Shino ni Nshita Shayafya
BAIBOLO yalisobele ukuti, abantu bakekala mu “nshita ishayafya.” Ilondolola iyi nshita yayafya, ukuti ni “nshiku sha kulekelesha.” (2 Timote 3:1-5; 2 Petro 3:3-7) Yesu Kristu alilandile na pali iyi ine nshita ilyo aleasuka icipusho ico abasambi bakwe bamwipwishe lintu balefwaya ukwishiba ilyo ‘icalo cali no kuba ku mpela.’ (Mateo 24:3) Bushe nomba tuleikala muli isho nshiku sha kulekelesha? Linganyeni ifyo Baibolo yasobele ku malipoti yalanda pa filecitika mu calo ifili pe samba, kabili moneni nga ca kuti fyo Baibolo yasobele filecitika.
Ifyo Baibolo yasobele: ukukansana mwi sonde lyonse—Luka 21:10; Ukusokolola 6:4.
Ifyo balandapo nomba line: Akabungwe ka Worldwatch Institute katile: “Abantu abafwile ku fintu ifyalengelwe ne nkondo ishacitike muli ba 1900, balicilile imiku itatu pa bantu bonse abafwile mu myaka ukufuma lintu Kristu afyelwe ukufika muli ba 1800.”
Ifyo Baibolo yasobele: ukucepelwa ifya kulya na malwele ukufula—Luka 21:11; Ukusokolola 6:5–8.
Ifyo balandapo nomba line: Mu 2004, akabungwe ka United Nations Food and Agriculture Organization katile abantu mupepi na 863 milioni e bashikwata ifya kulya ifyakumanina mu calo conse. Ici cilepilibula ukuti abantu 7 milioni e balundilweko ku mpendwa iyo basangile mu 2003.
Akabungwe ka Worldwatch Institute katile, abantu nalimo 1 bilioni, bekala mu ncende ishikalamo abapiina umushaba mayanda ayasuma. Abantu 2.6 bilioni e bashakwata ifimbusu ifisuma e lyo no mwa kupoosa ifisooso. Kumfwa abantu 1.1 bilioni bena, tabakwata amenshi ayasuma, aya kunwa.
Akabungwe ka World Health Organization katile, abantu 500 milioni balalwala ubulwele bwa maleria; e lyo abantu 40 milioni e bakwata ubulwele bwa HIV na AIDS. Ubulwele bwa TB na bo bwaipeye abantu 1.6 milioni mu 2005.
Ifyo Baibolo yasobele: ukonaulwa kwe sonde—Ukusokolola 11:18.
Ifyo balandapo nomba line: Magazini ya Millennium Ecosystem Assessment yatile, “Abantunse nabalenga ukuti inama ne filimwa ifingi filobe nakalya nakalya. Ifingi ifyo Lesa apanga ifilenga ukuti umuntu abe uwa mweo fileya fileloba mwi sonde lyonse.”
Icipani ca mu kabungwe ka NASA, ica Goddard Institute for Space Studies catile: “Umwela uufuma ku fintu abantu bacita no kupanga, naulenga imiceele ukulubana sana ica kuti icalo cili mu busanso.”
Ifyo Baibolo yasobele: imbila nsuma iya Bufumu bwa kwa Lesa ili no kubilwa mu calo conse—Mateo 24:14; Ukusokolola 14:6, 7.
Ifyo balandapo nomba line: Icitabo ca 2008 Yearbook of Jehovah’s Witnesses catile, mu 2007, Inte sha kwa Yehova 6,957,854 shabomfeshe ama-awala 1.4 bilioni ukushimikila abantu imbila nsuma iya Bufumu bwa kwa Lesa mu fyalo 236.
Nge fyo twamona, Baibolo yalisobele ukuti te mulandu ne fintu fyabipa fyonse ifyo tulemona, kwaliba umulandu twingacetekela ukuti ifintu fikawama ku ntanshi. Yesu alandile pa “mbila nsuma” iya Bufumu bwa kwa Lesa. Bushe Ubufumu bwa kwa Lesa cinshi? Mulandu nshi Ubufumu bwa kwa Lesa bulengela abantu ukuba ne subilo lya kuti ifintu fikawama ku ntanshi? Kabili bushe, Ubufumu bwa kwa Lesa bulemukuma shani?
[Amashiwi pe bula 5]
Baibolo yalisobele pa fintu ifilecitika muno nshiku