Yesus Ikenem Kaḇer Kwar

Fafisu Yesus imar kwar, snon oso ḇenir ḇe Yusuf dor ḇe Pilatus insama dun Yesus i ro adir ani. Yusuf pyarkepen Yesus i kuker kruḇen ḇepyoper oso ma ryir rempah-rempah na, ramnai ryir i ro kubir ḇebabo oso. Idwarek kubir ani kuker karui ḇeba. Mananir imam-imam sikofen ḇe Pilatus i, ’Inkomkak warek Yesus manfamyan ḇyesi srama ma sun baken ḇyedi ma soḇo ikenem kaḇer.’ Inja Pilatus ikofen, ’Mkodwarek pyum kubir ani ma mkowan snonkaku ono fa smamwarek i.’

Ras rikyor raposa, bin riḇeḇeso skora ḇe kubir ani ro arwo prim kaku. Fafisu skora ro diwa skomam karui ḇedwarek kubir ani sikris i kwar. Skomam mundum ro kubir ani, malaikat oso isya ma ikofen ḇe si, ’Mkomkak awer. Yesus ikenem kwar. Mkora mkokofen ḇe manfamyan ḇyesi insama sisrow i ro Galilea.’

Ḇape, Maria Magdalena isrow kuker Petrus ma Yohanes su kwar. Ikofen ḇo doḇo, ’Snonkaku ono sun Yesus baken ḇyedi kwar!’ Inja Petrus ma Yohanes sufrar ḇe kubir ani. Fafisu sura ro diwa kubir ani ḇyebei, mura sukaḇer ḇe rum skoḇedi.

Fyor Maria kyaḇer ḇe kubir ani, myam Malaikat risuru suisya ro kubir ani. Inja ikofen ḇe su, ’Yafawi mnis Tuan yedi suni ra ya ḇa.’ Ramnai, myam snon oso. Kyara snon ani ḇefararur ro yaf riri. Maria ikofen, ’Wakofenḇadir pyan ḇe aya moḇsa Tuan yedi suni rai.’ Ḇape, snon ani ikofen, ”Maria!” ro diya ifawi Yesus iri. Maria dore, ”Guru!” ma fyori ḇeri. Yesus doḇe, ’Rwa wakofenḇair ḇe manfamyan yesi snaro mam aya kwar.’ Maria ryamura ḇeri fa isrow kuker manfamyan Yesus ḇyansi ma ikofen ḇe si isrow Yesus i kwar.

Ro ras anya kako, manfamyan risuru sura ro Yerusalem ḇe mnu Emaus. Ro dia snon oso fyanam su ma ifuken rosai suyawos na. Sukofen, ’Inja wakrower ḇaim? Ro ras rikyor aniwara mananir imam-imam sya smun Yesus i. Ḇape bin riḇeḇeso sikofen ḇo soḇe ikenem kaḇer!’ Snon ani ikofen, ’Nabi sya sikofen Kristus nari imar ma ikenem kaḇer. Mukyar faro rosai nabi sya sikofen ya ke?’ Ramnai, fyarkor Syap Ḇesren ya ḇe su. Fyor skora ro Emaus kwar, suyor i fa iso su. Fyor inadi fa skonan ro roḇ anya, insape sufawi ḇeri ima Yesus irya. Fafisu ya Yesus ipromesbur su.

Manfamyan ansuine sura ḇeri ḇe Yerusalem. Sukofenḇair ḇe manfamyan ḇeryur ro rum oso kuker rosai ḇeḇejadi ya. Ro dia Yesus fyasnai mankundi ḇe si. Randak ya, sikyar ima Yesus isya ḇa. Inja Yesus ikofen, ’Mkomam ḇramin yedine. Mkopan aya. Mnuk oso ikofen Kristus nari ikenem wer.’