Sifrur Asas faro Yahwe I

Swaf paik risuru fafisu kawasa Israel sisasyarbur sup Masir raposa, sifafyer ro Bon Sinai ma sḇawes rum kruḇen ro diwa. Yahwe iwan Moses i fa dek ḇe bon ani ma ikofen yoḇ i, ’Yaḇuk fasaspar faro snonkaku Israel sya kwar. Srower Aya ma sisouser sasoser Ayena ido, nari sḇe kawasa mankundi Yesi.’ Mura, Moses dado kaḇer ḇe kawasa Israel ansi ma ikofen yoḇ si raris moḇ Yahwe ikofen raya. Srower na kwar mura, skarem ḇo soḇe, ’Nkomarisen nkofrur raris rosai Yahwe dor nakam.’

Raposa, Moses dek kaḇer wer ḇe bon ani. Ro diwa Yahwe ikofen, ’Ro ras rikyor wer, nari yawos yoḇ mko. Wakofenḇair ḇe snonkaku Israel sya fa sipok sek awer ḇe Bon Sinai ine.’ Moses dado ḇeri ma ikofenḇair ḇe snonkaku Israel insa sfasos si fa srower rosai nari Yahwe ikofen na.

Ras rikyor mura, snonkaku Israel smam arḇeḇer nasak ma mandep ḇepampan ro bon anya. Srower kako karadu ḇerok naba ma rakrok kḇur. Mura, Yahwe dado mumfes ḇe bon ani roro for ya. Snonkaku Israel sradadai kukro simkak kaku. Bon anya imer sambraḇ kaku ma paw ya ikawef na. Rakrok kḇur anya ndrok naba syadi wer. Ramnai, Allah ikofen ḇo doḇe, ’Aya iso Yahwe. Mkopok mkosyom awer allah ḇesesya.’

Moses dek ḇe bon ani wer, ma Yahwe ḇyuk sasoser faro snonkaku Israel sya. Sasoser anna nakofenḇair moḇsa sisyom faro I rai ma rosai fandun fa sifrur na. Moses fyas sasoser anna ma iwasya na faro snonkaku Israel ansi. Sḇeasas ḇeri, ’Nkomarisen nkofrur raris rosai Yahwe dor nakam.’ Inja, nari sifrur imnis rosai sikofen kwar na ke?