Bushe Namuipekanya “Ukupyana Isonde”?
TULAFWAISHA ukumona ilyo amashiwi ya kwa Yesu yakafikilishiwa aya kuti: “Balipaalwa abafuuka, pantu bakapyana isonde.” (Mat. 5:5) Abasubwa bakapyana isonde ilyo bakaba ishamfumu ku muulu pamo na Yesu. (Ukus. 5:10; 20:6) Abena Kristu abengi muno nshiku basubila ukwikala umuyayaya pano isonde. Bali no kuba abapwililika, bakaba ne nsansa, kabili bakalaikala umutende. Nomba pa kuti ifi fyonse fikacitike, bakakabila ukubombesha. Natulandeko pa milimo itatu iyo bakabomba: ukulenga isonde ukuba paradaise, ukufwaila abakabuuka fyonse ifyo bakalakabila, e lyo no kubasambilisha. Tontonkanyeni pa fyo mwingacita pali ino nshita pa kuti mukabombeko iyi milimo yonse mu calo cipya.
BUSHE NAMUIPEKANYA UKULENGA ISONDE UKUBA PARADAISE?
Ilyo Yehova aebele abantu ukuti “kumaneni pe sonde no kulimapo,” alangile ukuti alefwaya isonde lyonse ukuba paradaise. (Ukute. 1:28) Abakekala pe sonde umuyayaya bali no kukonka ili funde. Isonde talyakabe paradaise apo pene fye, pantu ibala lya Edeni talyabako. Pa numa fye ya Armagedone, kukaba umulimo wa kuwamya ifintu ifyo baonaula pali ino nshita. Uyu ukaba mulimo uukalamba sana!
Ici cilenga twaibukisha umulimo abena Israele bakwete ilyo babwelele fye ukufuma muli bunkole ku Babiloni. Tapali abaikele mu calo yabo pa myaka 70. Lelo Esaya asobele ukuti Yehova ali no kubafwa ukuwamya icalo cabo pa kuti cibe icisuma na kabili. Esaya aseseme ukuti: “Akalenga amatololo yakwe ukuba nga Edene ne ciswebebe cakwe nge bala lya kwa Yehova.” (Esa. 51:3) Abena Israele balikumanishe ukuwamya icalo cabo. Na bakaba mu calo cipya, Yehova ali no kubafwa ukuwamya isonde. Na pali ino ine nshita kuti mwalanga ukuti mulefwaya ukubombako umulimo wa kuwamya isonde.
Kuti mwalanga ukuti mulafwaya ukubombako uyu mulimo nga mulesunga amayanda yenu e lyo na apo mwikala apa busaka. Mufwile ukulawanya ing’anda yenu no lubansa nangu ca kuti abena mupalamo benu tabawamya. Na kabili kuti mulewamyako ing’anda yenu iya Bufumu, e lyo na po mulonganina ukulongana kukalamba. Nga kuti mwakumanisha, kuti mwalemba formu ukulomba ukuti muleafwilisha abaponenwe na masanso ayakalamba. Nga mwacita ifi, muli no kulanga ukuti mulafwaisha ukwafwa bamunyinefwe na bankashi. Tontonkanyeni pali ici cipusho, ‘Bushe kuti nasambililako ifya kubomba imilimo imo iyo ningabomfya mu calo cipya?’
BUSHE NAMUIPEKANYA UKULAFWAILA ABAKABUUKA IFYO BAKALAKABILA
Ilyo Yesu abuushishe umwana wa kwa Yairo, atile bamupeele ifya kulya. (Marko 5:42, 43) Tacashupile ukusakamana ulya mukashana uwali fye ne myaka 12. Nomba tontonkanyeni pa fyo umulimo ukakula ilyo Yesu akafikilisha ifyo alaya ukuti “bonse ababa mu nshiishi bakebukishiwa.” (Yoh. 5:28, 29) Nangu ca kuti Baibolo tayalandapo ifingi, kuti twaelenganya ukuti abakabuuka bakakabila ifya kulya, umwa kwikala, e lyo ne fya kufwala. Kuti mwalanga na muno nshiku mwine ukuti mulafwaya ukwafwa aba bwananyina. Moneni fimo ifyo mwingacita.
Finshi mufwile ukulacita pali ino nshita pa kulanga ukuti mulafwaya ukupyana isonde?
Nga babilisha ukuti kangalila wa muputule aletandalila icilonganino cenu, kuti mwalembesha ukumwipikilako ifya kulya. Nga ca kuti abaalebombela pa Bethel babatuma ukwisa mu kubombela ku ncende mwaba, nelyo kangalila wa muputule aleka ukubomba umulimo wa kutandalila ifilonganino, kuti mwabafwako ukusanga umwa kwikala. Nga ca kutila ku ncende mwikala kukaba ukulongana kwa citungu nelyo ukulongana kwa citungu ukwaibela, kuti mwaitemenwa ukubombako ilyo kushilaba ukulongana nelyo pa numa ya kulongana. Na kabili kuti mwaitemenwa ukubombako umulimo wa kupokelela abaleisa ku kulongana.
BUSHE NAMUIPEKANYA UKWISASAMBILISHA ABAKABUUKA?
Amashiwi yaba pa Imilimo 24:15, yalanga ukuti abantu abakabuuka bakaba abengi nga nshi. Abengi pali aba abakabuuka tabaishibe Yehova ilyo bashilafwa. Ilyo bakabuuka, bakakwata ishuko lya kusambilila pali Yehova.a Ababomfi ba kwa Lesa aba cishinka e bakabomba umulimo wa kubasambilisha. (Esa. 11:9) Ba Charlotte, abaabomba umulimo wa kubila imbila nsuma ku Europe, ku South America, na ku Africa balafwaya sana ukwisasambilisha abakabuuka. Batile: “Ndafwaisha ukwisasambilisha abakabuuka. Nga nabelenga pa lyashi lya muntu uwafwile kale, ilingi ntontonkanya nati: ‘Nga caliweme sana uyu muntu asambilila pali Yehova, ifintu nga fyalimuwamine icine cine.’ Ndefwaya ukwisabasambilisha pali Yehova ne fyo ifintu fikawama nga balamubombela.”
Na babomfi ba cishinka aba kwa Yehova abaliko ilyo Yesu talaisa pano calo bakakabila ukusambilila ifintu ifingi. Elenganyeni ifyo tukaba ne nsansa ukulondolwela Daniele, ifyo amasesemo alembele ayo ashaishibe umo yalolele yafikilishiwe. (Dan. 12:8) Nelyo kuti mwaelenganya ifyo cikaba ukusambilisha Ruti na Naomi ukuti mu lupwa lwabo e mwafumine Mesia! Ala tukatemwa icine cine ukusambilisha abantu mwi sonde lyonse, kabili ilyo tukalabomba uyu mulimo ninshi mwi sonde tamuli ifya kutupumbula ifyaba muli cino calo cabipa.
Finshi mufwile ukulacita pali ino nshita pa kuti muipekanye ukwisasambilisha abantu abakabuuka? Cimo ico mufwile ukulacita, kwishiba ukusambilisha bwino e lyo no kulabila lyonse imbila nsuma. (Mat. 24:14) Nangu ca kutila pali ino nshita te kuti mulebila sana imbila nsuma pantu namukula, nelyo pa milandu fye imbi, kuti mwalanga ukuti mulafwaisha ukwisabombako uyu mulimo nga ca kuti pali ino nshita mulebomba apapelele amaka yenu.
Cisuma ukutontonkanya pali aya mepusho yacindama: Bushe mulefwaisha ukupyana isonde? Bushe mulefwaisha ukwisawamya isonde pa kuti likabe Paradaise, ukusakamana abakabuuka no kubasambilisha? Kuti mwalanga ukuti mulefwaya ukwisaikala umuyayaya nga ca kutila pali ino nshita mulebombako imilimo mukalabomba ilyo mukapyana isonde.
a Moneni icipande citila ‘Ukuleta Abengi ku Bulungami’ mu Ulupungu lwa kwa Kalinda ulwa September 2022.