ulu ulutambi, abanakashi balakumyanya amatobo nga baleposha cibusa wabo nelyo lupwa. Lyena uwacibalilapo ukuposha umunankwe, alakula umupu mu myona.
Abena Nicaragua
Impapulo shilanda pali Baibolo isha mu lulimi lwa ciMayangna ne ciMiskito, ishalembwa ne Nte sha kwa Yehova