Yesus Ifrur Mujisat Nabore

Yesus ryama ḇe supswan fa ikofenḇair Karajan Allah ḇe snonkaku sya. Yahwe ḇyuk rur ḇesren ḇe Yesus insama dakfrur mujisat. Yahwe imarisen fyasnai rosai na Yesus ifrur fafisu ḇye Raja kwar. Yesus bisa ḇyuk pararei faro snonkaku ḇesmai dafduf sairirya monda. Moḇ risai monda ryarona, snonkaku ḇeduf sya sisewar i ma ḇyuk pararei ḇe si. Snonkaku ḇepraf sya bisa smame, ḇepro sya srower, ḇemanis sya simbrane, ma snonkaku kam rur ibiris iswoḇer si siprei. Span monda ro sansun ḇyeja mboi siprei. Rya ḇe moḇ nakam snonkaku sya simarisen siso i. Ma ro fafisu imbe demiro, iwan snonkaku ḇefandun fafnoḇek ro i sya fa sibur ḇa.

Ro ras oso, snonkaku sun snon ḇemanis oso ḇe moḇ Yesus ryoi. Ḇape snonkaku sya sibor ro moḇ ani, inja jadi fa skosun ḇa. Mura ido, skek ḇe rum ya bori ma skoḇas os na, ramnai skokyu i kuker roi skokanow i ya. Yesus ikofen ḇe snon ani ḇo doḇe, ’Wores ma wambrane.’ Fafisu snonkaku sya smam snon ani dores ma imbrane, sikandor kaku.

Ramnai ro ras oso, Yesus ryaḇe mnu oso wer, ro diya isrow kuker snon ḇeduf pado risamfur. Skoḇinkwan ḇo skore, ’Yesus e, wafnoḇek inko!’ Ro fafisu ani, snonkaku ḇeduf pado sya na sfanam snonkaku ḇesesya ḇa. Inja, Yesus iwan skoḇe bait. Yahwe ḇyuk parenta faro snonkaku ḇeprei ro dafduf sena kwar ido, fandun fa sraḇe bait. Ro nyanya faduri, snon risamfur anskoine skoprei. Oser ro snon ansya ḇyaḇir kaku iprei kwar, inja kyaḇer ma ikofen kasumasa ḇe Yesus i ma isandik Allah. Ro snon risamfur ḇeprei ansya, snon ani monda ḇekaḇer fa ḇekofen kasumasa.

Bin oso imarisen kaku iprei ro dafduf ḇyedi snaro iduf taun 12 kwar. Fafisu ya, snonkaku sya sibor sfanam ḇe Yesus i. Inja ḇin ani dakfanam ḇe Yesus i ro kruri ma pyan ro sansun syatu Yesus ḇyena. Ro kiriya ḇeri iprei. Inja Yesus ifuken, ”Mansei ḇepan ro aya?” Bin ani imkak kaku, imboi fyanam Yesus i ma fyawar dafduf ḇyedi. Yesus ikofen ḇe i, ’Inai yedi wamkak awer. Waprei ro dafduf Beja kwar.’

Snon oso mananir ro rum ari ḇenir ḇe Yairus dor ḇe Yesus i, ’Rwama ḇe rum yedi! Inai mos yedi iduf marḇak kaku.’ Ḇape fyor Yesus ryaḇe rum ḇyeja ḇaim, inai mos ḇyani imar kwar. Fafisu Yesus rya ro rum ani kwar, myam snonkaku sibor skanes. Inja Yesus ikofen ḇe si, ’Mkokanes awer, romawa ine denef monda.’ Ramnai, Yesus duf inai ani ḇramin ḇyedi ma ikofen, ”Ne inai aune, yakofen faro au, wakḇoke!” Inai ani ikḇok ḇeri. Yesus iwan ḇe sinan ḇyesuya fa sufan i. Sinan ḇyesuine sumarisen kaku!