Insansa Shaba mu Kwikala Imikalile Yayanguka

BA DANIEL NA BA MIRIAM baupene mu September 2000, kabili batendeke ukwikala mu musumba wa Barcelona mu calo ca Spain. Ba Daniel batile: “Twaleikala fye ifyo abantu abengi bamona ukuti e fyo abantu balingile ukulaikala. Pa mulandu ne ncito twalebomba twalekwata indalama ishingi ica kuti twalelya ifya kulya mu fikuulwa ifisuma umo bashitishisha ifya kulya, twaleya mu kutandala ku fyalo fimbi kabili twalefwala ifya kufwala ifya mutengo. Twaleya na mu kubila imbila nsuma lyonse.” Lelo ifintu fyalyalwike.

Pa kulongana kwa citungu ukwa mu 2006 ba Daniel balitemenwe ilyashi umo kalanda aipwishe icipusho caleti: ‘Bushe tulebombesha ukuti twafwe “abaletelententelo kwipaiwa” pa kuti batendeke ukwenda mu musebo utwala ku bumi bwa muyayaya?’ (Amapi. 24:11) Ili ilyashi lyalandile sana pa kulenga abantu ukumfwa ubukombe bwa mu Baibolo ubukalenga bakapusuke. (Imil. 20:26, 27) Ba Daniel batile, “Naumfwile kwati Yehova aleeba ine.” Ilyashi lyalandile no kuti ukubombesha mu mulimo wa kubila kulalenga twaba sana ne nsansa. Ba Daniel balishibe ukuti aya mashiwi ya cine. Ba Miriam balitendeke kale bupainiya kabili balipaalilwe sana.

Ba Daniel balandile abati: “Napingwilepo ukuti ningile ukwaluka.” Kabili balyalwike. Ba Daniel balicefesheko amaawala balebomba ku ncito, balitendeke bupainiya, kabili balitontonkenye na pa nsansa isho bena na ba Miriam bali no kukwata nga baya mu kubombela uko bakabila ba mbila nsuma ya Bufumu bacepa.

PA KUBALA BALI NA MAFYA LYENA PA NUMA BALISEKELELE

Mu May 2007 ba Daniel na ba Miriam balilekele incito balebomba, kabili baile ku calo uko bailetandala pa nshita imo ica Panama. Mu cifulo baile mu kushimikila imbila nsuma ica Bocas del Toro Archipelago mwaliba ifishi ifingi ifyaba pali Bemba wa Caribbean, abantu abengi abekala pali ifi fishi baGuaymi. Ba Daniel na ba Miriam balemona kwati nga balebomfya indalama isho basungile, kuti baikala kuli ici calo pa myeshi 8.

Balebomfya ubwato ne ncinga pa kuya mu kushimikila mu fishi, kabili balebukisha umuku wa kubalilapo uo baile ne ncinga, bacofele incinga amakilomita 32 ukupita mu mpili ninshi nakukaba icine cine. Ba Daniel balinakile cikanga fye bafwe ne cipuupu. Lelo indupwa sha baGuaymi abaleikala mu nshila umo balepita balebapokelela bwino sana maka maka ilyo basambilileko amashiwi ya mu lulimi lwa ciGuaymi. Tapakokwele balitendeke ukutungulula amasambililo ya Baibolo 23.

Ilyo indalama basungile shapwile, ba Daniel na ba Miriam balilekele ukuba ne nsansa. Ba Daniel batile: “Twatendeke ukutontonkanya pa kubwelelamo ku Spain ninshi tulefwaya no kulila. Twali sana no bulanda ukusha abantu abo twalesambilisha Baibolo.” Lelo umweshi wakonkelepo, balipokelele ilyashi ilisuma sana. Ba Miriam batile: “Batwebele ukuti tutendeke ukubomba bupainya bwaibela. Ala twalitemenwe ukutwalilila ukuba muli ici cifulo twaleshimikilamo!”

ICALENGELE BABE SANA NE NSANSA

Pa mulandu no kwaluka ukwacitike mu cilonganino ca kwa Lesa mu 2015, ba Daniel na ba Miriam babebele ukuti babe bapainiya ba nshita yonse. Bushe bacitile shani? Balicetekele amashiwi yaba pa Amalumbo 37:5 ayatila: “Leka Yehova atungulule inshila yobe, kabili mutetekele, na o akabombelapo.” Balisangile incito iyali no kulenga balekwata ifyo balekabila ilyo balebomba bupainiya, kabili pali ino nshita baba mu cilonganino icabela mu citungu ca Veraguas mu calo ca Panama.

Ba Daniel balandile abati: “Ilyo tushilakuuka ukufuma mu Spain, tatwaishibe nga kuti twaikala imikalile yayanguka. Pali ino nshita twikala imikalile iyayanguka kabili tatubulisha nangu cimo.” Cinshi calenga babe sana ne nsansa? Batile: “Ukwafwa abantu abaicefya ukusambilila pali Yehova kulatuletela insansa ishingi nga nshi!”