Balibalangile Icikuuku

BAWISHI ba ba John baishileba Inte ya kwa Yehova ilyo babatishiwe mu kupwa kwa ba 1950 mwi tauni lya mu musumba wa Gujarat, ku India. Ba John na bana banabo 5 e lyo na banyinabo bali ni ba Katolika abakamamo na menshi, e co tabatemenwe imipepele ya bashibo ba ba John.

Bushiku bumo ba John balibatumine kuli bashibo ukutwala kalata kuli cibusa wabo uo balelongana nankwe. Lelo ulucelo bulya bwine bushiku, ba John baliicenene sana ku munwe ilyo baleisula idaramu. Apo ba John balefwaya ukunakila bashibo, bapombele fye akasalu pa cilonda ninshi cilesuma no mulopa kabili baendele na makasa ukuya mu kutwala kalata.

Ilyo bafikile pa ng’anda, abakashi ba abo babatumineko, nabo abali Inte ya kwa Yehova ebapokele kalata. Nomba pa kupoka kalata, uyu nkashi amwene ukuti ba John bali ne cilonda ku munwe, e ico abebele ukuti abawamyeko icilonda. Abulile akacola umwali umuti, awamya icilonda no muti uwipaya ukutushishi e lyo akakililapo bwino bwino. Pa numa apekanishishe ba John tii iyakaba. Ilyo alecita fyonse ifi, alelanshanya na bena ifya mu Baibolo kabili ali ne cikuuku.

Pali iyi nshita ulupato ulo ba John bakwete pali ba Nte lwalitendeke ukucepa. E ico baipwishe uyu nkashi pa fintu fibili ifyo bena basuminemo lelo ifyapusene ne fyo bashibo basuminemo. Bamwipwishe pa cisambilisho ca kuti Yesu ni Lesa ne ca kuti Abena Kristu balingile ukulapepa Maria. Apo alishibe ululimi lwa ciGujarati ulo ba John balelanda, uyu nkashi abomfeshe Baibolo pa kubasuka kabili abapeele akatabo akaleti “Imbila Nsuma iyi iya Bufumu” (“This Good News of the Kingdom”).

Ilyo ba John balebelenga aka katabo baleumfwa ukuti e lyo baumfwilepo icine icaba mu Baibolo. Lyena baile kuli shimapepo wabo no kumwipusha ifipusho fimo fine ifyo baipwishe nkashi. Uyu shimapepo alibubwike mu bukali no kulasa ba John Baibolo, e lyo abasasukila ati: “Nawaluka Satana! Nanga apo Baibolo yalanda ukuti Yesu te Lesa. Nanga apo yalanda ukuti taulingile ukulapepa Maria. Nanga!” Ba John balipapile sana pa fyo shimapepo abebele ica kuti bamwebele abati, “Nshakatale nyanta ulukasa mwi calici lya katolika.” Na cine tabatalile abanyantamo!

Ba John batendeke ukusambilila Baibolo ne Nte, balisalilepo ukuba mu kupepa kwa cine kabili balitampile no kubombela Yehova. Mu kupita kwa nshita ba lupwa wabo abengi nabo balitendeke ukubombela Yehova. Ukushinta na lelo ba John balikwata umukofu ku munwe uo baicenene imyaka 60 iyapitapo. Lelo ico bebukisha sana cikuuku ico babalangile icalengele babe mu kupepa kwa cine.—2 Kor. 6:4, 6.