Ayar Karui Yerusalem

Ro Ezra fafisu ḇyedi, snonkaku Israel oso ḇenir ḇe Nehemia ḇyarek ro Syusyan ḇero Persia. Ḇye manfamyan faro Raja Artahsasta. Nehemia naek ḇyedi ryama ro Yehuda ma ikofenḇair anun ḇepyumḇa ine: ’Snonkaku ḇero Yerusalem sya sikenem mnis ḇa. Ayar karui ma kedwa ḇeba ro mnu snonkaku Babilon skakok kwar anna, sḇawes kaḇer na ḇaime.’ Nehemia ḇyesneso kaku. Imarisen ryaḇe Yerusalem fa ifnoḇek si, inja ḇyenadi insama Raja ḇye i fa rya ḇe diwa.

Ras oso, Raja myam mboi Nehemia rya ḇyesneso kero. Ikofen, ’Yamam wakḇeradine ro ras oso ḇaim. Roi isya ke?’ Nehemia kyarem, ’Yaḇesneso snar mnu yedi, Yerusalem, ḇyeḇekarḇaken kaker.’ Raja ifuken, ’Rosai wamarisen fa yafrur ḇe aundi?’ Nehemia ḇyenadi ro sneri. Ramnai ikofen, ’Yor insa ḇe aya fa yaraḇe Yerusalem fa yaḇawes ayar karui ḇyedi.’ Raja Artahsasta ḇye Nehemia fa rya ma myam kaku insama ifrur marandan kuker payamyum. Ḇye Nehemia kako ḇe gubernur Yehuda ma ḇyuk aimun fa ḇyukiḇawes kedwa ḇeba ḇero mnu ani.

Rofyor Nehemia ifyafer ro Yerusalem, myam user kaku ayar karui mnu ani. Mura, iwan imam ma manfarkin sya fa siryur. Ikofen, ’Ine imnis ḇaberi. Fandun fa koḇawes kaḇer na.’ Snonkaku ansi sna wos oser, mura sḇawes ayar karui Yerusalem.

Ḇape, ḇembroḇ snonkaku Israel sya skoryae si ḇo sikofen, ’Naf sup oso dek dofen ido, na ayar karui ani imufer ḇe sop.’ Snonkaku Israel sfandun ḇa ḇo siḇawes pdef. Ayar karui anna nakaki ma nako.

Ḇembroḇ sya sifrur aw sena fa smun Yerusalem ro ris nakam. Rofyor snonkaku Yahudi sifawi aw senane, simkak fafayaḇa. Ḇape Nehemia ikofen, ’Mkomkak awer. Yahwe isya ifnoḇek ko.’ Nehemia iwan ḇemamwarek sya fa sikadaunwarek ḇefararur sya, ma mbroḇ sya sipok smun si ḇa.

Sifrur ayar karui ma kedwa ḇeba mnu ani fa namnai ro ras ri 52 monda. Nehemia dor snonkaku Lewi syakam fa sra ḇe Yerusalem fa sifrur munara saḇseḇen ya. Irwas si ḇe raryur risuru fa sidisen. Ramnai, sek ḇe ayar karui anna ḇoya ma simbran ḇesisye ḇe ḇar risuru ma siyar mnu ani. Siyuf kbur, sifnak simbal, ma harpa, ma sidisen sisandik Yahwe. Ezra imbran fnoḇek raryur oso, ma Nehemia kuker raryur ḇese ya wer. Mura, sisrow si ro bait. Snonkaku syakam, snon ma bin, romawa sya kako sḇuk farsarser faro Yahwe ma siryab kaku. Mkaren sena ndrok maum isof ro moḇ ḇeḇinkwan.