Ifyacitike

Mulelanga Uluse ku Bantu Bonse

Kasuba kamo, nkashi umo ku New Zealand alitambile vidio pa jw.org iyalelanda pa fyo Yehova aba no luse e lyo ne fyo alanga ukuti wa luse. (Esa. 63:​7-9) Alefwaya ukucita sana ifyo asambilile muli vidio. Bulya bwine bushiku ninshi aleshita fimo, amwene umwanakashi uushakwete kwa kwikala, e ico alipwishe ulya mwanakashi nga kuti amushitilako ifya kulya. Ulya mwanakashi alisumine. Ilyo uyu nkashi aleteele uyu mwanakashi ifya kulya, alilanshenye nankwe ukubomfya trakiti itila Bushe Ukucula Kukatala Akupwa?

Ulya mwanakashi alitendeke ukulila. Alondolwelele uyu nkashi ukutila, ali ni Nte lelo palipitile imyaka iingi sana apo alekele ukulongana. Pali ino inshita uyu mwanakashi alapepa ukuti akabwelele kuli Yehova. Nkashi yesu alipeele uyu mwanakashi Baibo kabili alisumine ukutendeka ukusambilila Baibo.a

Kuti twapashanya ifyo Yehova aba no luse ku bantu nga tulelanga uluse kuli balupwa lwesu e lyo na ba bwananyina mu cilonganino. Kabili kuti twalanga ukuti tuli ba luse nga tulebila imbila nsuma.