Rosai Nari Yafrur Rofyor Sifarfnak ma Sikyarenker Aya ro Rumfarkor?

IḆYE KADA ROSAI FANDUN FA WAFRUR YA?

Kwarapan fawar ine: Tomas imewer ryaḇe rumfarkor ro ras ine, meser, ḇaido ryaḇe rumfarkor ḇaḇeri. Ine ḇyejadi ro paik rikyor aniwara rofyor bati ro rumfarkor ḇyesya sfawar roi ḇeḇyeḇa kuker i. Ramnai sḇuk snonsnon fa sḇukidap i. Fyorno ido bati oso imerpum Tomas syap ḇyedi fa nasapi ro bramin ḇyeja ḇape ifrur imnis rya fyawi ḇa. Snonkaku osower ro si pyampumi, ma rofyor pyambar ifawi mansei ḇefrurya ḇa. Mandowinja, roma ḇefarfnak i sya sifrur roi ḇeḇyeḇa syadi kaku faro Tomas i isoine sfarem anun ḇe i ro internet snar nari sifrur susa i . . .

Au iso Tomas ido, rosai nari wafrur ya?

WAMNAI MA KWARA!

Nwa nyan kaker fa wafrur roi oso! Mboi, bisa fa pampum ḇefarfnak Ausya kuker mamunmun ḇa. Nyan ya rariso?

• ḆEFASIS MONDA. Refoya doḇe, ”Snonkaku ḇefawi royoḇa isasyar rur ḇyena kam, imbape snonkaku ḇefawinanem fyaduruna fa naknon pdef isof ro pupes.” (Amsal 29:11) Rofyor fasnai ḇefasis monda ido, nari ḇefarfnak Ausya sifarfnak Au ḇa.

• WAMUNSU AWER. Refoya doḇe, ”Rofyor ono sifrur sasar faro naek srar mkoido, mkomunsu awer na kuker ḇarḇor.” (Roma 12:17) Kosewar fa komunsu si wer nari nafrur fa fafisu ya naḇyeḇa syadiwer.

• SWEWAR AWER PARKARA. Refoya doḇe, ”Snonkaku ḇefawinanem ḇemam roi ḇeyun marmar iyokef mankundi.” (Amsal 22:3) Koḇinkwanbur snonkaku ḇesewar parkara sya, ma koḇinkwan ro fafisu nari ḇefrur fa sifarfnak ko.

• FASOS RO ḆARPON KANKAREM BEDI. Refoya doḇe, ”Kankarem ḇemyaren nari nafrur fa ḇinkwan ro masasor ya.” (Amsal 15:1) Imbude wafrur kamambrif. Imnis raris, rofyor snonkaku ḇefarfnak sya soḇe ḇebaken ido, kwanow erdai Bedi ḇo wakofen, ”Iryanido na yafrur fa baken yedi nado kilo ri ḇeḇeso wer!”

• WABUR RO MOḆ YA. Nela ḇyeumur taun ri 19 doḇe, ”Ḇefasis ima nfasnaḇair snar waba kwar ma wasambraḇ bur ro snonkaku ḇefarfnak ausya. Nane nfasnai farmku mankundaw. Snonkaku ḇefarfnak ausya sima simnis au ḇa ro roi ine.”​—2 Timotius 2:24.

• SWEWAR KAKU FA FARMKU MANKUNDAW. Ḇefarfnak sya sifawi mansei ḇekyar faro mankundi ḇa, ma mansei ḇesambraḇ sya. Osower ido, snonkaku ḇefarfnak bebor sya nari sisusu rofyor smam rosai sifrur ḇe Au nun bon oḇa.

• WAFAR ḆE SNONKAKU OSO. Guru oso ro fafisu iwara doḇe, ”Yadif roma inai ḇesmai farfnak sya fa sikofenḇair mansei ḇefarfnak si. Ine ipyum kaku fa sifrurna, ma ine nari nadwar’k snonkaku oso fa sifarfnak i ḇa.”