1991-2001 “Ilungu lya Mulilo ilya Bucushi”—Esa.48:10 (Ulubali 1)

Inkondo ya Bana Calo

Muli ba 1980, amafya ya mikalile, amapolitiki ne fya bunonshi yalilengele kube icimfulunganya mu fyalo fya ku West Africa. Ilyo kwali inkondo mu calo ca mu bwina mupalamano ica Liberia, abengi bafulumukiile ku Sierra Leone. Iofeshi lya musambo lyafwaile Amayanda ya Bufumu na mayanda yambi umwa kuti ba Nte abalefulumuka inkondo baleikala kabili ababwananyina e balebatangata.

Nangu ca kuti ifintu fyalyafishe kuli bamunyinefwe imbutushi, kwalebako no tuntu tumo utwalebasekesha. Ba Isolde Lorenz, ababombele bumishonari pa myaka iingi batile: “Akaice kamo akalumendo balikatumine kuli bawishi ukuyakafya ifya kulya pa mulilo uwali ku numa ya Ng’anda ya Bufumu, iyabelele pa musambo. Ilyo akalumendo kabwelele, kaebele bawishi ukuti lelo tatwalye. Bawishi balikepwishe abati cinshi tatwaliile? Kayaswike akati: ‘Pantu lelo, Yehova ampususha ku nkalamo!’ Cinshi calengele kalande ifi? Ilyo kalebwela nakasenda ifya kulya, kakumene ne cibwa icikulu, ica pa musambo, ica mutundu wa Germany Shepherd ico bainike ukuti Lobo. Kwena ici icibwa tacalesuma, lelo aka kaice kalekanka fye ku mwenso. Pa kutamfya icibwa kabomfeshe imbale ya fya kulya iyo kasendele. Icibwa cena camwene kwati balecipeela ukuti cilye. Kabili caliliile!”

Pa 23 March, 1991, inkondo balelwa mu Liberia yalifikile na mu Sierra Leone, kabili abana calo balwile pa myaka 11. Ibumba lya bacipondoka ilyo baleita ukuti ba Revolutionary United Front (RUF) balitebeleele Kailanhun na Koindu mu nshita fye inono, kabili abekala mushi abengi bafulumikiile ku Guinea. Pa bafulumwike pali na bamunyinefwe na bankashi nalimo 120. Kwali ba Nte na bambi abengi imbutushi, abafulumukiile mu Sierra Leone ukufuma ku Liberia ilyo bacipondoka bashilafika.

Ba Billie Cowan, abali ba kampanya ba Komiti ya Musambo batile: “Pa myeshi iingi, ababwananyina abaleisa ku Freetown Bethel balemoneka fye ukuti bali ne nsala, imibili yalemoneka iyanaka, kabili balyondele sana. Abengi baliculile sana ku nsala kabili balelya fye ifinsabwansabwa fya mu mpanga. Twalebapeela ifya kulya ne fya kufwala pamo na balupwa babo na balesambilila fye icine abaishile pamo nabo. Ababwananyina bali ne cikuuku kuli bamunyinefwe imbutushi kabili balibasungile na mu mayanda yabo. Bamunyinefwe abafumine ku Liberia tabaikete na ku cani, baleyafwilisha aba mu filonganino ifyo balimo kabili balicincile sana mu kushimikila. Mu kupita kwa nshita, abengi balibwelelemo; lelo ilyo bashilabwelelamo baletukoselesha nga nshi!”

Balekoseleshanya no Kusansamushanya

Aba kwi ofeshi lya musambo balitumiine ba Nte ifya kulya, umuti, ifya kukuulila, ifisolobelo, ne fintu fimbi ifya kubomfya mu nkambi umo baleikala ishali ku kapinda ka ku kulyo aka Guinea. Pali ifi pali ne fya kufwala ifingi ifyo bamunyinefwe ku France basangwile. Munyinefwe umo atile: “Abana bandi balitemenwe sana ica kuti balecinda, baleimba no kulumbanya Yehova. Pantu nomba balikwete ifya kufwala ifipya ifya kufwala mu kulongana!” Bamunyinefwe na bankashi bamo batile tabatalile abafwalapo ifya kufwala ifisuma nga filya bapokelele!

Kwali ubwafwilisho na bumbi ubo bamunyinefwe balekabila. Yesu atile: “Te ku fya kulya fyeka umuntu ekalila no mweo, lelo na ku mashiwi yonse ayafuma mu kanwa ka kwa Yehova.” (Mateo 4:4) E ico, aba ku musambo balitumine impapulo kabili bapekenye no kuti kuleba ukulongana kukalamba na mabungano. Bapainiya na bakangalila benda nabo balibatumine kuli iyi ncende.

Ilyo kangalila wa muputule, Munyinefwe André Baart aile ku Koundou, ku Guinea, akumenye umulashi wa mu nkambi uwamulombele ukuti alandeko ilyashi ku mbutushi. Abantu nalimo 50 e bakutike kuli ili lyashi ilyafumine pa Amalumbo 18, ilyaleti “Muleuba muli Yehova.” Ilyo ba André bapwishishe ukulanda, nakulubantu umo aliminine no kulanda ati: “Ala mwatusansamusha, Umupunga te kuti upwishe amafya, lelo Baibolo yatulanga ifyo twingaba ne subilo muli Lesa. Twatootela nga nshi pa kutusansamusha no kutupeela isubilo.”

Ilyo bamishonari ba William na ba Claudia Slaughter babatumine ku Guékédou, mu Guinea, icilonganino umwali imbutushi ukucila pali 100 balicincile mu kubombela Yehova. (Rom. 12:11) Ba William batile: “Abalumendo abengi balefwaisha ukubomba imilimo mu cilonganino. Nga ca kuti uwa kulanda ilyashi mu Isukulu lya Butumikishi Ilya Bulesa teshile, abalumendo 10 nelyo 15 baleipeelesha ukulanda. Kwali amabumba ayakulu aya batemenwe sana ukushimikila. Pa numa, bamo pali balya balumendo abacincila baishileba bapainiya baibela e lyo bambi bakangalila benda.”

Balekuula na Lintu Kwali Ifimfulunganya

Ilyo fye inkondo yatendeke, bamunyinefwe balishitile impanga iyali amahekita 6 iyabelele pa 133 Wilkinson Road apali amamita ya kupenda fye ukufuma ukwali iofeshi lya musambo. Ba Alfred Gunn batile, “Twalefwaya ukukuula Bethel iipya pali iyi ncende lelo inkondo yalitusakamike. Apo Munyinefwe Lloyd Barry, uwali mwi Bumba Litungulula alitutandaliile, twalimulondolwelele ubwafya twakwete. Atwebele ati, ‘Nga tatukuulile pa mulandu wa nkondo, tapali ico tukacita!’ Amashiwi ya kukoselesha ayo atwebele yalengele tutendeke ukukuula.”

Kwali bamunyinefwe abengi ababombeshe pa bukuule, ukubikako na babomfi bakuitemenwa 50 abafumine ku fyalo ifyalekanalekana 12 e lyo kwali na bambi abengi abafumine mu filonganino abaipeeleshe ukubomba. Umulimo wa kukuula watendeke mu May 1991. Ba Tom Ball abaleangalila umulimo wa bukuule batile: “Abapita nshila balepapa sana pa kumona ifikuulwa ifisuma ifyo twakuulile pali iyi ncende. Inshila baimikilemo inshimbi yalipusene sana ne fyo abengi bakuula ifikuulwa fyabo kuli iyi ncende. Nomba ico abantu bapapile sana, kumona uko ababuuta na bafiita balebombela pamo ne nsansa.”

Pa 19 April, 1997, abantu abengi abafumine ku fyalo fyalekanalekana balilongene ilyo kwali ukupeela ifikuulwa ifipya ifya pa musambo. Pa numa fye ya mweshi umo ukutula apo bapwishishe ukukuula, ninshi palipita ne myaka isano ukutula apo ba RUF bacushishepo abantu mu mishi, balisanshile umusumba wa Freetown.

Inkondo mu Freetown

Ifipondo ifingi sana ifya mu kabungwe ka RUF ifyali ne mishishi iya sakalala kabili ifyafwele imipango iyakashika fyalisanshile umusumba, fyalibile ifipe, fyalilele na banakashi ku maka, kabili fyalipayaulwile abantu. Ba Alfred Gunn batile, “Ala mu musumba tamwaweme. Bamishonari abengi balibabweseshemo ku mwabo. Fwe bashalikishe ukuya nine no mwina mwandi, na ba Sandra Cowan, ba Jimmie na ba Joyce Holland.

“Twalipepele pamo na babomfi abaipeeleshe ukushalikisha ukuya, lyena twalyangufyenye ukuya ku cifulo uko twalelongana ilyo tushilabutuka. Mu nshila abashilika 20 abakali sana kabili abakolelwe balitwimike. Ilyo twabapeele magazini ne ndalama, balitulekele. Bonse pamo fwe babutwike twali 1,000 twailelongana pa cifulo cimo ica cingililwe na bashilika ba ku America. Uku e ko twaninine indeke ya bashilika iya tutwele ku kuya nina ingalaba ya ku America. Umubomfi wa mu ngalaba atwebele ati ibumba lyesu e lyakulishepo pali yonse ayo ubuteko bwa ku America bwayafwile ukufuma muli ici calo ukutula apo kwabelele inkondo ya ku Vietnam. Ubushiku bwakonkelepo, twaninine indeke ukuya ku Conakry mu Guinea, kulya e ko twailekuula umusambo uwa kubombelapo pa nshita inono.”

Bamishonari balefwaisha ukumfwa ifyebo ukufuma ku Freetown. Kwasukile kwaisa kalata iyatile: “Nangu ca kuti kwaliba ifimfulunganya, tucili tulesabankanya trakiti wa mbila ya Bufumu Na. 35 iya kuti ‘Bushe Abantu Bonse Bakatala Abatemwana?’ Abantu balekutika sana kabili ne fipondo fimo filesambilila Baibolo. E co tupingwilepo ukuti tulingile ukulashimikila sana.”

Ba Jonathan Mbomah, abaali bakangalila ba muputule batile: “Twalikwete no kulongana kwaibela mu Freetown. Amalyashi yaliweme sana ica kuti naile na ku Bo na ku Kenema ku kutungulula ukulongana. Bamunyinefwe muli ishi incende umwali sana inkondo, balitashishe sana Yehova pa fyo abatangete lwa ku mupashi.

“Mu kupwa kwa 1997, twalikwete ukulongana kwa citungu mu cibansa cikalamba ica mu Freetown. Pa bushiku bwa kulekeleshako ubwa kulongana, ifipondo fyaishiletupikimisha ukufuma mu cibansa. Twalipaapeete ukuti batuleke tupwishe ukulongana. Pa numa ya kulanshanya nabo sana, balisukile basumina no kubwelela, babwelelamo. Abantu ukucila pali 1,000 balisangilwe ku kulongana kwa citungu kabili abantu 27 balibatishiwe. Bamunyinefwe abengi balyendele inyendo ishayafya ukuya ku Bo ku kuya kutika ku malyashi na kabili. Ala kulya kulongana kwaliweme nga nshi!”