Ilyashi lya Kale Ilyo Mwingatemwa Ukwishiba pa Nte sha kwa Yehova

Mu October, 2012 Inte sha kwa Yehova ku Brooklyn, mu New York, balitendeke ukulangisha ifikope pa lyashi lya kale ilya Nte sha kwa Yehova. Muli ubu bulangisho, balangisha ifyo ba Nte balecula na mafya balekwata ilyo balecita ifyo Yesu alesambilisha.

Mu mulungu wa kubalilapo fye, abantu ukucila pali 4,200 pamo na ba mu lupwa lwa pa Bethel baliile muli ici cikuulwa ku kumona no kubelenga pa fyacitika kale. Ba Naomi, Inte ya kwa Yehova, abekala mupepi na maofeshi baliile mu kutamba ifikope ilyo fye ubulangisho bwatendeke. Batile: “Ifyo batantika bwino ifyacitike kale, fyalingafwile ukwishiba ilyo ifi fintu fyacitike, ne calengele ukuti ficitike. Nalisambilile ifintu ifingi sana pa kuteyanya kwesu na pa lyashi lya Nte ilya muno nshiku.”

Ubulangisho butampila ne fyalecitika kale ku Bena Kristu abaliko muli ba 33 C.E. mpaka na lelo, kabili babwakanya mu fipande fine. Cila cipande citampila na mashiwi ayaba mwi lembo e lyo pakonka na ka vidio akepi aka mu ciNgeleshi. Ka vidio kalikwata na mashiwi ayo bapilibula mu fitundu 7 ayo mwingabelenga ilyo muletamba.

Icipande ca kubalilapo citila, “Abantu batemwa imfifi.” Uyu mutwe wafuma pa mashiwi ayo Yesu alandile pali Yohane 3:19. Baibolo yasobele ukuti pa numa ya mfwa ya batumwa, abantu babipa ‘bakema no kulasambilisha ifyanyongana.’ (Imil. 20:30) Bonse abalekaana ukukonka ifi fisambilisho balebakanda icabipisha.

Icipande cakonkapo cakwata umutwe uwapusana sana ne cipande ca kubalilapo. Citila, “Ulubuuto lusanike,” ukufuma pali 2 Abena Korinti 4:6. Muli ici cipande mwaba ifyacitike ukutendekela mu kupwa kwa ba 1800 ilyo Abasambi ba Baibolo batampile ukusambilila Amalembo. Balikeene ukukonka ifisumino ifyo abantu basuminemo pa myaka iingi ifishili fya mu Baibolo kabili bali abashipa pa kushimikila icine. Muli ici cipande e mo balanda pa kulunduluka kwaliko mu kwishiba icine no bwingi bwa bantu abalesambilila icine ilyo Inkondo ya Kubalilapo iya Calo Conse ishilatendeka.

Mu muputule wakonkapo e mwaba icintu cimo ico ba Nte bacitile ico batemwa sana ukushinta na lelo. Mu 1914 Abasambi ba Baibolo (nga fintu Inte sha kwa Yehova balebeta kale) batendeke ukutambisha ubunkolanya ubo baleita abati “Photo-Drama of Creation.” Abantu abengi nga nshi balitambile ubu ubunkolanya umwali ifikope ne ciunda. Mu fyo batambisha mwaba ne fikope fya kubalilapo ifyo balengele, amashiwi ya ntendekelo na masilaidi ukucila pali 500.

Icipande ca butatu cilanda sana pa bulondoloshi bwaba pa Ukusokolola 12:7 apo tubelenga pa fyo Satana acushishe abasambi ba kwa Kristu. Citila, “Icingw’ena calikalipe.” Muli ici cipande e mo balanda sana pa fyo Abena Kristu bakeene ukuitumpa mu fikansa fya calo ilyo kwali inkondo. Ukubomfya ifikope na fimbi ifyo bapanga fye, balibikamo utumavidio utulanga ifyo aba buteko balepatikisha abakeene ukulwako mu nkondo pa mulandu ne fyo basuminemo pamo nga Munyinefwe Remigio Cuminetti umwina Italy, uwakeene ukufwala yuniformu ya bashilika nangu ukulwako mu Nkondo ya Kubalilapo iya Calo Conse. Muli ka vidio kambi balangamo Munyinefwe Alois Moser uwa ku Austria. Alikeene ukulanda amashiwi ya kuti “Heil Hitler” (Ipusukilo lifuma kuli Hitler), e calengele ukuti bamutamfye incito no kumutuma ku nkambi uko balesungila abafungwa iya Dachau concentration camp. Balipanga na kacifungo umwaba ulubuuto ulunono sana ku kulanga ififungo umo Inte sha kwa Yehova balebabika pa mulandu wa fyo basuminemo mu fyalo pamo nga ku Greece, ku Japan, ku Poland, ku calo baleita kale abati Yugoslavia e lyo na mu fyalo fimbi.

Umutwe wa cipande ca kulekelesha wafuma pa Ukusokolola 14:6 apo Baibolo yalondolola umulimo uo Inte sha kwa Yehova baabomba mu myaka ya ku numa. Uyu mutwe utila, “Imbila Nsuma ku Nko Shonse.” Ifikope ifyo bakakatika ku fibumba e filangilila ifyo ba Nte balundulwike bwangu, ifyo bashimikila ukwabula ukuleka e lyo ne fyo batemwana. Na mu kulekelesha muli ici cipande mwaliba na makompyuta aya kutinikapo fye ayo babika ku fibumba. Abatandashi kuti bayabomfya ku kwishibilapo na fimbi pa cikuulwa ico baleita ukuti Bible House (e fyo baleita Bethel kale) e lyo na pa maofeshi no mwa kulonganina ayo baleita abati Brooklyn Tabernacle. Ifi fikuulwa e fyo ba Nte balebomfya imyaka 100 iyapitapo.

Ing’anda iyo balangishamo ifyalecitika kale yabela pa 25 Columbia Heights ku Brooklyn, mu New York. Ukutandala kubako ukufuma pali Cimo ukufika pali Cisano ne nshita ya 8:00 hrs ukufika 17:00 hrs pa nshiku shonse kabili takuba kulipilisha. Nga mwikala mu musumba wa New York, tulemwita ukwisatandala pa kuti mukeshibe ifyalecitika kale.