IFILECITIKA MU CALO | UKUMFWANA
Ukumfwana
Bushe mumona ukuti Baibolo e citabo icingamwafwa sana ukulaumfwana bwino na bantu nelyo mumona kwati te kuti imwafwe? Natulande pa fintu fimo ifyo Baibolo yalandile kale ifyapalana ne fyo abafwailisha pa fintu basanga.
India
Ukulingana ne fyo bafwailishe mu 2014, abacaice abengi abali ne myaka 18 ukufika kuli 25 mu India, bamona kwati ukulaala no muntu uo bashaupana nankwe takwabipa. Dokota uwikala ku Mumbai aebele bakalemba ba lyashi aba ku Hindustan Times ukuti, amona kwati “abacaice nga baleishishanya tacipilibula ukuti ninshi balefwaya ukuupana. Kanshi nangu abacaice bengacita ubulalelale pa bushiku ubo bwine baishibana, nangu nga balecita ubulalelale pa miku iingi nelyo baleikala pamo ukwabula ukuupana, tacipilibula ukuti ninshi balyumfwana ukuti bakopana.”
TONTONKANYENI PALI ICI: Bushe pa bantu abashaupana lelo abalaala pamo e lyo na pa baupana, ni bani abalwala sana amalwele yambukila kabili ni bani basakamikwa sana?—1 Abena Korinti 6:18.
Denmark
Abantu abomana sana na balupwa lwabo, ilingi line balafwa bwangu. Pa myaka 11, abafwailisha pa fintu aba pa University of Copenhagen balifwailishe pa bantu 10,000 abaali ne myaka 40 ukufika kuli 60, kabili basangile ukuti abengi abaleumana sana na balupwa lwabo baali no kufwa bwangu ukucila balya abaleumfwana sana na balupwa lwabo. Uwalembele pali ifi bafwailishe alandile ukuti ukwishiba ifya kucita nga tuli na masakamika nelyo nga batukalifya, “kwalicindama nga ca kuti tulefwaya ukwikala inshiku ishingi.”
IFYO BAIBOLO ILANDA: “Onse uulama ululimi lwakwe alicenjela, no wiluka aba no mutima uwatekanya.”—Amapinda 17:27.
America
Abafwailisha pa fintu, balifwailishe pa bantu 564 abaupene nomba line mu Louisiana, kabili basangile ukuti abengi abaleka ukwishishishanya e lyo batendeka na kabili, ilingi line nga baupana, tapapita ne myaka 5 ninshi nabalekanapo. Basangile no kuti aba bantu balomana sana kabili tabaaba ne nsansa mu fyupo fyabo.
IFYO BAIBOLO ILANDA: “Ico Lesa alundenye [icupo], umuntu ecilekanya.”—Mateo 19:6.