Icalo ca Sierra Leone ne ca Guinea
NALIMO pa myaka 500 iyapitapo, mupepi na apo Umumana wa Sierra Leone waita muli bemba, pamenene akamuti akanono akaba kwati museshi, akabalwile. Ilyo papitile imyaka 300 aka ka muti kalilepele icine cine, na bantu abalepita balesefya balekamona. Abaleikata abantu ubusha basendele abantu 150,000 abaume na banakashi na bana kabili babatwele ku fyalo fimbi uko baleshitishisha abasha.
Icimuti icimoneka kwati museshi ica mu musumba wa Freetown
Pa 11 March, 1792, abasha abengi abalubwike ukufuma ku America balilongene mwi samba lya ici cimuti ku kusefya ukulubuka kwa kubwelelamo ku Africa. Pali bulya bushiku balisangile incende apa kwikala iyo batemenwe sana kabili baiinike ukuti Freetown. Abasha abalelubuka batwalilile ukuya kuli iyi ncende mpaka muli uyu umusumba mwaba imishobo ya bena Africa abalekanalekana ukucila pali 100. Aba bantu abaishiletampa ukwikala muli iyi ncende balicindike sana ici cimuti kabili baleciita ukuti icishibilo ca buntungwa ne subilo.
Mupepi ne myaka 100, Inte sha kwa Yehova mu Sierra Leone balasansamusha abantu ilyo balebebako pe subilo line line ilya ‘kulubuka ku busha bwa kubola no kuba abana ba kwa Lesa.’ (Rom. 8:21) Ubuntungwa ubo balandapo, bwa kulubuka ku busha bwa lubembu ne mfwa ilyo Ubufumu bwa kwa Lesa ubo Yesu aba e Mfumu, bukaleta umutende pe sonde na paradise.—Esa. 9:6, 7; 11:6-9.
Pa myaka 50 iyapitapo, iofeshi likalamba ilya Nte sha kwa Yehova mu Sierra Leone lilangalila umulimo wa kushimikila mu calo ca Guinea. Mu calo ca Guinea mwaliba sana amafya ya fya mapolitiki, imikalile no kubongoloka kwa bunonshi bwa calo. Fyonse ifi fyalilenga abantu abengi ukutemwa ilyashi ilisuma ilyaba mu Baibolo.
Inte sha kwa Yehova mu Sierra Leone na mu Guinea nangu bakwate amafya ayengi sana, balatwalilila ukubila imbila nsuma. Amafya yamo ayo bakwata kucula mu fintu pamo nga, ubupiina ubwacilamo, ukukanasambilila, ukukonka sana intambi, ukukanaumfwana kwa mitundu, e lyo no lukakaala lwabipisha. Ilyashi lyalakonkapo lyalalangilila ifyo ababomfi ba kwa Yehova abacishinka baba ne citetekelo icakosa kabili abaipeelesha. Tatuletwishika ukuti ilyashi pali aba bamunyinefwe likamufika pa mutima kabili likakosha ne citetekelo cenu muli “Lesa uumupeela isubilo.”—Rom. 15:13.