Akayofi Kaponena Ifishi Fya Solomon Islands

Pali Cimo, pa 2 April, mu 2007, icinkukuma cikalamba catenseshe ifishi fya Solomon Islands ifyabela lwa ku kapinda ka ku kuso aka calo ca Australia. Mu nshita fye iinono, ibimbi ilikalamba ilyalepele amamita 10 ukulola mu mulu, lyapamine ifishi fyabela ku citungu ca ku masamba no kwipaya abantu 52, kabili lyaonawile na mayanda ica kuti abantu 6,000 bashele fye ukwabula umwa kwikala.

Ukufuma pa ncende icinkukuma catendekele ukufika pa cishi ca Ghizo paba fye amakilomita 45. Pali ici cishi paliba ne tauni litwa ati Gizo umo icinkukuma caonawile sana ifintu. Muli ili itauni lyaba mupepi sana na bemba, mwikala abantu 7,000. Pa bushiku icinkukuma caishile, e po Inte sha kwa Yehova mwi tauni lya Gizo baali no kukumana icungulo bushiku ku Kwibukisha imfwa ya kwa Yesu nge fyo bacita cila mwaka. (1 Abena Korinti 11:23–26) Pali bulya bushiku, akasuba kalitulile fye nga te bwino kabili pali bemba na po pali fye tondolo. Nomba ulucelo lwine ulu, ilyo inshita yafikile 7:39, icinkukuma calishile.

Ilyo Icinkukuma Capitile

Ilyo icinkukuma caishile, ba Ron Parkinson, ba eluda mu cilonganino, na bakashi babo ba Dorothy balepekanya ica kulya ca lucelo. Ba Ron batile: “Ing’anda yesu yaletenkana kwati ni filya imiti imo itenkana sana nga kuli icipuupu ca mwela, lelo tayawile. Kwali icongo sana. Amakabati, ifipuna, imbale, piano iikalamba ne fipe fimbi mu ng’anda fyonse fyaliponene pa nshi. Twalilwisha twasuka twafumina pa nse. Dorothy anyantile pa mabotolo yatobeke ninshi tafwele nsapato, kabili yalimucenene.”

Ba Tony na ba Christine Shaw, ba mishonari abaleikala mupepi, na bo bafulumukile pa nse. Ba Christine batile: “Icinkukuma calitenseshe sana umushili ica kuti naliponene nafilwa no kwima. Ibimbi likalamba lyatenwine amayanda ica kuti yonse fye yali fye mu menshi. Abantu baleoba amato no kupita pa fintu ifingi ifyale-elela pa menshi pa kuti fye bafwaye abantu abashafwile. Tapakokwele kwaishile icinkukuma na cimbi icikalamba. Cishipwa fye, pakonka na cimbi. Kabili umushili walitwalilile ukutentatenta pa nshiku 5. Ala mwandini Twalitiinine!”

Icinkukuma Caletele ne Bimbi Likalamba

Ilyo icinkukuma capitile, ba Patson Baea bali pa cishi citwa ati Sepo Hite apo baleikala. Ukufuma pali ici cishi ukufika pe tauni lya Gizo, paba amakilomita 6. Bushe cali shani kuli ba Patson no lupwa lwabo ilyo icinkukuma capitile?

Ba Patson batile: “Nabutukiile ku lulamba lwa bemba ukwali umukashi wandi Naomi na bana besu bane. Icinkukuma calibawishishe pa nshi lelo bali fye abatuntulu. Abana balekanka fye ku mwenso, bambi na bo balelila. Ine na Naomi bwangu bwangu twalibatalalike.

“Pali bemba tapali nge fyo lyonse paleba, e calengele njishibe ukutila ibimbi ilyo beta ati tsunami lyali mu kwisa napamo no kubunsha akacishi twaleikalapo. Ba bamayo, ba Evalyn, abaleikala pa ka cishi kambi akali mupepi, na bo bali mu bwafya. E ico naebele umukashi wandi na bana ukunina mu bwato bwesu ubwa injini pa kuti tuyebapususha.

“Ilyo twaendeleko fye panono, ubwato bwesu bwaishilepita pe bimbi ilikalamba pantu bemba alepoosa sana amenshi. Ilyo twafikile, twasangile bamayo amaka nayapwa ku mwenso, bali no mwenso ica kuti bafililwe no kwingila mu menshi. Umukashi wandi Naomi, na Jeremy umwana wesu umulumendo uwa myaka 15 baipoosele pali ilya bemba yalepoosa sana amenshi kabili baile apali ba mayo no kubaafwa ukowa ukufika apaali ubwato. Kabili twalibutwishe ubwato no kulalanya pali bemba.

“Iyi nshita, ninshi amenshi nayacepa, ne fimabwe fya korali ifya pali bemba, ifyashingulwike ifishi fyalemoneka. Lelo pa kashita fye akanono, amenshi ayengi yalishile no kubunsha ifishi fyonse fibili. Ing’anda twakwete iya kwikalamo abatandashi iyali mu lulamba sana lwa bemba yalyonaike icipesha amano. Amenshi yaile-ingila na mu ng’anda twaleikala no konaula ifipe fyesu ifingi. Ilyo amenshi muli bemba yabwelele umo yalepela lyonse, twaile mu ng’anda no kusendamo ama Baibolo ne fitabo fya nyimbo twaya na ku Gizo.”

Abaleikalila mu lulamba lwa bemba e bafwile sana kabili kulya e ko ne fintu ifingi fyaonaike. Ku masamba ya cishi ca Ghizo e kwaonaike sana. Ibimbi lyalepele amamita 5, lyaonawile imishi 13!

Pali bulya bwine bushiku, abantu 22 balilongene pa Ng’anda ya Bufumu iya Nte sha kwa Yehova mu Gizo, ku kwibukisha imfwa ya kwa Yesu. Icaweme ca kuti pali aba 22, tapali uwacenenwe sana muli kalya kayofi. Ba Ron abo tulandilepo kale batile: “Takwali amalaiti kabili amalampi yesu yalitobeke. Munyina Shaw uwalandile ilyashi abomfeshe fye toci. Nangu mwafiitile, twalimbile bwino inyimbo sha kutasha Yehova kabili twalesansula amashiwi.”

Abaponenwe na Kayofi Babaafwa

Ilyo iyi mbila yafikile mu musumba ukalamba uwa Honiara bwangu bwangu batumine ifyo abaponenwe na kayofi balekabila. Ilyo aba ku maofeshi ya Nte sha kwa Yehova batumine amafoni ukwali aka kayofi, balibelele ukutila, baNte abengi baali fye bwino. Batumine bamunyina bacetekelwa ku kuyafwaya Nte umbi uwaleikala akatalamukila pa cishi ca Choiseul. Basukile bamusanga ninshi ali fye bwino. Ku Gizo balitumineko ne ndalama sha kushitamo ifintu na fimbi ifyalefwaikwa mu kampampa.

Bamunyina babili abangalila umusambo bafikile mu Gizo pali Cine, baninine ndeke yabalilepo ukwima ukufuma mu Honiara. Ba Craig Tucker aba mwi bumba lyangalila amaofeshi ya Nte sha kwa Yehova batile: “Twasendele ifibokoshi ifingi umwali ifyo abantu balekabila. Ifipe fimo ifya baninine mu ndeke fyalishele pa mulandu wa kuti indeke yalifina sana, lelo twalitemenwe sana pantu ifibokoshi fyesu fyonse fye balifisendele no kufika fyafikile fye bwino. Ifipe twatwele fyali pa fipe fyabalilepo ukufika muli ilya ncende yalimo busanso. Pa numa ya nshiku shibili, twalitumine na fimbi ifyo abaponenwe no busanso balekabila. Ifi fyena fyaile no bwato.”

Ba Tony Shaw, ba Patson Baea capamo na baNte bambi aba mu Gizo baobele ubwato pa nsa shibili ukuya ku cishi ca Ranongga ku kwafwa baNte abaleikala kulya. Icinkukuma caimishe icishi ca Ranongga. Ici cishi cali amakilomita 32 mu butali, mu bufumo amakilomita 8, kabili casanseme amamita yabili ukufuma pali bemba! Ukusunkana kwa menshi ukushinguluke fishi e kwaletele ibimbi ilikalamba ilyailefika na ku fishi fimbi.

Ba Tony batile: “Bamunyinefwe balitemenwe sana pa kutumona. Bali fye bwino lelo baleikala panse pa mulandu wa kutiina icinkukuma. Ubwato bwesu e bwabalilepo ukutwala ifyo abantu bali mu bwafya balekabila kuli ilya ncende. Ilyo inshita ya kubwelelamo yafikile, twapepeele capamo na bamunyinefwe no kutasha Yehova.”

Ba Patson batile: “Ilyo papitileko inshiku, twalibweleleko ku Ranongga ku kutwala ifintu na fimbi ifyalekabilwa na ku kufwaya Nte umo no lupwa lwakwe abaleikala ku mpela ya cishi. Twasukile twabasanga, ba Matthew Itu na bana babo bane ninshi bayaikala mu kati ka mpanga. Ilyo twabasangile, balukwishe ifilamba ku nsansa pa kwishibo kuti tatwabalabileko! Icinkukuma calibonawilile ing’anda pamo na mayanda yambi ayali mu mushi baleikala. Lelo bena ico balefwaisha sana, ma Baibolo, pantu ayo bakwete yalyonaike ilyo kwali akayofi.”

Abamwene Ifyacitike Balitashishe

Abantu balimwene ukutemwa kwa bwina Kristu uko Inte sha kwa Yehova balangishe. Ba Craig Tucker batile: “Kalemba wa lyashi umo uwalesuusha abaleafwa abaponenwe akayofi, alipapile sana kabili alitemenwe pa kwishiba ukuti, mu nshiku fye ishinono pa numa ya cinkukuma, Inte sha kwa Yehova balipeele baNte banabo ifya kulya, ifya kufimba pa fipe ne fintu fye fimbi ifyo balekabila.” Ba Patson na bo batile: “Abekala pa cishi ca Ranongga balitashishe pa fyo twayangufyenye ukutwalila abantu ifyo balekabila, lelo aba bantu bali-ilishenye ukuti, icalici lyabo talyabasakamene.” Umo namayo alandile ati, “Abo mupepa na bo tabaikete na ku cani pa kwisa ku kumwafwa!”

Inte sha kwa Yehova balyafwile na bantu fye bambi. Ba Christine Shaw batile: “Ilyo twalepempula abalwele mu cipatala cabela mu Gizo, twamwene nakulu bantu na shikulu bantu abaupana abo twakumenye ilyo twaleshimikila. Bonse balicenekwe kabili bali no bulanda nga nshi. Ibimbi lya menshi lyasendele umwishikulu wabo ninshi banakulu bantu nabamwikata, kabili uyu mwana aalinwena. Bwangu bwangu twabwelele ku ng’anda ku kubasendela ifya kulya ne fya kufwala. Ala balitashishe ilyo twabapeele.”

Nangu cingati abakwata amasanso kuti bafwaya ifya kulya ne fya kufwala, ico bafwaisha sana cisansamushi ukufuma mu Cebo ca kwa Lesa, Baibolo. Ba Ron batile: “Ba shimapepo bamo aba mu macalici baletila ni Lesa e waletele bulya busanso pa kuti akande abantu pa membu shabo. Lelo twalibabelengeele muli Baibolo amashiwi ayalanga ukuti Lesa te ulenga ifyabipa ukucitika. Abengi balitutashishe pa fyo twabakoseleshe ku mashiwi ya kwa Lesa.”—2 Abena Korinti 1:3, 4; Yakobo 1:13.a

[Futunoti]

[Icikope na mamapu pe bula 13]

(Nga mulefwaya ukumona icikope na mamapu, moneni muli magazini)

Choiseul

Ghizo

Gizo

Ranongga

HONIARA

AUSTRALIA

[Icikope pe bula 15]

Ulupwa lwa ba Baea mu bwato bwa injini

[Icikope pe bula 15]

Ifyo amabimbi ya menshi yaonawile ifintu mwi tauni lya Gizo

[Icikope pe bula 15]

Iyi Ing’anda ya Bufumu iyaba mu mushi wa Lale pa cishi ca Ranongga, e yashele fye ukwabula ukubongoloka