Kazakhstan

KALE abena Kazakhstan tabaleikala pamo, lelo baleendauka. Ukufika na nomba, abena Kazakhstan bamo tabekala pamo, lelo balendauka pa kuti batwale inama shabo ukuli umulemfwe. Mu lusuba bekala mu mpili pantu e muba umulemfwe. Lyena nga kwatendeka ukutalala sana, balafuma mu mpili no kutwala inama shabo ku fifulo fimbi ifyakaba.

Abena Kazakhstan bamo bekala mu kalale. Na lyo line, balitwalilila ukukonka intambi sha fikolwe fyabo, ukulya ifya kulya balelya, e lyo no kupanga ifintu ifyo ifikolwe fyabo fyalepanga. Nga filya fine ifikolwe fyabo fyalecita, na muno nshiku abena Kazakhstan balitemwa sana imishikakulo, ukwimba inyimbo e lyo no kulisha ifilimba.

Abena Kazakhstan abengi abendauka, bekala mu tumayanda uto bapanga na matenti uto beta ukutila yurt, kabili baishibikwa nga abantu abasunga bwino impanga bekalamo. Na ino ine inshita bakacema balitemwa ukubomfya utu utumayanda, e lyo abena Kazakhstan abengi abekala mu kalale bena batemwa ukutubomfya pa tushita twaibela. Na kabili abatandashi balitemwa ukutubomfya. Utu utumayanda balatuyemfya sana ku fyo abanakashi bapikula pamo nga amakapeti.

Abena Kazakhstan abekala mu mishi balitemwa sana bakabalwe. Kwaliba amashina ukucila pali 21 ayo abena Kazakhstan babomfya pa kwita bakabalwe, kabili kwaliba amashina ukucila pali 30 ayo babomfya pa kulondolola amalangi ya bakabalwe. Bakabalwe bacili balikosa sana umutengo kabili abantu balatemwa nga babapeela kabalwe. Mu mishi, abalumendo basambilila ukwendela pali kabalwe ninshi bali fye abaice.

Abena Kazakhstan balitemwa sana ukulya inama kabili tabatemwa utwa kubikabikamo. Ifyo batemwa sana ukunwa mukaka wa kwa kabalwe uo beta ukuti koumiss, kabili batila usuma sana ku bumi. Na kabili balitemwa ukunwa umukaka bakama ku ngamila uwasasamina uo beta ukuti shubat.

Aba pa maofeshi ya Nte sha kwa Yehova ayaba mu Almaty, balatemwa ukupokelela abeni no kubatandasha.