Ifyo Isabi Beta ati Cuttlefish Lyalula Amalangi

ISABI beta ati Cuttlefish lilaalula amalangi ica kuti na bantu te kuti balimone. Abafwailisha pa fintu basanga ukuti ili isabi “lilayalula ifyo limoneka, kabili kuti lyacita ifi imiku iingi ukwabula no kupoosa inshita.” Bushe licita shani pa kuti lileyaluka ifyo limoneka?

Tontonkanyeni pali ici: Mu nkanda ya ili isabi mwaliba insandesande ishilenga lileyalula amalangi. Muli ishi insandesande, mwaliba amalangi ayalekanalekana. Ili isabi nga lilefwaya ukwalula ilangi, bongobongo ilalenga insandesande ukufumya ilyo ilangi. Talyalula fye amalangi pa kuti lifisame, lelo lilalula amalangi na pa kuti lilembule ilikota.

Ababomba pa University of Bristol, mu England, balipanga icapala inkanda ye sabi lya cuttlefish. Pa kupanga ici, babomfeshe utuntu utwafiita utubomba kwati micincili sha mu nsandesande sha muli cuttlefish. Ilyo babikile amalaiti kuli ici bapangile, calitendeke ukwalula ilangi.

Ba Jonathan Rossiter, abafwailisha pa fintu batile, “Ilyo twafwailishe pali ili isabi twasangile ukuti lyalipangwa bwino sana” kabili kuti twasambililako ifya kupanga ifya kufwala ifingalayaluka amalangi mu nshita fye inono. Ba Rossiter balandile no kuti abantu kuti balefwala ifi ifya kufwala nga balefwaya ukufisama nelyo balefwaya fye ukumoneka bwino.

Muletipo shani? Bushe ifi isabi beta ati cuttlefish lyalula amalangi filanga ukuti kwaliba uwalipangile nelyo lyasangwike fye?