Mulelinganya Ifyo Musambilila Ku Calici Ku Fyaba Mu Baibolo

BUSHE muli Bena Kristu? Nga ca kuti muli Bena Kristu, ninshi mwaba pa bantu ukucila pa mabilioni yabili mwi sonde lyonse abatila basambi ba kwa Kristu. Na kuba, umuntu umo pa bantu batatu mwi sonde lyonse atila Mwina Kristu. Muno nshiku, kwaliba ifilonganino fya mapepo ifingi abatila Bena Kristu, lelo ifyo basuminamo fyalipusana icine cine. Nalimo na imwe ifyo mwasuminamo fyalipusana ne fyo bambi abatila Bena Kristu basuminamo. Nomba bushe calicindama ukubika amano ku fyo mwasuminamo? Ee, pantu ifyo Umwina Kristu asuminamo fifwile ukuba filya fine Baibolo isambilisha.

Abasambi ba kubalilapo aba kwa Yesu Kristu baishibikwe ukuti “Bena Kristu.” (Imilimo 11:26) Tabaleitwa amashina ayalekanalekana pantu bonse basumine muli fimo fine. Abena Kristu balekonka fyonse ifyo Yesu Kristu, uwalengele kube Abena Kristu, alebasambilisha. Bushe na imwe mwasumina ukuti ifyo musambilila ku calici mupepa e fyo na Kristu alesambilisha kabili e fyo na basambi ba kubalilapo basumiinemo? Kuti mwaishiba shani ukuti e fyo Yesu alesambilisha? Pa kwishiba nga ca kuti ifyo musambilila e fyo na Kristu alesambilisha, mulingile ukubomfya Baibolo.

Tontonkanyeni pali ici: Yesu Kristu alicindike sana Amalembo pantu alishibe ukuti Cebo ca kwa Lesa. Tatemenwe abantu abalekonka intambi shabo ukucila ukukonka ifyo Baibolo ilanda. (Marko 7:9-13) Kanshi kuti twatila abasambi ba kwa Yesu aba cishinka basumina mu fyo Baibolo isambilisha. E ico, Umwina Kristu onse alingile ukuyipusha ukuti, ‘Bushe ifyo nsambilila ku calici e fyo na Baibolo isambilisha? Pa kwasuka ici cipusho, moneni nga ca kuti ifyo musambilila ku calici mupepa e fyo na Baibolo isambilisha.

Yesu alandile ukuti nga tulefwaya ukulapepa Lesa tufwile ukulamupepela mu cine, kabili ici icine cisangwa muli Baibolo. (Yohane 4:24; 17:17) Umutumwa Paulo nao atile nga tulefwaya ukwisapusuka tufwile “ukwishiba bwino bwino icine.” (1 Timote 2:4) Kanshi calicindama ukuti ifyo twasuminamo, tafipusene ne cine icaba mu Baibolo. Mulandu nshi twalandila ifi? Pantu e lyo twingesapusuka.

IFYO TWINGESHIBA NGA CA KUTI IFYO TWASUMINAMO E FYO NA BAIBOLO ISAMBILISHA

Kuti cawama nga ca kuti mwabelenga amepusho 6 ayakonkelepo no kumona ifyo Baibolo yayasuka aya mepusho. Belengeni Amalembo ayalimo kabili tontonkanyeni na pa masuko. Lyena yipusheni amuti, ‘Bushe ifyo nsambilila ku calici e fyo na Baibolo isambilisha?’

Ifi ifipusho fyalamwafwa ukwishiba nga ca kuti ifyo mwasuminamo e fyo na Baibolo isambilisha. Bushe mulefwaya ukwishiba nga ca kuti ifyo musambilila ku calici e fyo na Baibolo isambilisha? Inte sha kwa Yehova kuti bamwafwa ukwishiba ifyo Baibolo isambilisha. Kuti mwaeba Inte sha kwa Yehova ukuti balemusambilisha nelyo kuti mwaya pa webusaiti yesu iya jw.org/bem.

1 ICIPUSHO: Bushe Lesa nani?

ICASUKO: Lesa ni Yehova, Wishi wa kwa Yesu, e Lesa wa muyayaya kabili e Kabumba wa maka yonse uwapangile fyonse.

IFYO BAIBOLO ILANDA:

“Lyonse ilyo tumupepelako, tulatootela Lesa, Wishi wa kwa Shikulwifwe Yesu Kristu.”—Abena Kolose 1:3.

“Mwalilinga, mwe Yehova, mwe Lesa wesu, ukupokelela ubukata no mucinshi na maka, pantu ni mwe mwabumbile ifintu fyonse.”—Ukusokolola 4:11.

Belengeni na Abena Roma 10:13; 1 Timote 1:17.

2 ICIPUSHO: Bushe Yesu Kristu ni nani?

ICASUKO: Yesu e beli lya kwa Lesa. Yesu e o Lesa abalilepo ukubumba. Yesu alanakila Lesa kabili alamumfwila.

IFYO BAIBOLO ILANDA:

“Tata mukalamba pali ine.”—Yohane 14:28.

“[Yesu] e cipasho ca kwa Lesa uushimoneka, e beli pa fibumbwa fyonse.”—Abena Kolose 1:15.

Belengeni na Mateo 26:39; 1 Abena Korinti 15:28.

3 ICIPUSHO: Bushe umupashi wa mushilo ni cinshi?

ICASUKO: Umupashi wa mushilo maka ayo Lesa abomfya pa kufikilisha ifyo afwaya. Te muntu iyo. Umuntu kuti akwata umupashi wa mushilo kabili kuti wamulenga akwata amaka ya kucita fimo.

IFYO BAIBOLO ILANDA:

“Ilyo Elisabete aumfwile Maria alemuposha, umwana mwi fumo lyakwe alicilwike; kabili umupashi wa mushilo waishile pali Elisabete.”—Luka 1:41.

“Mukapokelela amaka ilyo umupashi wa mushilo ukesa pali imwe.”—Imilimo 1:8.

Belengeni na Ukutendeka 1:2; Imilimo 2:1-4; 10:38.

4 ICIPUSHO: Bushe Ubufumu bwa kwa Lesa ni cinshi?

ICASUKO: Ubufumu bwa kwa Lesa buteko ubwaba ku muulu kabili Yesu e Mfumu ya ubu Bufumu. Nomba line fye Lesa ali no kubomfya ubu bufumu ukufikilisha fyonse ifyo afwaya ukucita pe sonde.

IFYO BAIBOLO ILANDA:

“Malaika uwalenga 7 alishishe ipenga lyakwe. E lyo kwaumfwikike amashiwi ayakalamba mu muulu, ayati: “Ubufumu bwa calo nomba bwaba bufumu bwa kwa Shikulwifwe no bwa kwa Kristu wakwe, kabili akateka umuyayaya.’”—Ukusokolola 11:15.

Belengeni na Daniele 2:44; Mateo 6:9, 10.

5 ICIPUSHO: Bushe abantu bonse abacita ifisuma balaya ku muulu?

ICASUKO: Awe. Bantu fye abanono aba cishinka e bo Lesa asala ukuya ku muulu, Baibolo ita aba bantu ukuti “umukuni unono.” Aba bakaba imfumu kabili bakalateka na Yesu isonde.

IFYO BAIBOLO ILANDA:

“Mwilatiina, mwe mukuni unono, pantu Shinwe afwaya ukumupeela ubufumu.”—Luka 12:32.

“Bakaba bashimapepo ba kwa Lesa kabili aba kwa Kristu, kabili bakateka pamo nankwe.”—Ukusokolola 20:6.

Belengeni Ukusokolola 14:1, 3.

6 ICIPUSHO: Bushe Lesa afwaya abantu ne sonde ukuba shani?

Ilyo Ubufumu bwa kwa Lesa bukalateka, isonde likaba paradaise kabili abantu aba cishinka bakaba no bumi ubusuma, bakaba no mutende kabili tabakalefwa.

IFYO BAIBOLO ILANDA:

“Abafuuka e bakekala mu calo, kabili bakasekelela nga nshi pantu umutende ukafula.”—Amalumbo 37:10, 11.

“Akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 21:3, 4.

Belengeni na Amalumbo 37:29; 2 Petro 3:13.