Abantu Balafwaya Ukwishiba Icishinka

“Abantu balanda ifyapusanapusana pali Yesu. Nampo nga twalitetekela nelyo iyo, bonse tulepusha ukuti: ‘Bushe Yesu nani?’”—AUTHOR STAN GUTHRIE.

ABANTU abengi balafwaisha ukwishiba Yesu. Balashita sana amabuuku ayalanda pali ena kabili balitemwa sana na mafilimu umo bamulanga. Nangu caba ifi, abantu bacili balepusha amepusho ayengi pali Yesu kabili batontonkanya ifyapusanapusana pali ena.

Imyaka iinono iyapita, bakalemba wa lyashi babili baebele abantu ukwasuka icipusho ca kuti, “Bushe Yesu ali nani?” Abantu bayaswike ici cipusho ukubomfya Intaneti, kabili ifi e fyo bamo bayaswike:

● “Nalimo ali ni rabi (kasambilisha) uwali ne nkumbu isho abantu bengapashanya.”

● “Ali muntu fye lelo imikalile yakwe yalipusene sana ne ya bantu bonse.”

● “Takwaba ubushininkisho ubulanga ukuti Yesu e ko ali.”

● “Yesu ali Mwana wa kwa Lesa, uwafyelwe, ukufwa, kabili alibuukile pa kuti atulubule ku membu shesu. E po aba na ino nshita kabili akesa pano calo na kabili.”

● “Naishiba ukuti Yesu Kristu e mwana fye uwa kwa Lesa, muntunse kabili pa nshita imo ine ni lesa.”

● “Yesu taliko, amalyashi yalanda pali ena ya bwaice fye.”

Ukwabula no kutwishika, ifi abantu batontonkanya pali Yesu te kuti fibe ifya cine fyonse. Bushe kwaliba uko twingasanga amasuko yene yene ku mepusho twakwata pali Yesu? Abalemba ino magazini basumina ukuti Baibolo Cebo ca kwa Lesa, kabili e ingatweba fye icishinka pali Yesu.a—2 Timote 3:16.

Mu cipande cikonkelepo, twalalanda pa mepusho ayo abantu abengi bepusha pali Yesu ayo Baibolo ya-asuka. Yesu umwine atile “onse uumutetekela,” akapusuka. (Yohane 3:16) Tulemulomba ukubelenga icipande cikonkelepo pa kuti mumone ifyo Baibolo ya-asuka aya mepusho e lyo mwe bene mupingulepo nampo nga kuti mwatemwa ukusambilila na fimbi pali Yesu ne fyo mwingamutetekela nelyo iyo.

[Futunoti]