Ifyo Mwinganonkelamo Nga Mwaishiba Ukuti Lesa Alimubikako Amano
Lesa apanga umubili ukuti uleyundapa uwine. Nga ca kuti umuntu uwaba no bumi ubusuma aicena, “kulaba ifitendeka ukucitika mu mubili ifilenga icilonda cipole, nampo nga cikalamba nelyo cinono.” (Johns Hopkins Medicine) Umubili bwangu bwangu ulacilika umulopa pa kuti wilasuuma, no kulenga imishipa ne minofu ukwisala icilonda.
TONTONKANYENI PALI ICI: Nga ca kuti Kabumba wesu abumbile umubili ukuti uleyundapa, ninshi kuti twacetekela no kutila kuti atwafwa ukulaba ku mafya tupitamo. Baibolo itila: “Ondapa aba nkumbabulili, No kubakakila pa filonda fyabo.” (Amalumbo 147:3) Nga ca kuti mulaba no bulanda, finshi fingalenga mwacetekela ukuti Yehova akulamusansamusha pali ino nshita e lyo na ku ntanshi?
IFYO BAIBOLO ILANDA PA FYO LESA ATUTEMWA
Lesa atulaya ukuti: “Witiina, pantu ndi na iwe. Wilasakamana, pantu nine Lesa obe. Nkakukosha. Nkakwafwa.” (Esaya 41:10) Umuntu uwaishiba ukuti Yehova alimubikako amano tasakamikwa sana kabili alashipikisha nga ca kuti ali na mafya. Umutumwa Paulo alingenye ifyo kuba ukumfwa nga twaishiba ukuti Lesa alatusansamusha ku “mutende wa kwa Lesa uwacila amatontonkanyo yonse.” Lyena atile: “Muli fyonse ndi na maka pantu kuli uulenkosha.”—Abena Filipi 4:4-7, 9, 13.
Amalembo yalatwafwa ukucetekela ukuti ifyo Yehova atulaya fikacitika. Ku ca kumwenako, ilembo lya Ukusokolola 21:4, 5 lyalilanda ifyo Lesa ali no kutucitila ne co twingacetekelela ifyo atulaya. Lilanda ukuti:
“Akafuuta ifilamba fyonse” ku menso ya bantu. Na kabili Yehova akafumyapo amacushi yonse, ukubikako fye nayo abantu bamo bamona kwati yanono.
“Uwaikala pa cipuna ca bufumu” mu muulu kabili Imfumu ya Maka Yonse ikabomfya amaka yakwata ukupwisha amafya tukwata kabili ikatwafwa muli fyonse ifyo tukabila.
Yehova atweba ukuti aya amalayo ya “cishinka kabili ya cine.” Kanshi nangu cibe shani yakafikilishiwa pantu fyonse ifyo alanda filafikilishiwa.
“‘Akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.’ Kabili Uwaikala pa cipuna ca bufumu atile: ‘Moneni! Ndelenga ifintu fyonse ukuba ifipya.’ Kabili, atile: ‘Lemba, pantu aya mashiwi ya cishinka kabili ya cine.’”—Ukusokolola 21:4, 5.
Tulamona imibele ya kwa Shifwe wa mu muulu, nga twamona ifyo abumba nelyo twabelenga muli Baibolo. Nangu ca kuti ilyo tulemona ifyo abumba te kuti tumfwe uko filetweba ukuti tube ifibusa fyakwe, Baibolo yena yalilanda ukwabula no kupita mu mbali ukuti: “Palameni kuli Lesa, na o akapalama kuli imwe.” (Yakobo 4:8) Pa Imilimo 17:27 napo patila: “Taba kutali kuli ifwe umo umo.”
Ilyo mulesambilila pali Lesa, mukashininkisha ukuti “asakamana imwe.” (1 Petro 5:7) Cinshi cawamina ukucetekela ukuti Yehova alatusakamana?
Natulande pa fyo cali kuli ba Toru aba ku Japan. Banyina Bena Kristu, na lyo line ba Toru baingile mwi bumba lya fipondo ilya ku Japan ilyo beta ukuti yakuza. Balandile ukuti, “Nalemona kwati Lesa alimpatile, kabili abantu natemenwe nga bafwa naletila e nshila Lesa alenkandilamo.” Ba Toru balandile ukuti pali iyi nshita balilekele “ukumfwila umuntu uuli onse uluse.” Balandile no kuti: “Nshalefwaya ukukokola sana pa calo kabili nalefwaisha ukwipayapo umuntu uwalumbuka ukuncila pa kuti ningapanga ishina.
Na lyo line, ba Toru balyalwike ilyo ba Nte batendeke ukubasambilisha Baibolo capamo na bena mwabo ba Hannah. Ba Hannah batile: “Nalemona uko imibele ya bena mwandi yaleya ileyaluka.” Pali ino nshita ba Toru balitemwa ukulanda ukuti: “Kwaliba Lesa uwatutemwa ifwe bonse. Tafwaya umuntu uuli onse ukufwa, kabili alabelela uluse umuntu nga alapila. Alomfwa na lintu twamweba ifyo tushingebako umuntu uuli onse, nelyo ifyo umuntu nangu umo ashingomfwa. Nomba line fye, Yehova akafumyapo amafya yonse, ukucula e lyo no bulanda. Na pali ino ine inshita alatwafwa na mu nshila tushileenekela. Alitutemwa kabili alatwafwa nga ca kuti tuli no bulanda.”—Amalumbo 136:23.
Nga fintu cali kuli ba Toru, ukwishiba ukutila Lesa kuti apwisha amafya yonse no kuti nomba line fye ali no kuyapwisha, kulalenga twakwata isubilo lya kuti ifintu fili no kuwama kabili kulalenga twaba ne nsansa na pali ino nshita. Kanshi nangu ca kuti mu calo mwaliba sana amafya, kuti mwanonkelamo nga mwaishiba ukuti Lesa alimubikako sana amano.