“Twali Abacincila Kabili Twalitemenwe Sana Ukubila Ukucila Ifyo Cali Kale”

CALI ni pali Cisano ulucelo mu September 1922 ninshi nakutendeka kale ukukaba ilyo abantu 8,000 balongene mu cikuulwa. Ceyamani abilishe ukuti ukulongana nga kwatendeka, abalefwaya ukufumina pa nse kuti bafuma, lelo tababasuminishe ukwingila na kabili.

Pa numa ya kwimba inyimbo, munyinefwe Joseph F. Rutherford aile pa cisebele. Abantu abengi mwi bumba balefwaisha ukwishiba ifyalakonkapo. Pa mulandu wa kuti kwalikabile bamo baleendauka mwi bumba. Kalanda abacincishe ukuti bekale no kukutika ilyashi. Ilyo ilyashi lyatendeke, bushe kwali uwamwene insalu iyo bapombele bwino bwino kabili iyo bakobeke mu mutenge wa cikuulwa?

Munyinefwe Rutherford alandile ilyashi lyaleti: “Ubufumu bwa mu Muulu Nabupalama.” Munyinenwe alandile ilyashi nalimo pe awaala limo na hafu kabili alelanda na maka ilyo alelondolola ifyo bakasesema ba kale bali abashipa ilyo balebilisha ukwisa kwa Bufumu. Ilyo ilyashi lyali mu mupepi no kupwa, aipwishe ati, “Bushe mwalisumina ukuti Imfumu ya bukata yalitendeka ukuteka?” Abantu mwi bumba bayaswike mu kupongomoka abati: “Ee!”

Lyena munyinefwe Rutherford abilikishe ati, “Bweleleni mu kushimikila, mwe bana baume ba kwa Lesa Wapulamo! Moneni, Imfumu ileteka! Ni mwe alebomfya ku kusabankanya. E ico sabankanyeni, sabankanyeni, sabankanyeni.”

Ilyo alelanda aya amashiwi, insalu iyo bakobeke mu mutenge yatendeke ukupomboloka panono panono, kabili pali amashiwi ayaleti: “Sabankanyeni, Imfumu no Bufumu.”

Ba Ray Bopp batile, “Ibumba lyalitemenwe icine cine.” Ba Anna Gardner balandile ukuti “umutenge waletenkana pa mulandu wa kutota.” Ba Fred Twarosh balandile abati, “Abantu bonse abali pa kulongana baimine pamo.” Ba Evangelos Scouffas balandile abati, “Cali kwati kwali amaka ayatwimishe pa fipuna, kabili twalimine ne filamba fyalitengelele mu menso yesu.”

Abengi abasangilwe ku kulongana balebila imbila nsuma iya Bufumu. Lelo uku kulongana kwalilengele baba abacincila pa kubila pa Bufumu. Ba Ethel Bennecoff balandile abati Abasambi ba Baibolo ‘bali abacincila kabili balitemenwe sana ukubila ukucila ifyo bali kale.’ Ba Odessa Tuck abali ne myaka 18 pali iyi nshita, bafumine pa kulongana ninshi balefwaisha ukwasuka ubwite bwa kuti “Nani ndetuma?” balandile abati: “Nshaishibe uko bali no kuntuma nelyo umulimo bali no kumpeela. Lelo ico naishibe ca kuti nalefwaisha ukuba nga Esaya, uwatile ‘E po ndi! Ntumeni!’” (Esa. 6:8) Ba Ralph Leffler batile, “Bulya bushiku bwali e ntendekelo ya kampeni ya kusabankanya Ubufumu iyafika mu calo conse pali nomba.”

E calenga ukuti ukulongana kwa citungu ukwa mu 1922 ukwali mu musumba wa Cedar Point mu citungu ca Ohio kulumbuke sana! Ba George Gangas batile, “Kulya kulongana kwa citungu kwalengele nalafwaisha ukulasangwa ku kulongana konse ukwa citungu.” Ukulingana ne fyo abene baleibukisha, tabapushilwe ku kulongana kwa citungu nangu kumo. Ba Julia Wilcox balembele abati: “Te kuti nondolole no kulondolola ifyo ng’umfwa nga nabelenga mu mpapulo shesu pa kulongana kwaliko mu musumba wa Cedar Point mu 1922. Lyonse mfwaya ukulanda ati, ‘Natasha, mwe Yehova pa kunsuminisha ukusangwa kuli kulya kulongana.’”

Nalimo fwe bengi muno nshiku na ifwe tulebukisha ukulongana kwa citungu uko twatemenwe sana ukwalengele tube abacincila no kutemwa sana Lesa wesu ne Mfumu asala. Ilyo tutontonkanya pa fyo ukulongana kwawene, na ifwe tulanda atuti, “Natasha, mwe Yehova pa kunsuminisha ukusangwa kuli kulya kulongana.”