Faya ro Bon

Fyor kyinfir manwawan ri 12 ramnai, Yesus dado ro bon ḇe moḇ oso. Snonkaku ḇebor sya siwaf i ro diwa kwar. Srama ro Galilea, Yudea, Tirus, Sidon, Siria, ma ḇeḇarek ro ḇar Warḇeki Yordan. Sun snonkaku ḇeduf ma rur ḇeḇyeḇa ḇyeninyan sya ḇe Yesus i. Ḇyuk pararei ḇe sikame. Ramnai, kyain ro moḇ ḇepyom oso ma ḇyuk farkarkor ḇe si. Ikofenḇair kaku rosai fandun fa kofrur insama koḇebati kuker Yahwe I. Koswarepen, kokam kofandun farkankin ro Yahwe I ma kofarkor nabor syadi wer insama koswar I. Ḇape koswar snonkaku ḇesesya ḇa ido, ine fyasnai kaku koswar Yahwe I ḇa. Inja, fandun fa kofrur pyum ma komam farfir snonkaku sya ḇa, ine kako faro snonkaku ḇefrur pyum ko ḇa sya.

Yesus ikofen, ’Mkoswar monda bati mkoḇesya awer. Ḇape mkoswar kako snonkaku ḇefrur pyum mko ḇa sya, ma mkoḇuk maf kuker sne ḇesiper. Ono simsor mko ido, mkora mkosrow si ḇeri ma mkor maf yoḇ si. Mkofrur pyum snonkaku ḇesesya raris mkomarisen sakfrur pyum mko.’

Yesus ikofenḇair anun ḇepyum kuker arasai na. Doḇe, ’Koḇe bati kuker Yahwe ima fyandun syadi ro kona pipi fa sibor. Bisa skaraw pipi koḇesya, ḇape ḇaḇebati koḇena kuker Yahwe I ono na sun nabur ko ḇa. Mkokara ker awer rosai nari mkanan, mkinem, ḇaido roi mkosun na. Mkomam man sya kada. Skaker ḇa mboi Allah fyaduru si. Mkoswarepen, mkomkakwarek kankenem mkoḇena ker ido na mkokenem kawan ḇa. Mkoswarepen, Yahwe ifawi kaku rosai mkofandun na.’

Snonkaku ansya sikofen sakrower snonkaku ḇesesya sawos pyum raris Yesus i ḇaime. Manfarkin agama ḇefawi nanem Refo Yahudi, ma snonkaku Farisi, sakḇuk farkarkor ḇemnis radine ḇa. Rosai ḇefnai fa Yesus ima guru ḇefawi nanem syadi? Snaro roi fyarkor nakam ndrama ro Yahwe I.