Abantu abengi balileka ukuya ku mapepo pantu bashimapepo tababafwa ukwishiba ifyaba mu Baibolo, kabili tababasansamusha. Lelo cinshi mufwile ukulalonganina ne Nte sha kwa Yehova? Busuma nshi bwaba mu kusangwa ku kulongana?

Mukalaba na bantu abatemwana kabili ababika amano kuli bambi. Abena Kristu ba kubalilapo balelongana capamo mu filonganino. Ne co balelonganina, kupepa Lesa, ukusambilila Baibolo, no kukoseleshanya. (AbaHebere 10:24, 25) Balemona Abena Kristu banabo ukuti fibusa fyabo ifya cine, kabili nga balongana, calemoneka ukuti balitemwana. (2 Abena Tesalonika 1:3; 3 Yohane 14) Filya fine Abena Kristu ba kubalilapo balecita, e fyo na ifwe tucita, ne ci cilalenga na ifwe tuleba ne nsansa.

Mukeshiba ifya kukonka ifyo Baibolo isambilisha. Fwe Nte sha kwa Yehova tulongana capamo, abaume, abanakashi na bana, nga filya cali na ku bena Israele. Kwaliba abapeelwa umulimo wa kusambilisha, ababomfya Baibolo ku kutwafwa ukwishiba ifyo twingakonka ifyaba mu Baibolo mu mikalile yesu. (Amalango 31:12; Nehemia 8:8) Pali uku kulongana kwa Bwina Kristu, uuli onse kuti ayasukapo no kwimbako inyimbo. Nga tulecita ifyo ninshi tulelanda pe subilo twakwata. —AbaHebere 10:23.

Mukacetekela sana Lesa. Umutumwa Paulo aebele aba mu cilonganino cimo mu nshiku shakwe ukuti: “Ndefuluka ukumumona, . . . pa kuti nkamukoseleshe e lyo na imwe mukankoseleshe, umo na umo ku citetekelo ca mubiye, e kutila ku citetekelo cenu na ku citetekelo candi.” (Abena Roma 1:11, 12) Ukuba na Bena Kristu banensu lyonse, kulakosha icitetekelo cesu no kutwafwa ukutwalilila ukukonka ifyo tusambilila mu Baibolo.

Kuti cawama sana nga mwaisa ku kulongana kukakonkapo no kuimwena mwe bene ifyo ciba. Bakamupokelela bwino sana. Takuba kusonkesha imituulo.

• Bushe tupashanya bani mu milonganine yesu?

• Ukusangwa ku kulongana kuti kwatwafwa shani?

Tulaya mu kulongana lyonse nangu ca kuti pa kuya tufwile ukupita mu mpanga e lyo nangu ca kuti nakutalala sana nelyo kuli imfula. Mulandu nshi ba Nte bela mu kulongana nangu ca kuti nabakwata amafya nelyo nabanaka?

Ukulongana kulatuletela insansa. Ilyo Paulo alelanda pabo tulongana nabo, alembele ati: “Tutontonkanye pa banensu.” (AbaHebere 10:24) Aya mashiwi yalola mu kuti tulingile ukwishiba bwino sana abo tulongana nabo. Kanshi Paulo aletukoselesha ukubika amano ku banensu. Nga twaishiba Abena Kristu banensu ne ndupwa shabo, tukasanga ukuti bamo balicimfya amafya ayo na ifwe tukwatako kabili ici kuti calenga na ifwe twashipikisha.

Ukulongana kulakosha bucibusa bwesu. Bamunyinefwe abo tulongana nabo fibusa fyesu abo twatemwa icine cine, te bantu fye abo twaishibana nabo patali patali. Limo tulangalila na capamo. Busuma nshi bwaba mu kucita ifyo? Ukuba na Bena Kristu banensu, kulenga twalababikako amano kabili ici cilatwafwa ukutemwana sana. Ilyo abanensu baba na mafya, tulabafwa pantu fibusa fyesu ifya cishinka. (Amapinda 17:17) Kabili ukuba nabo kulanga ukuti ‘tulabasakamana.’—1 Abena Korinti 12:25, 26.

Tulemukoselesha ukusala ifibusa ificita ukufwaya kwa kwa Lesa. Ifibusa fya musango uyu kuti mwafisanga mu cilonganino ca Nte sha kwa Yehova. Mwikaleka icili conse ukumucilikila ukulongana na ifwe.

• Mulandu nshi cawamina ukusangwa mu kulongana?

• Ni lilali mwingatemwa ukwisalongana na ifwe no kwishiba abo tulongana nabo?

Abena Kristu ba kubalilapo nga balongana, baleimba inyimbo no kupepa, e lyo balebelenga na Malembo no kulanshanyapo. Tabalebikamo intambi nangu panono. (1 Abena Korinti 14:26) Ifi fine e fyo ciba na lintu twalongana.

Ifyo tusambilila fifuma mu Baibolo kabili filatwafwa. Pa Mulungu, aba mu cilonganino cimo na cimo balalongana ku kukutika ku lyashi ilifuma mu Baibolo ilya mamineti 30. Ili ilyashi lilanda pa Malembo ayatwafwa mu mikalile yesu muli shino inshiku shayafya. Ifwe bonse balatukoselesha ukulakonkamo ilyo uulelanda ilyashi alebelenga Baibolo. Pa numa ye lyashi, kulaba Isambililo lya “Ulupungu lwa kwa Kalinda” pe awala limo. Pali ili isambililo, aba mu cilonganino bonse balakoseleshiwa ukulandapo pa cipande cili mu Ulupungu lwa kwa Kalinda ico tulesambilila. Ili isambililo lilatwafwa ukulakonka ifyo Baibolo isambilisha mu mikalile yesu. Ifilonganino ukucila 110,000 mwi sonde lyonse fisambilila ifyebo fimo fine.

Ukulongana ukutwafwa ukwishiba ifya ukusambilisha bwino. Ukulongana na kumbi ukwa mbali shitatu uko twita ukuti Ukulongana kwa Imikalile ya Bwina Kristu no Mulimo Tubomba, kubako mukati ka mulungu. Imbali sha muli uku kulongana shiba mu katabo akafuma cila mweshi ako twita ukuti Imikalile ya Bwina Kristu no Mulimo Tubomba—Akatabo ka Kubomfya pa Kulongana. Ulubali lwa kubalilapo muli uku kulongana, Icuma Icaba mu Cebo ca kwa Lesa, lulatwafwa ukwishiba ifiba mu kubelenga Baibolo ukwa cila mulungu uko aba mu cilonganino babelenga kabela ku mayanda. Mu lubali ulukonkapo, Ifyo Twingacita pa kuti Tulebila Bwino Imbila Nsuma, mulaba ifilangililo pa fyo twingalalanshanya na bantu Baibolo. Kafundisha alamona umo engatwafwa pa kuti tulebelenga bwino no kulalanda bwino amalyashi. (1 Timote 4:13) Ulubali lwa kulekeleshako, Ifyo fwe Bena Kristu Tulingile Ukulaika, lulatwafwa ukwishiba ifyo twingalakonka ifyo Baibolo isambilisha mu mikalile yesu. Muli ulu lubali mulaba no kulanshanya kwa fipusho ne fyasuko ukutwafwa ukumfwikisha ifya mu Baibolo.

Nga mwaisa mu kulongana, mukasambilila ifintu ifisuma ukufuma mu Baibolo ifyo mukatemwa.—Esaya 54:13.

• Finshi mukasambilila ku kulongana kwa Nte sha kwa Yehova?

• Kulongana nshi mwingatemwa ukusangwako pali uku twalandapo?

Bushe namumona ifyo Inte sha kwa Yehova abali pa fikope fili muli ino broshuwa bafwele bwino ilyo balelongana? Mulandu nshi tubikilako sana amano ku mifwalile ne mimonekele yesu?

Tulanga umucinshi kuli Lesa. Ca cine ukuti ico Lesa abikako sana amano, te mimonekele yesu. (1 Samwele 16:7) Na lyo line nga twalongana ku kupepa, tulafwaya sana ukulanga umucinshi kuli Lesa na ku bo tupepa nabo. Nga ca kuti mwali no kwiminina pa ntanshi ya kwa kapingula mu cilye, mufwile kuti mwafwala bwino pa kuti cimoneke ukuti namumucindika. Ne fyo tumoneka nga twaya mu kulongana filalanga ifyo twacindika “Kapingula wa pano isonde ponse,” Yehova Lesa, e lyo ne cifulo tumupepelamo.—Ukutendeka 18:25.

Imifwalile yesu ilanga ifyo twasuminamo. Baibolo ikoselesha Abena Kristu ukufwala “ifyalinga kabili ifya mucinshi,” ifilanga ukuti “balatiina Lesa.” (1 Timote 2:9, 10) Umuntu nga alefwala mataki mataki, nangu nga alefwala ifibimbula nelyo ifyabengela, ninshi tafwala “ifyalinga.” E lyo nga tulefwaya ukulafwala, “ifya mucinshi” tukalasala ifya kufwala ifisuma, te fya busanku nelyo ifyacishamo. Nangu Baibolo yatweba ifi, yalipeela cila muntu insambu sha kusala ifya kufwala ifyo alefwaya. Imifwalile ne mimonekele yesu nga isuma, kuti ‘yayemfya isambilisho lya Mupusushi wesu’ no ‘kucindika Lesa.’ (Tito 2:10; 1 Petro 2:12) Nga tulefwala bwino mu kulongana, bambi bakacindika imipepele yesu.

Te kwesha ukufilwa ukuya ku Ng’anda ya Bufumu pa mulandu fye wa fya kufwala. Te kutila mulingile ukufwala ifya mutengo nelyo ifisuma sana pa kwisa mu kulongana, icikabilwa fye, kufwala ifyalinga, ifya busaka, kabili ifilemoneka bwino.

• Mulandu nshi cacindamina ukufwala bwino ilyo tuleya mu kupepa?

• Finshi Baibolo yalandapo pa mifwalile ne mimonekele ifyo tufwile ukukonka?

Nga mulasambilila Baibolo ne Nte sha kwa Yehova, mufwile mulapitilamo libela mu fyo muli no kusambilila. Ifi fine e fyo mulingile ukulacita na lintu mushilaya mu kulongana. Mulingile ukulapitilamo calimo pa kuti muleumfwikisha ifyo mulesambilila mu kulongana. Kanshi mufwile ukutantika bwino ifya kucita pa kuti mulepekanya lyonse.

Saleni inshita ya kupekanya no kwa kupekanishisha. Ni nshita nshi mwingapekanya ifya mu kulongana ukwabula ifya kumupumfyanya? Bushe lucelo ilyo mushilatendeka imilimo, nelyo cungulo ilyo abana basendama? Nangu ca kutila te kuti mubelenge pa nshita iitali, saleni inshita ya ku kupekanya ukulongana kabili mwilaleka icili conse ukumupumfyanya. Mulebelengela ukushili icongo, kabili muleshimya fyonse ifingamupumfyanya pamo nga icilimba, TV, na foni. Ukupepa ilyo mushilatendeka ukupekanya, kukalenga muletontonkanya pa Cebo ca kwa Lesa ukucila ukubika amano ku filemusakamika.—Abena Filipi 4:6, 7.

Shileni pa fyasuko, no kuipekanya ukuya asukapo. Esheni ukumfwikisha icilelandwapo. Tontonkanyeni pa mutwe wa cipande nelyo isambililo no kumona ifyo wikatene no tumitwe tumbi utulimo. Tontonkanyeni na pa fikope filimo no kupituluka mu mepusho yalelanda pa fishinka fikalamba. Lyena belengeni paragrafu imo na imo no kufwaya icasuko ku cipusho bepwishe. Belengeni amalembo yalimo, no kutontonkanyapo pa fyo yekatene ne cishinka cili mu paragrafu. (Imilimo 17:11) Nga mwasanga apali icasuko, shilenipo pa kuti mukebukishe icasuko ilyo mukalalongana.

Nga mulepekanishisha calimo ifyo tusambilila mu kulongana cila mulungu, mukeshiba ifingi ifyaba mu Baibolo.—Mateo 13:51, 52.

• Finshi fikamwafwa ukulapekanya ifya mu kulongana?

• Kuti mwapekanya shani ukwasukapo pa kulongana?

Ukutula fye na ku kale, Yehova alafwaya indupwa shonse balekwata inshita ya kucita ifingakosha bucibusa bwabo na ena ne fingalenga baikatana. (Amalango 6:6, 7) E mulandu wine Inte sha kwa Yehova bakwatila ubushiku bumo cila mulungu ubwa mapepo ya lupwa umo balanshanya mu mutekatima ifyo ulupwa lulingile ukucita pa kukosha bucibusa bwabo na Lesa. Nangu ca kutila mwikala mweka, kuti mwabomfya iyi inshita ku kusambilila fimo muli Baibolo ifingakosha bucibusa bwenu na Lesa.

Amapepo ya lupwa yalatupalamika kuli Yehova. Baibolo itila: “Palameni kuli Lesa, na o akapalama kuli imwe.” (Yakobo 4:8) Tuleshiba Yehova bwino nga twasambilila pa fyo aba, na pa fyo acita ilyo tulebelenga Icebo cakwe. Icintu cimo icayanguka ico mwingalacita pa mapepo ya lupwa, kubelengela capamo Baibolo. Nga mulefwaya kuti mwakonka programu ya kubelenga Baibolo cila mulungu iya mu Ukulongana kwa Imikalile ya Bwina Kristu no Mulimo Tubomba. Kuti mwayakanya cila muntu mu lupwa ifikomo fya mu Baibolo ifya kubelenga, e lyo pa numa ya kubelenga mwalanshanyapo pa fyo mwasambilila.

Amapepo ya lupwa yalekatanya aba mu lupwa. Abalume na bakashi, e lyo na bafyashi na bana, balekatana nga balesambilila Baibolo capamo. Pa mapepo ya lupwa pafwile ukuba insansa no mutende, kabili bonse mu lupwa bafwile ukulaumfwa bwino iyi nshita nga yafika. Abafyashi balingile ukusala ifya kulanshanyapo ukulingana ne mishinku ya bana babo. Limo kuti balanshanya pa fipande fiba mu Ulupungu lwa kwa Kalinda na muli Loleni! nelyo ifiba pa webusaiti yesu iya jw.org. Mulelanshanyako na pa mafya abana balekwata ku sukulu na pa fyo bengacita. Nalimo kuti mwatamba programu iyo batambisha pa JW Broadcasting (tv.jw.org) e lyo pa numa mwalashanyapo. Kuti mwapituluka na mu nyimbo mukemba mu kulongana, na pa numa ya mapepo ya lupwa kuti mwalyako no twa kulya.

Amapepo ya lupwa yalalenga bonse mu lupwa ukutemwa ukusambilila Icebo ca kwa Lesa, kabili Yehova alapaala indupwa ishicita ifyo.—Amalumbo 1:1-3.

• Mulandu nshi tukwatila amapepo ya lupwa?

• Bushe abafyashi kuti bacita shani pa kuti ulupwa luleumfwa bwino ukukwata amapepo ya lupwa?

Cinshi aba bantu balemonekela aba nsansa ifi? Bali pa kulongana kukalamba. Nga filya fine abantu ba kwa Lesa ku kale babebele ukulalongana imiku itatu mu mwaka, na ifwe tulafwaisha ukulongana capamo mu mabumba ayakalamba. (Amalango 16:16) Cila mwaka tulakwata ukulongana ukukalamba kutatu. No ku, kulongana kwa muputule uko tulongana pa bushiku bumo imiku ibili mu mwaka, no kulongana kwa citungu ukwa nshiku shitatu. Bushe uku kulongana kutwafwa shani?

Kulakosha bucibusa bwesu na Bena Kristu banensu. Nga filya fine abena Israele balesekelela ilyo balelumbanya Yehova “pa kati ka mabumba ayalongene,” na ifwe tulomfwa bwino ukumupepela capamo ilyo tuli pa kulongana kukalamba. (Amalumbo 26:12; 111:1) Pa kulongana kukalamba, tulamonana no kulanshanya na ba Nte ukufuma mu filonganino fimbi na ku fyalo fimbi. Pa nshita ya kutuusha, bonse tuliila palya pene pa cifulo tulelonganina, kabili ukuba capamo pali iyi nshita, kulatuletela insansa. (Imilimo 2:42) Pa kulongana kukalamba tulamona ifyo Abena Kristu banensu batutemwa, ne ci cilenga “aba bwananyina bonse” ukwikatana.—1 Petro 2:17.

Kulatwafwa ukulakoselako mu kupepa Lesa. Ukulongana kwaleafwa abena Israele ukukosha bukapepa bwabo pantu balebalondolwela Amalembo kabili ‘baleumfwikisha.’ (Nehemia 8:8, 12) Na ifwe twalicindika ifyo tusambilila mu Baibolo pa kulongana. Ukulongana konse kulakwata umutwe uufuma mu Malembo. Amalyashi ayasuma ne filangililo ifibako pa kulongana filatwafwa ukulacita ukufwaya kwa kwa Lesa mu mikalile yesu. Tulakoseleshiwa nga twaumfwa ifyo abanensu bacita pa kuti batwalilile ne mikalile ya Bwina Kristu, icintu icishayanguka muli shino nshiku shayafya. Pa kulongana kwa citungu palaba ifilangililo umo bafwala ifyo abo Baibolo yalandapo balefwala. Ifi filangililo filenga twaumfwikisha amalyashi ya mu Baibolo, kabili tulasambililamo ifingi. Pa kulongana kukalamba konse, abalefwaya cishibikwe ukuti baliipeela kuli Lesa balabatishiwa.

• Mulandu nshi ukulongana kukalamba kutuletela insansa?

• Busuma nshi mukasanga nga mwaya ku kulongana kukalamba?

Ilyo Yesu ali mupepi no kufwa atile: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” (Mateo 24:14) Nomba bushe bali no kushimikila shani pano isonde ponse? Balingile ukukonka ifyo Yesu alecita ilyo aali pano calo.—Luka 8:1.

Tuya pa mayanda yabo. Yesu alisambilishe abasambi bakwe ukushimikila imbila nsuma ukufuma ku ng’anda ne ng’anda. (Mateo 10:11-13; Imilimo 5:42; 20:20) Balya bakabila ba mbila nsuma balibapeele ififulo fya kushimikilamo. (Mateo 10:5, 6; 2 Abena Korinti 10:13) Na muno nshiku, icilonganino cimo na cimo calikwata icifulo ca kushimikilamo. Ici cilalenga ‘tuleshimikila abantu no kushimikisha ubunte’ nga fintu Yesu atwebele.—Imilimo 10:42.

Tulashimikila abantu konse uko basangwa. Yesu aleshimikila mu fifulo umusangwa sana abantu, pamo nga ku lulamba lwa bemba na pa fishima fya cintubwingi. (Marko 4:1; Yohane 4:5-15) Nga filya Yesu alecita, na ifwe tulalanshanya na bantu ifya mu Baibolo ukuli konse uko basangwa, nampo nga ni mu misebo, mu fifulo fya makwebo, mu maparka, nelyo pa foni. Lyonse ilyo twakwata ishuko, tulashimikila ku bena mupalamano besu, na ku bo tubomba nabo, na bo tusambilila nabo ku sukulu, e lyo na kuli balupwa. Ukucita ifi kwalilenga abantu abengi isonde lyonse ukumfwa “imbila nsuma pa kupususha [kwa kwa Yehova].”—Amalumbo 96:2.

Bushe kuliko uo mwingatemwa ukwebako imbila nsuma iya Bufumu bwa kwa Lesa ne fyo bukamucitila? Mwilekapo fye, mwebeniko iyi imbila nsuma nomba line!

• Ni “mbila nsuma” nshi tufwile ukubila?

• Bushe Inte sha kwa Yehova shipashanya shani Yesu mu fyo bashimikila?

Ishiwi lya kuti “painiya” lyafuma kwi shiwi lya ciNgeleshi ilipilibula umuntu uupansa inshila pa kuti bambi bapitemo. Yesu aali nga painiya pantu atuminwe pano isonde ku kubomba umulimo uukalenga abantu ukuba no mweo wa muyayaya. (Mateo 20:28) Ifi fine e fyo na basambi bakwe muno nshiku bacita, balabomba inshita iikalamba mu mulimo wa ‘kulenga abantu ukuba abasambi.’ (Mateo 28:19, 20) Bamo ababombako uyu mulimo tubeta ati bapainiya.

Bapainiya babomba umulimo wa kushimikila uwa nshita yonse. Inte sha kwa Yehova bonse balashimikila imbila nsuma. Lelo bamo ni bapainiya ba nshita yonse. Aba, babomba ama-awala 70 cila mweshi mu mulimo wa kushimikila. Pa kuti balebomba aya ama-awala, abengi tababomba incito iibasendela inshita iikalamba. Bambi ni bapainiya baibela, abashimikila pa ma-awala 130 cila mweshi. Babombela mu fifulo umushaba sana aba kushimikila. Bapainiya tababika sana mano ku kukwata ifintu ifingi mu mikalile yabo, pantu balicetekela ukuti Yehova akulabapeela ifyo bakabila. (Mateo 6:31-33; 1 Timote 6:6-8) Abashingakwanisha ukubombako umulimo wa nshita yonse, kuti babombako bupainiya bwa kwafwilisha pa ma-awala 30 nelyo 50.

Ukutemwa Lesa na bantu e kulenga umuntu ukubombako bupainiya. Nga filya fine cali kuli Yesu, na ifwe twalimona ukuti abantu abengi balafwaya ukwishiba Lesa ne fyo akacita ku ntanshi. (Marko 6:34) Nga twabebako ifyo twasambilila, kuti fyabafwa na pali ino ine nshita, no kulenga bacetekela ifyo Lesa alaya. Ukutemwa abantu e kulenga bapainiya ukubomba inshita iikalamba no kubomfya amaka yabo mu kushimikila abantu imbila nsuma. (Mateo 22:39; 1 Abena Tesalonika 2:8) Imibombele yabo ilakosha icitetekelo no kulenga bapalama sana kuli Lesa kabili ilabafwa ukukwata sana insansa.—Imilimo 20:35.

• Bushe bapainiya ni bani?

• Cinshi cilenga bamo ukubombako bupainiya bwa nshita yonse?

Ukufuma na kale, Inte sha kwa Yehova balasambilila sana pali Lesa. Kwaliba amasukulu ayo bapangila bamunyinefwe ababa mu mulimo wa nshita yonse pa kuti ‘balebombesha umulimo wabo onse.’—2 Timote 4:5.

Isukulu lya Bapainiya. Nga papita umwaka umo ukutula apo painiya wa nshita yonse atendekele bupainiya, balamwita ukuya kwi sukulu ilibako pa nshiku 6, kabili limo ili sukulu libela pa Ng’anda ya Bufumu iyabela mupepi no ko ekala. Umulandu kwabela ili sukulu kwafwa bapainiya ukupalama kuli Yehova, ukwishiba ifya kubomfya inshila shalekanalekana isha kubombelamo umulimo wa kubila imbila nsuma, no kubafwa ukutwalilila mu mulimo wa bupainiya.

Isukulu lya Bakabila ba Mbila Nsuma ya Bufumu. Ili sukulu libako pa myeshi ibili kabili lyabelako ukukansha bapainiya abaipeelesha ukuya mu kubombela konse uko bengabatuma. Baipeelesha nga filya fine fyaipeeleshe Yesu Kristu uwabombele sana umulimo wa kubila imbila nsuma pa calo ukucila umuntu fye onse. Batila “E po ndi! Ntumeni!” (Esaya 6:8; Yohane 7:29) Pa kuti babombe bwino ku cifulo cimbi balangusha imikalile, ukusambilila intambi shimbi, ukusambilila ukwikala ku ncende uko imiceele yapusana sana no ko bafuma e lyo no kulya ifya kulya ifyo bashabelesha. Limo balasambilila no lulimi lumbi. Ili sukukulu lilafwa bamunyinefwe na bankashi abashimbe e lyo na baupana abali ne myaka 23 ukufika kuli 65, ukukwata imibele no kulamuka ifingabafwa ukuyabomba bwino uko babatuma no kubomfiwa sana mu kuteyanya kwa kwa Yehova.

Isukulu lya Baibolo Ilya Gileadi Ilya Watchtower. Mu ciHebere ishiwi lya kuti “Gileadi” lipilibula ukuti “Ubunte Ubwingi.” Ukutula apo isukulu lya Gileadi lyatendekele mu 1943, bamunyinefwe na bankashi ukucila pali 8,000 abapwisha ili sukulu balibatuma nga bamishonari pa kuti bengayashimika ubunte “ku mpela ye sonde” kabili balibomba bwino icine cine. (Imilimo 13:47) Ku ca kumwenako, ilyo bamunyinefwe abafumine ku gileadi bafikile mu Peru, tamwali icilonganino nangu cimo. Nomba pali ino nshita mu Peru mwaba ifilonganino ukucila pali 1,000. Ilyo bamishonari batendeke ukubombela mu Japan, ba Nte tabafikile na kuli 10. Nomba ino nshita ba Nte balicila pali 200,000. Pa myeshi isano iyo bamunyinefwe baba ku Gileadi balasambilila sana Icebo ca kwa Lesa. Abo beta ku Gileadi ni bamunyinefwe ababomba bupainiya bwaibela, bamishonari abashibombela pa Bethel, bakangalila ba muputule, nelyo ababomfi ba pa Bethel, pa kuti bengalalenga umulimo wa kushimikila ukubombwa bwino mwi sonde lyonse.

• Mulandu nshi kwabela Isukulu lya Bapainiya?

• Ni bani bafwile ukuya kwi Isukulu lya Bakabila ba Mbila Nsuma ya Bufumu?