BUSHE KUTI MWAYASUKA IFI FIPUSHO?
Bushe ishiwi lya kuti “mutungwi” lyalola mwi?
Icikope ca kulenga ica kwa mutungwi wa ku Asiria
Ili ishiwi limo balalibomfya nga balelanda pa mwaume uo batungula. Kale sana, abaume bamo abali abasha balebatungula, iyi yali ni nshila ya kubacushishamo. Abaume bambi abo balecetekela balebatungula pa kuti balelinda abanakashi ba kwi sano abaupilwe ku mfumu. Ku ca kumwenako, Hegee na Shaashgasi abatungwilwe balesakamana abakashi na bakanakashi ba Mfumu ya bena Persia, Ahasuerusi, kabili uyu afwile ali ni Xerxes I.—Estere 2:3, 14.
Lelo te bamutungwi bonse abo Baibolo yalandapo abatungwilwe. Abasambilila sana balanda ukuti ili ishiwi lya kuti mutungwi balelibomfya na kuli bacilolo abalebombela mwi sano lya mfumu. Ifi e fyali na Ebede-meleke, uwalebombela pamo na Yeremia, kabili e fyali na mutungwi umwina Ethiopia uo bashalumbula ishina uo Filipi ashimikile. Ebede-meleke alikwete icifulo icikalamba pantu alelanshanya ne Mfumu Sidekia. (Yeremia 38:7, 8) Mutungwi umwina Ethiopia, uo bashalumbula ishina kabili uwaile “ku Yerusalemu mu kupepa Lesa,” na o bamulondolola ukuti e walesunga icuma ca kwa namfumu.—Imilimo 8:27.
Cinshi bakacema balepaatukanishisha impaanga ku mbushi?
Ilyo Yesu alelanda pa nshita ilyo akesa ku kupingula abantu, atile: “Ilyo Umwana wa muntu akesa no bucindami, . . . akapaatukanya abantu, filya kacema apaatukanya impaanga ku mbushi.” (Mateo 25:31, 32) Cinshi bakacema balepaatukanishisha impaanga ku mbushi?
Ilingi line, impaanga ne mbushi baleshicemena pamo kabili shaleliila capamo mu nshita ya kasuba. Mu nshita ya bushiku baleshibika mu macinka pa kuti baleshicingilila ku nama sha mpanga, ku bapuupu e lyo na kumpepo. (Ukutendeka 30:32, 33; 31:38-40) Impaanga ne mbushi baleshipaatukanya pantu balefwaya ukucingilila impaanga ishikota no twana twa mpaanga ku mbushi ishikali. Icitabo icitila All Things in the Bible calanda ukuti, bakacema balepaatukanya impaanga ku mbushi nga ca kuti inshita yafika “iya kushikama umukaka, iya kushibeya amasako, ne nshita ishikota shitendeka ukutamfiwa.” Kanshi Yesu alandile icilangililo pa fyo abantu alelanda nabo baishibe, pantu baleikala mu Israele, umo abantu baleteeka sana impaanga ne mbushi.