Ukulongana kwa Citungu Ukushakalabwe

UKUFUMA pa 15 ukufika pa 18 August mu 1963, bakasabankanya abengi nga nshi abafumine mu ncende shonse mu Indonesia na bantu 122 abafumine ku fyalo fimbi, balilongene mu musumba wa Bandung, ku West Java. Baishile ku Kulongana kwa Fyalo Ifingi ukwa kubalilapo mu Indonesia ukwakwete umutwe uwaleti “Everlasting Good News” (Imbila Nsuma ya Muyayaya).

Pa kupekanya uku kulongana, aba bwananyina balikwete amafya ayengi sana. Aba bwananyina balyalwile ukwa kulonganina pa miku itatu pa mulandu wa kuti kwali ukusefya ubushiku icalo ca Indonesia capokele Ubuntungwa. Ilyo imitengo ya fintu yaninine, aba mu buteko balilundile sana imitengo ya kulipila ku motoka, ne ci calengele aba bwananyina bamo abaleya kuli uku kulongana balule imyendele. Munyinefwe umo aendele inshiku 6 pa kufika ukwa kulonganina. Na kabili, aba bwananyina 70 abafumine ku Sulawesi nabo baendele inshiku 5 mu mato umo baletitikana sana.

Ilyo bali pa kulongana, aba bwananyina mu Indonesia balitemenwe nga nshi ukumonana na Bena Kristu banabo aba ku fyalo fimbi, ukubikako fye na bamunyinefwe babili aba mwi Bumba Litungulula, ba Frederick Franz na ba Grant Suiter. Munyinefwe umo atile: “Aba bwananyina nabasansamuka nga nshi kabili balemwentula fye.”

Abalongene balicilile pali 750 kabili ababatishiwe bali 34. Ba Ronald Jacka batile, “Uku kulongana kwa lulumbi kwalengele abantu abengi abalesambilila Baibolo batwalilile mu cine. Kabili kwalengele balebombesha mu mulimo wa kwa Lesa.”