Ifyo Mwingakosha Bucibusa Bwenu na Yehova na Kabili

CILA mwaka abantu abengi abatamfiwa balabwela mu cilonganino. Elenganyeni ifyo kuba “ukusekelela mu muulu” nga ca kuti aba bantu babwela! (Luka 15:7, 10) Nga ca kuti e lyo mwabweshiwe, muleibukisha ukuti Yesu, bamalaika na Yehova balitemwa ifi mwabwela mu cilonganino. Na lyo line, ilyo mulekosha bucibusa bwenu na Yehova na kabili nalimo kuti mwakwata amafya. Mafya nshi ayo yene kabili finshi mwingacita pa kuti muyapwishe?

MAFYA NSHI MWINGAKWATA?

Bamunyinefwe na bankashi abengi balatwalilila ukumfwa ububi pa numa ya kubweshiwa. Ifi fine e fyacitikile ne Mfumu Davidi. Na lintu Yehova amubelele uluse pa membu acitile, atile: “Ifya bupulumushi fyafina ukuncila.” (Amalu. 40:12; 65:3) Abantu bamo nangu ca kutila balibweshiwa balatwalilila ukumfwa ububi nangu ukumfwa insoni pa fyo bacitile. Ba Isabelle,a abatamfiwe ukucila pa myaka 20 batile, “Calinkosele sana ukusumina ukuti Yehova alimbelele uluse.” Nga ca kuti mwanenuka, bucibusa bwenu na Yehova kuti bwapwa na kabili. (Amapi. 24:10) Mwikaleka ica musango uyu ukumucitikila.

Bamo balasakamana ukuti te kuti bakumanishe ukucita fyonse ifikabilwa pa kukosha bucibusa bwabo na Yehova na kabili. Ilyo ba Antoine babweshiwe, batile: “Naleumfwa kwati nalilaba fyonse ifyo nalecita ilyo nshilatamfiwa.” Abengi abomfwa ifi balafilwa ukucita ifingalenga bakosha bucibusa bwabo na Yehova.

Natulangilile, tutile umuntu ing’anda yakwe yaonaulwa ku cikuuku ca mwela icikalamba. Nakalimo kuti asakamana sana pa nshita e lyo na pa fyo akabombesha pa kuti akaikuule cipya cipya. Ifi fine e fyo caba na ku muntu uwabweshiwa. Nga ca kuti bucibusa bwenu na Yehova bwalipwile pa mulandu wa kuti mwalicitile ulubembu ulukalamba, nalimo kuti mwalasakamana sana ukuti mulekabila ukubombesha pa kuti mube icibusa ca kwa Yehova na kabili. Muleibukisha kuti Yehova alafwaisha ukumwafwa.

Yehova atweba ukuti: “Iseni, lekeni tulanshanye kabili nalamwafwa ukuwamya bucibusa bwenu na ine.” (Esa. 1:18) Mwalibombesha sana ifi ‘mwawamya bucibusa bwenu’ na Yehova. Yehova alitemwa sana pali ifi mwacita. Ifi mwabwela kuli Yehova mwalilenga ashinina Satana ukuti wa bufi.—Amapi. 27:11.

Ifi mwabwelela kuli Yehova mwalipalama sana kuli ena kabili na o alaya ukuti akapalama kuli imwe. (Yako. 4:8) Abengi balitemwa ifi mwabwela mu cilonganino ca kwa Yehova na kabili. Na lyo line kuli ifingi ifyo mulekabila ukucita, mufwile ukutwalilila ukulatemenwako Shinwe kabili Cibusa wenu Yehova. Finshi mwingacita pa kuti mutwalilile ukumutemwa?

MULEPANGA UKUCITAKO FIMO IFYO MWINGAFIKILISHA

Mulepanga ukucita ifyo mwingakumanisha. Nalimo mucili tamwalaba amasambililo ya kutendekelapo aya mu Baibolo. Mulebukisha ifyo mwasambilile pali Yehova na pa fyo atulaya. Nomba pali ino nshita, mufwile ukulacita ifyo mwalecita kale pamo nga ukulabila imbila nsuma lyonse, ukulalongana e lyo no kuba pamo na Bena Kristu banenu. Lekeni tulandeko pali fimo ifyo mwingacita.

Mulepepa kuli Yehova lyonse. Shinwe Yehova alishiba ukuti nga mwatwalilila ukuipeela imilandu pa fyo mwalufyenye kuti camukosela ukulapepa kuli ena. (Rom. 8:26) Nangu cibe ifyo ‘muleba no mute wa kupepa,’ mule-eba Yehova ifyo mufwaisha ukuti abe cibusa wenu. (Rom. 12:12) Ba Andrej batile: “Naleumfwa sana uwa mulandu kabili naleumfwa insoni sha kupepa. Lelo nga napepa naleumfwako bwino kabili naleleka no kusakamana.” Nga tamwishibe ifya kupepelapo, kuti mwabelenga amapepo ayo Imfumu Davidi yapepele pa numa ya kulapila ayalembwa mwi buuku lya Amalumbo 51 na 65.

Muleisambilisha Baibolo lyonse. Ukuisambilisha Baibolo kukalenga mukabe ne citetekelo icakosa kabili kukalenga ukutemwa mwatemwa Yehova ukukulilako. (Amalu. 19:7-11) Ba Felipe batile: “Pa mulandu wa kuti nshalebelenga Baibolo no kuisambilisha lyonse, calengele ukuti ndufyanye kabili nalikalifye Yehova. Nshalefwaya ukukalifya Yehova na kabili e co napingwilepo ukuti nkalaisambilisha Baibolo lyonse.” Na imwe ifi fine e fyo mwingacita. Nga mulefwaya ukusala amalyashi ayo mwingaisambilisha ayengamwafwa, kuti mwaipusha cibusa wenu umukalamba mu fya kwa Lesa.

Mulekosha bucibusa Bwenu na Bena Kristu banenu. Bamo ababwela mu cilonganino balasakamana ukuti nalimo aba mu cilonganino balibafulilwa. Ba Larissa batile: “Naleumfwa sana insoni. Naleumfwa kwati nalikalifye no kuseebanya aba bwananyina kabili natwalilile ukulaumfwa ifi pa nshita ntali.” Muleibukisha ukuti baeluda na Bena Kristu banenu balafwaisha ukumwafwa ilyo mulekosha bucibusa bwenu na Yehova. (Moneni akabokoshi akaleti “Bushe Baeluda Kuti Ba-afwa Shani Uwabweshiwa?”) Balitemwa ukuti mwalibwela mu cilonganino kabili balafwaisha ukuti mutwalilile ukuba ne nsansa!—Amapi. 17:17.

Finshi mwingacita pa kuti mupalame ku ba mu cilonganino? Mulecitako ifyo aba bwananyina bacita, e kutila, ukulalongana lyonse no kulabombako umulimo wa kubila imbila nsuma. Bushe ukucita ifi kuti kwamwafwa shani? Ba Felix batile: “Aba mu cilonganino balefwaisha ukuti nkabweshiwe. Nalimwene ukuti kanshi balintemwa. Aba mu cilonganino balilengele nalaumfwa ukuti na ine naba mu lupwa lumo lwine na bena no kuti Yehova alimbelele uluse kabili kuti natwalilila ukumubombela.—Moneni akabokoshi akaleti “Finshi Mwingacita pa Kukosha Bucibusa Bwenu na Yehova na Kabili?”

TE KWESHA UKUNENUKA!

Satana akatwalilila ukumuletela amafya ayaba kwati cikuuku ca mwela icikalamba pa kuti amunashe ilyo mule-esha ukukosha bucibusa bwenu na Yehova. (Luka 4:13) Kanshi muleiteyanya lyonse, ilyo muletwalilila ukukosha bucibusa bwenu na Yehova.

Yehova alaya abantu bakwe ababa nge mpaanga ukuti: “Iyaluba nkaifwaya, ne yauluba nkaibwesha, ne yafunika nkaikaka ne yanakuka nkaikosha.” (Esek. 34:16) Yehova alyafwa abantu abengi ukukosha bucibusa bwabo na ena na kabili. Kanshi mwilatwishika ukuti alafwaisha ukumwafwa ukuti mukoshe bucibusa bwenu na ena na kabili.

Bushe Baeluda Kuti Ba-afwa Shani Uwabweshiwa?

Fingi ifyo baeluda bengacita pa kwafwa kasabankanya uwabweshiwa pa kuti akoshe bucibusa bwakwe na Yehova na kabili. Natulandeko pali fimo ifyo bengacita.

Mulebakoselesha. Umutumwa Paulo alishibe ukuti limo umuntu uwabweshiwa kuti “afwa ku cikonko.” (2 Kor. 2:7) Inshita ishingi kuti alaumfwa sana nsoni kabili kuti afuupuka. Paulo aebele aba mu cilonganino ukuti: “Mumubelele fye uluse no kumusansamusha.” Ababweshiwa balakabila sana ukubakoselesha pa kuti beshibe Yehova e lyo na Bena Kristu banabo balibatemwa sana. Nga ca kuti baeluda balebatasha lyonse no kulabafwa mu fyo balekabila cikalenga bekanenuka.

Mulepepela pamo nabo. “Ilyo umulungami apepa ipepo lya kupapaata, ipepo lyakwe lilaba na maka ayengi.” (Yako. 5:16) Ba Larissa abo tulandilepo muli cino cipande batile: “Nale-eba baeluda ifyo naleumfwa ne fyalensakamika. Balepepa pamo na ine kabili balempepelako. Ici calengele naishiba ukuti baeluda tabamfulilwa. Balefwaisha ukungafwa ukuba cibusa wa kwa Yehova na kabili.” Ba Theo batile: “Amapepo ayo baeluda balepepa yalelenga naishiba ukuti Yehova alintemwa icine icine kabili amona fye ifisuma muli ine.

Muleba ifibusa fyabo. Ababweshiwa balakabila ifibusa mu cilonganino. Ba Justin baeluda batile: “Mulebomba nabo umulimo wa kubila imbila nsuma kabili mulebatandalila. Calicindama sana ukuba ifibusa nabo!” Ba Henry baeluda nabo batile: “Nga ca kuti baeluda balepanga ifibusa na babweshiwa cikalenga na ba mu cilonganino nabo ukulafwaya ukuba ifibusa fyabo.”

Mulebafwa ukulaisambilisha. Cibusa umukalamba mu fya kwa Lesa kuti aafwa kasabankanya uwabweshiwa ukutendeka ukulaisambilisha lyonse na kabili. Ba Darko baeluda batile: “Nalitemwa sana ukwebako bambi ifisuma ifyo nasangile ilyo naleisambilisha Baibolo e lyo no kubebako ifyo natemwa ukuisambilisha Baibolo. Kabili limo ndapekanya ukubelengela pamo na babweshiwa icipande icingabakoselesha.” Baeluda bambi ba Clayton nabo batile: “Ndabakoselesha ukufwaya amalyashi ya mu Baibolo ayalanda pa bantu abakwete amafya nga yo balepitamo no kuti ilyo balebelenga aya malyashi balemona ifyo bengasambililako.”

Muleba bakacema basuma. Ababweshiwa balimwene ifyo baeluda babombele nga bakapingula. Nomba pali ino nshita ilyo babweshiwa, bafwile ukumona baeluda ukuti ni bakacema basuma. (Yer. 23:4) Muleba aba-anguka ukumfwa ku fyo balelanda kabili mulebatasha. Mulelanda nabo lyonse. Natumfwe ifyo ba Marcus bacita nga baya ku cipempu ca bucemi, batile: “Tulabelenga nabo ilembo lya kubakoselesha, tulabeba ukuti twalibatemwa kabili tulabatasha pa fyo babombeshe pa kuti babwelele kuli Yehova. Tulabeba no kuti Yehova nao alitemwa ifi babwela. Nga twapwa ukulanshanya tulabeba ubushiku bumbi ubo tukabwelelako na kabili.”

a Amashina yamo muli cino cipande nabayalula.