Amashiwi ya Kwiswila

Ni kwi uko Ningapandwa Amano Yasuma?

ificitikila abakashana

Tutiile lyonse utontonkanya fye pa mulumendo uumoneka bwino uwishile nomba line mu kalasi. E lyo walatontonkanya no kuti, ‘Na kuba no kunjishiba tanjishiba kanshi cili fye bwino ukulatontonkanya pali ena.’ E lyo kabili te iwe weka uumutontonkanyapo. Abakashana bonse e o bafwaya. Icalenga ukuti wishibe, pantu ulomfwa uko abakashana bambi bamulandapo lyonse.

Wati utile, awe wamona fye alekulolesha. Wapapa ukumona uko akusekela. Awe na iwe wamusekela. Aisa uko uli mu kulanda nobe.

Akuposha nsoni nsoni ati “Uli shani.”

Na iwe wayasuka auti “Ndi fye bwino.”

Akweba ne shina lyakwe ati “Nine Chewe.”

Mwenso mwenso wamwipusha auti, “Uli mweni te fyo?”

Akwasuka ukuti, “Papitile fye imilungu iinono apo twakukila kuno.”

Na lyo line naufilwa ukushininkisha ukuti uulelanda nobe ni Chewe!

E lyo Chewe akweba no kuti, “Kwalaba umutebeto ku mwesu nga nainuka ku sukulu. Bushe walaisa?”

Awe apalama, e lyo pa kukweba amashiwi yamo akutepelesha fye.

Atila, “Nawishiba, abafyashi bandi tabalipo, e lyo kabili mulya babika ubwalwa, tabakomenemo. Bushe walaisa?”

Chewe alelolela ukuti umwasuke. Abakashana bambi bena abo usambilila nabo kuti basumina fye ulubilo!

Inga iwe walamweba ati shani?

ificitikila abalumendo

Ababiyo babili abo usambilila na bo baleisa uko uli. Waumfwa na maka yapwa pantu mu mulungu fye umo nabesha ukukupatisha ukuti upeepeko fwaka nomba walikaana. Nomba uno muku e walalenga butatu.

Umubiyo wa kubalilapo atila: “Na lelo uli fye weka? Bushe walimwishiba umunandi uyu naisa nankwe?” Abala akushinisha pa kulanda ukuti umunandi, uku ninshi alefumya na fimo mwi tumba no kukutambika.

Wamona ekete cimo icilemoneka kwati ni fwaka, no kwishiba waishiba ukuti kwena te cimbi ni fwaka, e lyo nomba waumfwa na maka yapwililila fye.

E lyo watila “Nakaana. Nalikweba kale ukuti nshipeepa.”

Umulumendo walenga bubili atila: “Naishiba ico ulekanina, mulandu we calici lyenu, te fyo? Balamulesha ukwangala!”

E lyo umunobe wa kubalilapo alakuseka ati: “Nangu ni we camwenso fye, te fyo?”

E lyo pa kulanda na iwe washipa auti: “Te ine camwenso!”

E lyo kabili umulumendo wa bubili abika amaboko pa mabeya yobe, alakusembeleka ati, “Ale peepako fye na iwe.”

Umulumendo wa kubalilapo akutambika fwaka, atepelesha ne shiwi ukukweba ati: “Tatwakebeko nangu umo. Tapali no ukeshiba.”

Kuti wacita shani?

IFYA musango yu e ficitikila abaice icalo conse fye. Lelo icishinka ca kuti, abaice bamo balishiba ifyo bengacita nga bakwata ubwafya bwa musango yu ukucila bambi. Umwaice nga bamupatikisha ukupeepa, nalimo kuti atontonkanya ukuti: ‘Kwena nshilefwaya ukupeepa, nomba bacilamo fye ukumpatikisha. Cinshi ico te kuti nangile abana be sukulu banandi ukuti na ine wine ndi muntu?’ E lyo limbi umukashana uo baita ku mulumendo ukuti aye nankwe mu kutandala nalimo kuti atila: ‘Kwena alamoneka ukuti aliba fye bwino. Bushe kwena te kuti nsumine ukuya nankwe uno wine fye umuku?’

Lelo abaice abengi balibasambilisha ukukanaumfwa umwenso wa kulanda ifyo baishiba. E cilenga ukuti, nangu cimoneka icayafya ku bantu, aba baice abafundwa bena tacibafya sana ukukaana amatunko. Bushe na iwe kuti watemwa ukupashanya abaice ba musango yu? Kwena na iwe wine e fyo wingaba! Kuti wacita shani?

Baibolo kuti yakwafwa ukuba uwashipa nga wakwata amafya. E mwaba fye ukufunda ukusuma nga nshi pantu yafuma kuli Lesa. (2 Timote 3:16, 17) Ni mu mafya ya musango nshi umo Baibolo ingakwafwa? Mona pa mutande uli pe samba, kabili conga mu kabokoshi ✔ ilyashi ilyo wingatemwa sana.

□ Ifya kumfwana na balumendo na bakashana

□ Ifyo ningeshiba ukuti nomba natampa ukukula

□ Ukupanga ifibusa

□ Ukucimfya amatunko ya ku sukulu

□ Ifya kubomfya indalama

□ Ifya kwikala na bafyashi bandi

□ Ukuilama

□ Ukusala umusango wa fyangalo ifyo ningatemwa

□ Ifyo ningaba sana cibusa wa kwa Lesa

Nga fintu walamona pa mabula 4 na 5, amalyashi yatantikwe pa muulu e yali na mu fipande 9 ifya cino citabo. Ni yali kwi ayo ucongelepo? Limbi kuti wabalila ukumona pali ifi ifipande. Amafunde ya mu Baibolo kuti yakwafwa muli fyonse ifi. Cino citabo ico ulebelenga cili no kukulangilila ifyo wingacita.a

Cino citabo na kabili cikakwafwa ukulanda ifyo uletontonkanya. Ica kumwenako fye, lwa ku mpela ya cipandwa cimo na cimo, kuli akabokoshi akaletila “Ifyo Ndefwaya Ukucita!” Muli aka akabokoshi ulingile ukulembamo ifyo ukacita pa kukonka ifyo ubelengele. Amabula ya kulembapo ifyebo ifyo ulefwaya ukucita pamo nga “Ifyo Nkacita Abanandi Nga Balefwaya Mbakonkelele” pa mabula 132 na 133—yakakwafwa ukutontonkanya pa bwafya ubo ukwete e lyo ne fyo wingabupwisha. E lyo kabili, ku mpela ya cipande cimo na cimo kuli ibuula ililetiila, “Ifyebo Fyandi,” apo wingalemba pa fyo fimo ifyo wacibelenga fikwafwile. Na kabili mu citabo conse uli no kusangamo amabula 9 apali umutwe wa kuti “Abo Wingapashanya.” Pali aya mabula nabalanda pa bantu balekanalekana aba muli Baibolo abo wingapashanya.

Baibolo ilakucincisha aiti: “Nonka amano, nonka umucetekanya.” (Amapinda 4:5) Amashiwi ya kuti “amano” no “mucetekenya,” tayapilibula ukwishiba fye icalungama ne icabipa. Ulingile ukwishiba bwino bwino. Ica kumwenako fye, nga waishiba ifingatumbuka mu kucita ifyabipa e lyo no busuma bwaba mu kucita ifisuma, abanobe nga balefwaya ubakonkelele kuti washipa pa kukaana.

Ico ufwile ukwishiba ca kuti: Nangu ukwate amafya ya musango shani, te iwe weka uwakwata ayo mafya. Abaice bambi na bo balakwata amafya ya musango uyu kabili baliyapwisha. Kanshi na iwe kuti wapwisha amafya! Ulebelenga sana cino citabo ica kuti Ifipusho Abacaice Bepusha ne Fyasuko Ifingabafwa, Ibuuku 2. Cikalenga ukashininkishe ukuti muli Baibolo mwaliba amano ayasuma nga nshi ayo ushingasanga kumbi!

[Futunoti]