Sambilisheni Abana Benu

Lyonse fye Samwele Alecita Icalungama

BU SHE mulamona uko abantu bacita ifyabipa?—a Samwele alemona uko abantu balecita ifyabipa. Aleikala uko mushingenekela ukumona abantu balecita ifyabipa. Abantu balecita ifyabipa pa cifulo ca kwa Lesa, apa kupepela, mu musumba wa Shilo. Lekeni tumone ifyo cali imyaka 3,000 iyapitapo pa kuti Samwele aleikala pa cifulo ca kupepelapo.

Ilyo Samwele talafyalwa, Hana, nyina wa kwa Samwele, alefwaya sana ukukwata umwana. Bushiku bumo ilyo baile ku cifulo ca kupepelako, Hana alipepele kuli Lesa pa kuti engakwata umwana. Alepepa no mweo onse ica kuti ne milomo yaletutuma. E calengele ukuti shimapepo, Eli, atontonkanye ukuti nakolwa. Nomba ilyo aishibe ukuti kanshi te kukolwa lelo bulanda fye akwete, Eli apaalile Hana ati: “Lesa wa kwa Israele akupeele ico walomba.”—1 Samwele 1:17.

Nomba, ilyo Samwele afyelwe, Hana alitemenwe icine cine ica kuti aebele umwina mwakwe, Elkana ukuti: ‘Samwele nga asumuka fye, nkamutwala ku cifulo ca kupepelako e ko akalebombela Lesa.’ Kabili e fyo acitile! Pali iyi nshita, Samwele afwile ali ne myaka ine nangu isano.

Ilyo Eli akotele, abana bakwe abaume, Hofini na Finehasi, tabalepepa Yehova mu nshila isuma. Balecita fye no bupulumushi na banakashi abaleisa pa cifulo ca kupepelapo! Bushe cinshi muletontonkanya ukuti shibo e co alingile ukucita?— Alingile ukubafunda ukuti tabalingile ukulacita ifintu fyabipa.

Samwele alekulila pa cifulo ca kupepelapo, e lyo kabili afwile alishibe ne fyabipa ifyalecita abana ba kwa Eli. Bushe Samwele alebakonkelela ukucita ifyabipa?— Iyo, ena atwalilile fye ukucita icalungama, nga filya fine abafyashi bamusambilishe ukulacita. Kanshi te kuti tupape icalengele ukuti Yehova afulilwe Eli. Alitumine fye na kasesema uwa kuyaeba Eli ifyo ali no kukanda aba mu ng’anda yakwe, maka maka abana bakwe abaume impulumushi sha bana.—1 Samwele 2:22-36.

Samwele atwalilile fye ukulabombela pamo na Eli pa cifulo ca kupepelapo. Lyena, bushiku bumo ninshi Samwele nalaala ubushiku, aumfwile fye ishiwi lilemwita. Samwele aile kuli Eli ulubilo, lelo Eli ailekaana ukuti tacilamwita. Na kabili aumfwile ishiwi lilemwita. Nomba, ilyo cacitike umuku walenga butatu, Eli aebele Samwele ukuti nga waumfwa ishiwi na kabili wasuke utile: “Soseni mwe Yehova; pantu umubomfi wenu aleumfwa.” Ilyo Samwele alandile aya mashiwi, Yehova alyebele Samwele ifyo alefwaya ukumweba. Bushe namwishiba ifyo Yehova aebele Samwele?—

Lesa alyebele Samwele ifyo aali no kukanda aba mu ng’anda ya kwa Eli. Ilyo bwaceele, Samwele aali no mwenso wa kweba Eli ifyo Yehova alandile. Lelo Eli atampile ukupapaata Samwele ati: “Shi wimfisa.” Awe Samwele asukile aeba Eli fyonse ifyo Yehova alandile ukuti e fyo aali no kucita—nga filya fine kasesema wa kwa Lesa alandile kuli Eli. Eli na o pa kwasuka atile: “[Yehova] nacite icawama mu menso yakwe.” Mu kupita kwa nshita, Hofini na Finehasi balipaiwe, e lyo Eli na o alikonkelepo afwa.—1 Samwele 3:1-18.

Ilyo ‘Samwele alekula, Yehova aali nankwe.’ Iyi nshita nomba, Samwele afwile aali umusepela, inshita yacindama sana ku baice. Bushe muletontonkanya ukuti tacayafishe kuli Samwele ukutwalilila ukucita icalungama ilyo bambi bena balecita fye ifyabipa?— Nangu ca kutila calyafishe, Samwele atwalilile fye ukubombela Yehova ne cishinka mpaka ne mfwa.—1 Samwele 3:19-21.

Inga imwe? Bushe kuti mwapashanya Samwele, ilyo mwile mulekula? Bushe mwakulatwalilila fye ukucita icalungama? Bushe mwakulakonka ifyo Baibolo isambilisha ukubikako ne fyo abafyashi benu bamusambilisha? Nga e fyo mwakulacita, ninshi mwakulalenga Yehova na bafyashi benu ukutemwa.

[Futunoti]

Ifipusho:

○ Cinshi calengele ukuti Samwele alebombela pe tempele lya kwa Yehova?

○ Bwafya nshi ubo Samwele akwete ilyo alebombela pe tempele?

○ Ca kumwenako nshi Samwele aimikila imisepela?