• Bushe Ubufumu bwa kwa Lesa Cinshi?
    Kuti Mwaba ne Nsansa Umuyayaya!—Icitabo ca Kusambililamo Baibolo
    • Isambililo 31. Yesu Kristu Imfumu ya ku muulu ali pa ntanshi ya kwa Yehova.

      ISAMBILILO 31

      Bushe Ubufumu bwa kwa Lesa Cinshi?

      Ilyashi ilyacindama ilyo Baibo ilandapo sana Bufumu bwa kwa Lesa. Yehova akabomfya Ubufumu bwakwe pa kufikilisha ubufwayo bwakwe ubwa kulenga isonde ukuba paradaise. Bushe Ubufumu bwa kwa Lesa cinshi? Twaishiba shani ukuti ubu Ubufumu bwalitendeka ukuteka? Finshi bwacitapo? Kabili finshi bukacita ku ntanshi? Twala-asuka aya mepusho muli lino isambililo e lyo na mu masambililo yabili ayakonkelepo.

      1. Bushe Ubufumu bwa kwa Lesa cinshi, kabili nani Imfumu ya ubu Ubufumu?

      Ubufumu bwa kwa Lesa buteko ubo Yehova Lesa abikako. Imfumu ya ubu Ubufumu ni Yesu Kristu kabili atekela ku muulu. (Mateo 4:17; Yohane 18:36) Baibo ilanda pali Yesu ati: “Akaba imfumu umuyayaya.” (Luka 1:32, 33) Apo Yesu e Mfumu ya Bufumu bwa kwa Lesa, akalateka bonse abakalaikala pe sonde.

      2. Ni bani bateka na Yesu?

      Yesu tateka eka. “Abantu ukufuma mu mitundu yonse, mu ndimi, mu bantu na mu nko . . . bakaba ishamfumu ishikalateka isonde.” (Ukusokolola 5:9, 10) Ni banga bakalateka na Kristu? Ukutula apo Yesu aishiile pano isonde, abantu abengi nga nshi balisalapo ukuba abasambi bakwe. Lelo bantu fye 144,000 e bakalateka na Yesu ku muulu. (Belengeni Ukusokolola 14:1-4.) Abena Kristu bambi abashala bakalaikala pano isonde kabili bakalatekwa no bu Ubufumu.—Amalumbo 37:29.

      3. Bushe Ubufumu bwa kwa Lesa bwacila shani pa mabuteko ya bantuse?

      Nangu ca kuti bakateka abantunse kuti baesha ukucita ifintu ifisuma, tabakwata amaka ya kucita fyonse ifyo balefwaya. Kabili nalimo bakateka abengabapyana kuti baba bakaitemwe kabili nalimo te kuti balefwaya ukwafwa abantu. Lelo takwakabe uukapyana Yesu Imfumu ya Bufumu bwa kwa Lesa. Lesa alibikako “ubufumu ubushakatale abonaulwa.” (Daniele 2:44) Yesu akalateka isonde lyonse, kabili takabe na kapaatulula ilyo akalateka. Aliba no kutemwa, wa cikuuku, kabili wa mulinganya. Na kabili akalasambilisha abantu ukuba ne yi imibele.—Belengeni Esaya 11:9.

      SAMBILILENI NA FIMBI

      Moneni ico Ubufumu bwa kwa Lesa bwawamina ukucila amabuteko yonse aya bantunse.

      Yesu Kristu ali pa cipuna cakwe ica Bufumu kabili aleteka isonde. Bakateka banankwe nabekala pa fipuna fya bufumu ku numa yakwe. Ubukata bwa kwa Yehova na bubashinguluka.

      4. Ubufumu ubwakwatisha amaka e bukalateka isonde lyonse

      Yesu Kristu alikwata amaka ya kuteka ukucila kateka uuli onse. Belengeni Mateo 28:18, lyena lanshanyeni ici cipusho:

      • Bushe amaka Yesu akwata yacila shani amaka bakateka abantunse bakwata?

      Amabuteko ya bantunse yalaluka-aluka, kabili cila kateka ateka fye icalo cimo, tateka isonde lyonse. Inga Ubufumu bwa kwa Lesa bwena? Belengeni Daniele 7:14, lyena lanshanyeni aya mepusho:

      • Cinshi twingalandila ukuti cikawama sana ifi Ubufumu bwa kwa Lesa ‘bushakonaulwe’?

      • Bushe muletontonkanya ukuti tukanonkelamo shani ifi Ubufumu bwa kwa Lesa bukalateka isonde lyonse?

      5. Ubufumu bwa kwa Lesa bukafumyapo amabuteko ya bantunse

      Mulandu nshi Ubufumu bwa kwa Lesa bufwile ukufumishapo amabuteko ya bantunse? Tambeni VIDIO, lyena lanshanyeni icipusho cakonkapo.

      VIDIO: Bushe Ubufumu bwa kwa Lesa ni Cinshi?—Iyo Baipifya (1:41)

      • Finshi ficitika ifi abantunse bateka abantu banabo?

      Belengeni Lukala Milandu 8:9, lyena lanshanyeni aya mepusho:

      • Bushe mulemona ukutila kuti cawama Ubufumu bwa kwa Lesa nga bwafumyapo amabuteko ya bantunse? Cinshi mwa-asukila ifyo?

      6. Yesu na bo akalateka nabo mu Bufumu bwa kwa Lesa balitwishiba bwino

      Apo Yesu Imfumu yesu alipo umuntunse, kuti ‘atulangulukilako pali ifi tushapwililika.’ (AbaHebere 4:15) Na kabili abaume na banakashi aba cishinka 144,000 abakalateka na Yesu, Yehova abasala “ukufuma mu mitundu yonse, mu ndimi, mu bantu na mu nko.”—Ukusokolola 5:9.

      • Bushe mwaumfwa shani ifi mwaishiba ukuti Yesu na bo akalateka nabo balishiba ifyo tumfwa na mafya tukwata? Cinshi mwa-asukila ifyo?

      Abaume na banakashi abasubwa abaliko pa nshita ishalekanalekana kabili abapusana inkulilo.

      Yehova alisala abaume na banakashi ukufuma mu nko shonse ukuteka na Yesu

      7. Ubufumu bwa kwa Lesa bwalikwata amafunde ayasuma, ukucila amafunde ya mabuteko ya bantunse

      Aba mu mabuteko bapanga amafunde ayo balemona ukutila kuti yawamina abantu no kubacingilila. Ubufumu bwa kwa Lesa nabo bwalikwata amafunde ayo abo buteka bafwile ukulakonka. Belengeni 1 Abena Korinti 6:9-11, lyena lanshanyeni aya mepusho:

      • Bushe muletontonkanya ukuti mu calo mukaba shani ilyo abantunse bonse bakalakonka amafunde ya kwa Lesa?a

      • Bushe muletontonkanya ukuti caliba fye bwino ifi Yehova enekela abakalatekwa no Bufumu bwakwe ukulakonka aya mafunde? Cinshi mwa-asukila ifyo?

      • Finshi filanga ukuti no muntu uushikonka amafunde ya kwa Lesa kuti ayaluka?—Moneni icikomo 11.

      Kapokola aleiminika imyotoka pa masansa ya misebo. Abantu abamishinku iyalekanalekana baleciluka umuse.

      Aba mu buteko balapanga amafunde ayo balemona ukutila kuti yawamina abantu no kubacingilila. Ubufumu bwa kwa Lesa nabo bwalikwata amafunde ayalenga abo buteka banonkelamo no kucingililwa, kabili aya amafunde yalicila pa mafunde ayo amabuteko ya bantunse yapanga

      ABANTU BAMO BATILA: “Ubufumu bwa kwa Lesa bwaba mu mitima yesu.”

      • Kuti mwabasuka shani?

      IFYO MUSAMBILILE

      Ubufumu bwa kwa Lesa buteko bwa cine cine ubwaba ku muulu, kabili bukalateka isonde lyonse.

      Ukupitulukamo

      • Ni bani bakalateka mu Bufumu bwa kwa Lesa?

      • Bushe Ubufumu bwa kwa Lesa bwacila shani pa mabuteko yonse aya bantuse?

      • Finshi Yehova enekela abakalatekwa no Bufumu bwakwe ukulacita?

      Ifyo Mwingacita

      ISHIBILENIPO NA FIMBI

      Belengeni ifyo Yesu asambilishe pa ko Ubufumu bwa kwa Lesa bwabela.

      “Bushe Ubufumu bwa kwa Lesa Bwaba mu Mutima Wenu?” (Icipande ca pa jw.org)

      Mulandu nshi Inte sha kwa Yehova basalilapo ukuba aba cishinka ku Bufumu bwa kwa Lesa ukucila ukuba aba cishinka ku mabuteko ya bantunse?

      Baletungilila fye Ubufumu bwa kwa Lesa (1:43)

      Moneni ifyo Baibo yalanda pa bantu 144,000 abo Yehova asala ukuteka pamo na Yesu.

      “Ni Bani Baya ku Muulu?” (Icipande ca pa jw.org)

      Cinshi calengele umwanakashi uwali mu cifungo ashininkishe ukuti Lesa akafumyapo ulufyengo?

      “Ifyo Cali pa Kuti Njishibe Icalenga mu Calo Mube Ulufyengo” (Loleni!, November 2011)

      a Amafunde yamo ayalanda pa mibele iisuma iyo tulingile ukuba nayo tukayasambililapo mu cipande 3.

  • Ubufumu bwa kwa Lesa Bwalitendeka Ukuteka!
    Kuti Mwaba ne Nsansa Umuyayaya!—Icitabo ca Kusambililamo Baibolo
    • Isambililo 32. Yesu Kristu Imfumu ya Bufumu bwa muulu naikata inkonto ya cela aleteka isonde.

      ISAMBILILO 32

      Ubufumu bwa kwa Lesa Bwalitendeka Ukuteka!

      Ubufumu bwa kwa Lesa bwatendeke ukuteka ku muulu mu 1914. Muli uyu wine mwaka e mo ne nshiku sha kulekelesha shatendekele. Twaishiba shani? Twalalanda pa masesemo yamo aya mu Baibo, pa filecitika mwi sonde, e lyo na pa mibele abantu bakwata ukutula mu 1914.

      1. Finshi Baibo yasobele ukuti e fyali no kucitika?

      Ibuuku lya mu Baibo ilya kwa Daniele lilanga ukuti Ubufumu bwa kwa Lesa bwali no kutendeka ukuteka pa numa ya nshita iyo Baibo ita ukuti “inshita 7.” (Daniele 4:16, 17) Pa numa ya myaka iingi nga nshi, Yesu alandile pali iyi nshita ukuti ni “nshita ya bena fyalo,” kabili asambilishe ukuti iyi nshita yali tailapwa. (Luka 21:24) Nga fintu twalasambilila, inshita 7 shapwile mu 1914.

      2. Finshi filecitika mwi sonde, kabili mibele nshi abantu bakwata ukutula mu 1914?

      Abasambi ba kwa Yesu bamwipwishe ati: “Cinshi tukeshibilako ukuti e po muli no kuti icalo cili ku mpela?” (Mateo 24:3) Pa kwasuka ici cipusho, Yesu alilandile ifintu ifingi ifyali no kucitika nga atendeka ukuteka ku muulu nge Mfumu ya Bufumu bwa kwa Lesa. Pa fyo alandile pali inkondo, ifipowe, ne finkukuma. (Belengeni Mateo 24:7.) Na kabili Baibo yalisobele ukuti imibele ya bantu mu “nshiku sha kulekelesha” yali no kulenga ifintu ‘fya-afya nga nshi.’ (2 Timote 3:1-5) Ifi twalandapo fyatendeke ukucitika sana ukutula mu 1914.

      3. Mulandu nshi ifintu mu calo fyabipila sana ukutula apo Ubufumu bwa kwa Lesa bwatendekela ukuteka?

      Ilyo papitile fye inshita iinono ukutula apo Yesu atendekele ukuteka ku muulu mu Bufumu bwa kwa Lesa, alilwile inkondo na Satana ne fibanda fyakwe. Satana balimucimfishe. Baibo itila Satana ‘apooselwe pe sonde, na bamalaika bakwe bapooselwe pamo nankwe.’ (Ukusokolola 12:9, 10, 12) Satana aliba ne cipyu icikalamba pantu alishiba ukuti bali no kumonaula. E ico alalenga abantu balecula no kukalipwa. Kanshi ici e calenga ukuti ifintu fibipe sana mu calo! Nomba Ubufumu bwa kwa Lesa bukafumyapo aya amafya yonse.

      SAMBILILENI NA FIMBI

      Moneni icalenga twishibe ukuti Ubufumu bwa kwa Lesa bwatendeke ukuteka mu 1914, e lyo ne fyo twingacita pa kulanga ukuti twalishininkisha ukutila Ubufumu bwa kwa Lesa bwalitendeka ukuteka.

      4. Ubusesemo bwa mu Baibo bulanga ukuti Ubufumu bwa kwa Lesa bwatendeke ukuteka mu 1914

      Tambeni VIDIO.

      VIDIO: Ubufumu bwa kwa Lesa Bwatendeke Ukuteka mu 1914 (5:02)

      Lesa alilengele Imfumu Nebukadnesari iyaleteka Babiloni ukulota iciloto. Ifyo iyi imfumu yalotele ne fyo Daniele alondolwele umwalolele ici iciloto, filanga ukuti ici iciloto calelanda pa bufumu bwa kwa Nebukadnesari na pa Bufumu bwa kwa Lesa.—Belengeni Daniele 4:17.a

      Belengeni Daniele 4:20-26, lyena bomfyeni charti pa kwasuka amepusho yakonkapo:

      • (A) Finshi Nebukadnesari amwene mu ciloto?—Moneni icikomo 20 na 21.

      • (B) Cinshi cali no kucitika ku cimuti? —Moneni icikomo 23.

      • (C) Cinshi cali no kucitika “inshita 7” nga shapwa?—Moneni icikomo 26.

      Ifyo Iciloto ca kwa Nebukadnesari Icilanda pa Cimuti Citusambilisha pa Bufumu bwa kwa Lesa

      UBUSESEMO (Daniele 4:20-36)

      Ukuteka

      (A) Icimuti icikalamba

      Icimuti icikalamba .

      Ukuteka kwapwa

      (B) “Temeni icimuti,” kabili lekeni “inshita 7” shipitepo

      Icimuti nabaciputula kabili nabakakako icipaafya ca cela no mukuba.

      Ukuteka kwatendeka na kabili

      (C) “Bakamubwesesha ubufumu”

      Icimuti icikalamba .

      Mu kufikilishiwa kwa kubalilapo ukwa ubu ubusesemo . . .

      • (D) Nani e mininako icimuti? —Moneni icikomo 22.

      • (E) Ni lilali alekele ukuteka? —Belengeni Daniele 4:29-33.

      • (F) Cinshi cacitike kuli Nebukadnesari ilyo “inshita 7” shapwile? —Belengeni Daniele 4:34-36.

      UKUFIKILISHIWA KWA KUBALILAPO

      Ukuteka

      (D) Nebukadnesari, Imfumu ya Babiloni

      Imfumu Nebukadnesari naiminina cilumba cilumba.

      Ukuteka kwapwa

      (E) Pa numa ya mwaka wa 606 B.C.E., Nebukadnesari alipenene kabili alilekele ukuteka pa myaka 7

      Nebukadnesari nalala panshi alelya icani nge nama.

      Ukuteka kwatendeka na kabili

      (F) Nebukadnesari apola kabili atendeka ukuteka na kabili

      Imfumu Nebukadnesari ilelolesha ku muulu ninshi naimya na maboko.

      Mu kufikilishiwa kwalenga bubili ukwa ubu ubusesemo . . .

      • (G) Ni bani bemininako icimuti? —Belengeni 1 Imilandu 29:23.

      • (H) Ni lilali balekele ukuteka? Twaishiba shani ukuti tabaleteka ilyo Yesu ali pano isonde? —Belengeni Luka 21:24.

      • (I) Ni lilali ukuteka kwatendeke na kabili, kabili ni kwi kwali no kubela?

      UKUFIKILISHIWA KWALENGA BUBILI

      Ukuteka

      (G) Imfumu sha bena Israele ishaleimininako ukuteka kwa kwa Lesa

      Imfumu ishaleteka mu Israele nashikala pa fipuna fya Bufumu. Imyengelele naisanika pali shena.

      Ukuteka kwapwa

      (H) Umusumba wa Yerusalemu baonaula, kabili imfumu sha bena Israele shaleka ukuteka pa myaka 2,520

      Umusumba wa Yerusalemu wapya mu mwaka wa 607 B.C.E. Lyena papita imyaka, 2,520.

      Ukuteka kwatendeka na kabili

      (I) Yesu atendeka ukuteka ku muulu nge Mfumu ya Bufumu bwa kwa Lesa

      Yesu ali ku muulu aleteka isonde kabili atendeke ukuteka mu 1914 C.E. Imyengelele naisanika ukufuma kuli ena.

      Bushe inshita 7 shalepa shani?

      Ifipande fimo ifya mu Baibo filatwafwa ukumfwikisha ifipande fimbi. Ku ca kumwenako, mwi buuku lya Ukusokolola inshita shitatu na hafu shimininako inshiku 1,260. (Ukusokolola 12:6, 14) Inshita shitatu na hafu shingilamo imiku ibili mu nshita 7. Kanshi inshita 7 shimininako inshiku 2,520. Inshita shimo mu Baibo ubushiku bumo kuti bwaimininako umwaka umo. (Esekiele 4:6) Kanshi inshita 7 isho balandapo mwi buuku lya kwa Daniele myaka 2,520.

      5. Ifintu mu calo fyalyaluka ukutula mu 1914

      Tambeni VIDIO.

      VIDIO: Ifintu mu Calo Fyalyaluka Ukutula mu 1914 (1:10)

      Yesu alilandile pa fyali no kucitika nga atendeka ukuteka. Belengeni Luka 21:9-11, lyena lanshanyeni ici cipusho:

      • Ni fisa pa fyo Yesu alandile ifyo mwamona nelyo ifyo mumfwa ukuti filecitika??

      Umutumwa Paulo alilondolwele ifyo abantu bali no kuba mu nshiku sha kulekelesha. Belengeni 2 Timote 3:1-5, lyena lanshanyeni ici cipusho:

      • Mibele nshi pali iyi twabelenga iyo mwamona abantu bakwata?

      Ifikope: Ifikope ifilelanga ifyo ifintu fyaba mu calo ne mibele abantu bakwata mu nshiku shakulekelesha. 1. Umukalamba wa bashilika ali pa ntanshi kabili alebilikisha naimya na maboko. 2. Ifikuulwa nafyonaika pa numa ya cinkukuma. 3. Indeke sha bashilika. 4. Abantu abengi bale-enda ninshi nabafwala ifya kucinga pa mona na pa. 5. Ifikuulwa fibili ifikalamba ifya mu musumba wa New York filepya pa numa yakusansa kwa tupondo. 6. Umwaume alebomfya imiti babinda. 7. Umulume alepaatila umukashi wakwe kabili alefwaya ukumuma ikofi. 8. Imiti babinda iyalekanalekana no bwalwa. 9. Abanakashi babili nabafwala ifya kufwala ifya mutengo ne fya kuikobaikakobaika kabili baleikopa icikope. 10. Uulisha inyimbo ali pa ntanshi ya bantu abengi mu cikuulwa umo bangalila. 11. Uulecita ifimfulunganya alepoosa ibotolo umuli umulilo.

      6. Mulecita ifilanga ukutila mwalishininkisha ukuti Ubufumu bwa kwa Lesa bwalitendeka ukuteka

      Belengeni Mateo 24:3, 14, lyena lanshanyeni aya mepusho:

      • Mulimo nshi uwacindama uulanga ukuti Ubufumu bwa kwa Lesa bwalitendeka ukuteka?

      • Finshi mwingacita pa kuti mulebombako uyu mulimo?

      Ubufumu bwa kwa Lesa bwalitendeka ukuteka, kabili nomba line fye buli no kutendeka ukuteka isonde lyonse. Belengeni AbaHebere 10:24, 25, lyena lanshanyeni ici cipusho:

      • Finshi bonse tufwile ukucita apo ‘tulemona ukuti bulya bushiku bulepalama’?

      Ifikope: 1. Umusambi wa Baibo ali mu kulongana kwa Nte sha kwa Yehova. 2. Umusambi umo wine alebila imbila nsuma ku o aishibana nankwe.

      Finshi mwingacita nga ca kuti mwasambilila fimo ifingafwa abantu kabili ifingalenga bapusuka?

      BAMO KUTI BAIPUSHA ABATI: “Cinshi Inte sha kwa Yehova balandila sana pa mwaka wa 1914?”

      • Kuti mwabasuka shani?

      IFYO MUSAMBILILE

      Ubusesemo bwa mu Baibo e lyo ne filecitika mu calo filanga ukuti Ubufumu bwa kwa Lesa bwalitendeka ukuteka. Tulalanga ukutila twalishininkisha ukuti Ubufumu bwa kwa Lesa bwalitendeka ukuteka nga tulebila imbila nsuma no kulasangwa ku kulongana.

      Ukupitulukamo

      • Finshi fyacitike ilyo inshita 7 isho balandapo mwi buuku lya kwa Daniele shapwile?

      • Finshi fyalenga mushininkishe ukuti Ubufumu bwa kwa Lesa bwatendeke ukuteka mu 1914?

      • Kuti mwalanga shani ukuti mwalishininkisha ukutila Ubufumu bwa kwa Lesa bwalitendeka ukuteka?

      Ifyo Mwingacita

      ISHIBILENIPO NA FIMBI

      Belengeni ifyo bakalemba be lyashi lya kale e lyo na bantu bambi balanda pa fyo ifintu fya-aluka ukutula mu 1914.

      “Inshita Imibele Isuma Yapwile Ukwabula Ukwenekela” (Loleni!, July 2007)

      Belengeni ifyo ubusesemo bwaba pali Mateo 24:14 bwalengele umwaume umo ukwaluka.

      “Nalitemenwe Sana Ubwangalo bwa Baseball!” (Ulupungu lwa kwa Kalinda Na. 3 2017)

      Twaishiba shani ukuti ubusesemo bwaba muli Daniele icipandwa 4 bulanda pa Bufumu bwa kwa Lesa?

      “Ni Lilali Ubufumu bwa kwa Lesa Bwatendeke Ukuteka? (Ulubali 1)” (Ulupungu lwa kwa Kalinda, October 1, 2014)

      Finshi filanga ukuti “inshita 7” isho balandapo muli Daniele icipandwa 4 shapwile mu 1914?

      “Ni Lilali Ubufumu bwa kwa Lesa Bwatendeke Ukuteka? (Ulubali 2)” (Ulupungu lwa kwa Kalinda, November 1, 2014)

      a Moneni ifipande fibili ifya kulekeleshako ifili apaleti “Ishibilenipo na Fimbi” muli lino isambililo.

  • Ifyo Ubufumu bwa kwa Lesa Bukacita
    Kuti Mwaba ne Nsansa Umuyayaya!—Icitabo ca Kusambililamo Baibolo
    • Isambililo 33. Abantu bali mu paradaise pe sonde.

      ISAMBILILO 33

      Ifyo Ubufumu bwa kwa Lesa Bukacita

      Ubufumu bwa kwa Lesa bwalitendeka ukuteka ku muulu. Kabili nomba line buli no kuwamya ifintu pano isonde. Natulande pa fintu fimo ifisuma ifyo Ubufumu bwa kwa Lesa bukacita nga bwatendeka ukuteka isonde lyonse.

      1. Bushe Ubufumu bwa kwa Lesa bukalenga shani pano isonde pakabe umutende no mulinganya?

      Yesu Imfumu ya Bufumu bwa kwa Lesa ali no konaula abantu ababipa na mabuteko pa nkondo ya Armagedone. (Ukusokolola 16:14, 16) Pali iyi nshita, ifyo Lesa atulaya mu Baibo fikafikilishiwa. Atulaya ukuti: “Kwashala fye panono ababifi tabakabepo.” (Amalumbo 37:10) Yesu akabomfya Ubufumu bwa kwa Lesa pa kulenga pano isonde pakabe umutende no mulinganya.—Belengeni Esaya 11:4.

      2. Bushe abantu bakalaikala shani ilyo ukufwaya kwa kwa Lesa kukacitwa pano isonde?

      Ilyo Ubufumu bwa kwa Lesa bukalateka, “abalungama e bakekala mu calo, kabili bakekalamo umuyayaya.” (Amalumbo 37:29) Elenganyeni ifyo cikawama ukwikala mu calo umo bonse bakaba abalungama, abatemwana, kabili abatemwa Yehova! Takwakabe uukalalwala, kabili bonse bakalaikala umuyayaya.

      3. Finshi Ubufumu bwa kwa Lesa bukacita nga bwaonaula ababifi?

      Pa numa ya konaula ababifi, Yesu akateka imyaka 1,000. Muli iyi imyaka 1,000 Yesu na ba 144,000 abo akalateka nabo bakalenga abantu pano isonde bakabe abapwililika. Ilyo iyi imyaka ikapwa isonde likaba paradaise, kabili abantu bonse abakalaikalamo bakaba ne nsansa pa mulandu wa kuti bakalakonka amafunde ya kwa Yehova. Lyena Yesu akabwesesha Ubufumu kuli Wishi Yehova. Ishina lya kwa Yehova likacilanapo ‘ukuba ilya mushilo.’ (Mateo 6:9, 10) Pali iyi nshita, bonse bakeshiba ukuti Yehova ni Kateka umusuma kabili alibika amano ku bo ateka. Yehova akonaula Satana ne fibanda fyakwe na bonse abapondokela imitekele yakwe. (Ukusokolola 20:7-10) Ifisuma ifyo Ubufumu bwa kwa Lesa bukacita fikatwalilila ukubako umuyayaya.

      SAMBILILENI NA FIMBI

      Moneni umulandu twingacetekelela ukuti Lesa akabomfya Ubufumu bwakwe pa kufikilisha fyonse ifyo atulaya ukutucitila ku ntanshi.

      4. Ubufumu bwa kwa Lesa bukafumyapo amabuteko ya bantunse

      Baibo itila “umuntu atekela umuntu munankwe ku kumucusha.” (Lukala Milandu 8:9) Yehova akabomfya Ubufumu bwakwe pa kufumyapo ulufyengo no kulenga pano isonde pakabe umulinganya.

      Belengeni Daniele 2:44 na 2 Abena Tesalonika 1:6-8, lyena lanshanyeni aya mepusho:

      • Cinshi Yehova no Mwana wakwe Yesu bakacita ku mabuteko ya bantunse na ku bayatungilila?

      • Bushe ifyo mwasambilila pali Yehova na Yesu fyalenga shani mwacetekela ukuti bakaba no mulinganya muli fyonse ifyo bakalacita?

      Yesu Imfumu ya Bufumu bwa ku muulu aleteka isonde.

      5. Yesu ni Mfumu iisuma

      Yesu Imfumu ya Bufumu bwa kwa Lesa akacitila abantu abo akalateka ifintu ifingi. Tambeni VIDIO pa kuti mumone ifyo Yesu acita ifilanga ukuti alafwaya ukwafwa abantu, kabili akabomfya amaka Lesa amupeela pa kubafwa.

      VIDIO: Yesu Alilangile Ifyo Ubufumu Bukacita (1:13)

      Ilyo Yesu ali pano isonde, alilangile ifyo Ubufumu bwa kwa Lesa bukacita. Mapaalo nshi pali aya ayo mwingatemwa ukwisamona yafikilishiwa? Belengeni amalembo ayalelanda pa mapaalo mutemenwe.

      ILYO YESU ALI PANO ISONDE . . .

      ILYO YESU AKALATEKA ISONDE . . .

      • akalenga ukuti abantu bonse bakabe no bumi ubwapwililika.—Esaya 33:24.

      6. Ubufumu bwa kwa Lesa bukalenga ifintu ukuwama

      Ubufumu bwa kwa Lesa bukalenga abantu bakaleikala bwino nga filya fine Lesa alefwaya baleikala. Kabili bakekala umuyayaya mu paradaise pano isonde. Tambeni VIDIO pa kuti mumone ifyo Yehova abomfya Umwana wakwe Yesu pa kufikilisha ubufwayo bwakwe.

      VIDIO: Ifyo Ifintu Fikawama mu Calo Cipya (4:38)

      Belengeni Amalumbo 145:16, lyena lanshanyeni ici cipusho:

      • Bushe mwaumfwa shani ifi mwaishiba ukuti Yehova ali ‘no kupeela ica mweo conse ifyo cilefwaya’?

      ABANTU BAMO BATILA: “Nga ca kuti fwe bantu bonse twabombela pamo, kuti twapwisha amafya yonse ayaba mu calo.”

      • Mafya nshi Ubufumu bwa kwa Lesa bukafumyapo ayo amabuteko ya bantunse yafilwa ukufumyapo?

      IFYO MUSAMBILILE

      Lesa akabomfya Ubufumu bwakwe pa kufikilisha ifyo afwaya. Ubufumu bukalenga isonde likabe paradaise umukaba abantu abasuma abakalapepa Yehova umuyayaya.

      Ukupitulukamo

      • Bushe Ubufumu bwa kwa Lesa bukalenga shani ishina lyakwe ilya kuti Yehova ukuba ilya mushilo?

      • Finshi fingalenga twacetekela ukuti Ubufumu bwa kwa Lesa bukafikilisha fyonse ifyo Lesa atulaya?

      • Pa fintu fyonse ifisuma ifyo Ubufumu bwa kwa Lesa bukacita, ni cisa ico mulefwaisha ukwisamona cacitika?

      Ifyo Mwingacita

      ISHIBILENIPO NA FIMBI

      Belengeni ici icipande pa kuti mwishibe ifyo Armagedone ipilibula.

      “Bushe Inkondo ya Armagedone Cinshi?” (Icipande ca pa jw.org)

      Belengeni ifikacitika mu “bucushi ubukalamba.”—Mateo 24:21.

      “Bushe Ubucushi Bukalamba ni Cinshi?” (Icipande ca pa jw.org)

      Moneni ifyo aba mu ndupwa bengelenganya ukuti bali capamo mu paradaise.

      Elenganya Ukuti uli mu Paradaise (1:50)

      Belengeni icipande citila “Nalikwete Amepusho Ayengi Ayalencusha,” pa kuti mumone ifyo umwaume umo uwapondokele ubuteko asangile amasuko ku mepusho akwete.

      “Baibolo Ilaalula Abantu” (Ulupungu lwa kwa Kalinda, January 1, 2012)