Inshila Isho Balebomfya Pa Kubila Imbila Nsuma

Ukubomfya Umulabasa

MU 1933, aba bwananyina balipekenye ukuti balebalishishako amalyashi ya mu ciNgeleshi pa mulabasa uwali mu Jakarta ayo munyina Rutherford alandile. Kabili umwaume umo uwalesambilila Baibolo alebelenga amalyashi ya Baibolo pa mulabasa ayo balembele mu ciDutch. Abantu abengi baletemwa ukukutika kuli aya malyashi ica kuti ilyo bakasabankanya baleya mu mulimo wa mwi bala, balepeela abantu impapulo ishingi.

Ilyo balishishe ilyashi lya ba Rutherford ilyaleti: “Ukwambukila kwa Mwaka wa Mushilo pa Mutende no Lubanda,” bashimapepo ba ku Katolika balifulilwe sana.a Balyebele ababomfi babo ukupeela munyinefwe De Schumaker uwatwele ili lyashi ku mulabasa imilandu ya “kuba uwa lwambo, ukubapumya, no kubapata.” Munyina De Schumaker alyeseshe na maka ukuipokolola lelo balimupingwile ukuti ali no kulipila indalama ama guilders 25b no kulipila icilye. Uyu umulandu baliusabankenye mu nyunshipepala shibili kabili ici calengele ukuti abantu abengi beshibe Inte sha kwa Yehova.

Ukubomfya Ubwato

Pa 15 July 1935, ubwato ubo Watch Tower Society yashitile ubwalepele amamita 16 ubo baleita ukuti Lightbearer, bwalifikile ku Jakarta pa numa ya kwenda imyeshi 6 ukufuma ku musumba wa Sydney, ku Australia. Muli ubu bwato mwali bamunyinefwe bapainiya 7 abaipeeleshe ukubila imbila nsuma mu Indonesia, mu Singapore, na mu Malaysia.

Ukucila pa myaka ibili, bapainiya abaleendela muli ubu bwato bwaleya ku fyabu ifikalamba ne finono mu calo ca Indonesia conse no kutwala impapulo ishilanda pali Baibolo ishingi nga nshi. Ba Jean Deschamp batile, “Lyonse ubwato nga bwafika pa cabu icinono, bamunyinefwe baleyasha mashini iyo balelishapo amalyashi ayo munyinefwe J. F. Rutherford uwali presidenti wa Watch Tower Society alandile. Elenganyeni ifyo abena Malay baleumfwa nga bamona ubwato ubukalamba bwafika pa cabu no kukutika ku ciunda icikalamba. Ala, takwali nangu cimo icalepapusha abantu ukucila pali ici!”

Bashimapepo ba macalici balikalipe sana ukumona ifyo bamunyinefwe baali abashipa lintu balebila imbila nsuma kabili balitunkile aba mu buteko ukulesha ubwato bwa Lightbearer ukulaya ku fyabu ifingi mu Indonesia. Mu December mu 1937, ilyo balebwekeshamo ubwato bwa Lightbearer ku Australia, ninshi bamunyinefwe balibila sana imbila nsuma mu Indonesia.