Yamarisen Yakenem faro Manggundaya

FAWAR YEDI FYOR IWARA:

Fyor yaḇe kapirare, yaḇarekus sinan ayesu ro Leipzig, Jerman Timur, ḇinggwan ḇa ro perbatasan Cheska ma Polandia. Fyor yaḇeumur taun ri wonem, kamam dun nggo fa nggora nggoḇarek ro sup bondi kukro fyararur ro diwa. Ḇepon ya nggora ḇe sup Brasil, mura nggora wer ḇe Ekuador.

Ro fafisu yaḇeumur taun ri 14, sun aya fa yafarkor ro sup Jerman ro rumfarkor ḇena asrama. Sinan yesuma suḇarek ḇinggwan kaku ro Amerika Serikat, inja rosai yafandun nakam manggundaya yafasos na. Nane nafrur aya fa yafandun snonggaku ḇesesya ḇa ma yafrur roi yamarisen na.

Fafisu yaḇeumur taun ri 17, sinan ayesu subur kaḇer ḇe sup Jerman. Randak ya, yaḇarekus su. Ḇape, yamewer sufasos roi yafrur na. Iso eḇedari samswen kaku fa nggoḇarek kayamyam. Fyor yaḇeumur taun ri 18, yasasyar yabur rum nggoḇena.

Yaḇoryae kaku bo yasewar marmar fa yafawi kankenem ine moḇsa ḇyerai. Fyor yamam raryur riḇeso ma snonggaku sya kenem sena, yakara ipyum syadi iso yabuk kenem yedi fa yambran farma ro planet ḇepyum ine fafisu sifrur na fa namkok ḇaime.

Yabur sup Jerman, yakowes motor, mura yafrar ḇe sup Afrika. Ḇape, fandun fa yabur ḇe sup Eropa fa yafrur oto yeja fa imnis kaḇer. Fyoro ḇa mura, yaḇarek ro swan andir ro Portugal. Inja yek motor wer ḇa mboi yek wai.

Yaksun ro raryur roma babo ḇefrur aw fa sayun bo siyar Soren Atlantik kuker wai ayun. Ro moḇ ine iso yasrow randak bin nari ḇarpur mura yafarḇuk kuker i, snori Laurie. Randak ya, nggoso wai ayun ine fa nggora ḇe myos ḇebor ro sup Karibia. Mura, nggosun wer ro Puerto Riko, raimnai nggokaḇer wer ḇe sup Eropa. Nggosewar kapal oso fa nggofrur i ḇe moḇ fa nggoḇarek ro na. Ḇape paik ri kyor nggosewar mura, fararur nggofrur ine imnai. Sor aya fa yaso wajib militer ro sup Jerman.

Swaf paik ri 15 yaḇe tugas ro angkatan laut Jerman. Ro fafisu ani, Laurie nuna aw kwar fa nufarḇuk ma nuyar supswan ine wer. Yasun ro wajib militer ine fyoro ḇa mura, nggokowes robebor ro kapal penyelamat. Rofyor yaḇe tugas anya, nggofrur fawas na ḇe wai ayun. Roi imbe nggofrur ya iso, nggofadwer kapal ani ḇe wai bisa nggoḇarek ro na ma nggoyar supswan ine. Rofyor dinas militer yeja posa kwar, wai ani imnai ḇaime. Mura, Saksi-Saksi Yahwe srama yoḇ inggo ma nggofarkor Refo ya.

REFO YA FYADWER KENEM YEJA:

Randak ya, yakara fandun fa yafadwer kenem yeja. Yafarḇuk kuker bin ani mura, yamnai yasyor tabaku. (Efesus 5:5) Yakara fa nggobuk kenem nggobena fa nggoyar supswan ine, insama nggomam Manseren Allah fararur Ḇyena ima roi ḇefandun kaku diri.

Ḇape ḇekaku ya, fandun fa yafadwer kenem yeja, ḇefandun syadi iso yafadwer rari-rari ayena kukro ayama yararer aya ma yakara yafandun syadi manggundaya. Yamam monda faro roi bisa yafrur na ma yasmai na. Yakenem faro manggundaya monda.

Ras oso, yawasya Yesus Faya Ḇyeja ro Bon anya. (Matius, fasal 5-7) Ḇepon ya, yafawi mnis ḇa raryaḇ Yesus ikofen anya. Rupa ra, doḇe snonggaku ḇembrow ma ḇebiser sya na seaski. (Matius 5:6) Yakmom kaku bo yoḇe rariso snonggaku ḇeananjar sya seaski rai. Fyor yafarkor pdef, yafawi kokame fandun fa kofanam faro Manseren Allah. Ḇape, insama kofanam faro I, kofandun fafnoḇek ma kuker sne ḇerun kosewar na. Yesus doḇe, ”Aski faro snonggaku ḇefawi sima sfandun roḇean rur.”​​—Matius 5:3, Terjemahan Dunia Baru (NW)

Fyor nufarkor Refo mura, Laurie nura fa nuḇarek ro Prancis ma ḇarpur mura nura ḇe Italia. Nura ḇe moḇ sairirya kam, nusrow ker Saksi Yahwe sya. Yamanen kaku saswar sfasnai ḇe snonggaku ḇesesya ma ḇaḇeoser sena. Yamam Saksi Yahwe sima se mambekanaek ro supswan ine ḇesiper. (Yohanes 13:34, 35) Ḇarpur ya, aya ma Laurie nuḇebaptis ḇe Saksi Yahwe.

Nuḇebaptis raposa, yafadwer fawas rari-rari yena. Laurie nuyun snemuk fa nusiser yensiser Afrika, raimnai nuyayun Soren Atlantik ḇe Amerika Serikat. Ro soren ine iso, nuro kapal ya dori bo yaḇaḇir yasyus ḇa kaku ro ḇarpon Manseren Allah Ḇekaki Syadi ḇefrur konya. Snar nuna oras nabore (nufrur roi oḇa ḇeri ro soren fadu ya), inja yabuk swaf anya fa yakain yawasya Wos Refo ya. Yamarisen kaku fawar ḇekur Yesus kenem ḇyeja fafisu isya ryo supswan ine. Ima snonggaku ḇenapes kaku dirya ma nya samambraḇ ḇeba kaku, ḇesyabo dararer i ḇa. Ikenem faro manggundi ḇardi monda ḇa, ḇape ikenem faro Kmari ro nanggi.

Rofyor yakain yakara Yesus nyan ḇepyum fyasnai kwar na, yafawi kaku fandun fa yarir Allah marisen Ḇyena ḇe roi ḇefandun kaku ro kenem ayena bo yafakapon awer marisen ayena. (Matius 6:33) Rofyor nusabu ro Amerika Serikat, nuyun snemuk fa nuḇarek ro diwa ma numam epon samsyom nuḇena.

PAYAMYUM YASMAI NA:

Fyor iwara, yakyar kaku faro manggundaya, ḇape nano ido yamgak. Ḇape fafisu ine, yasrow fawawi ḇekaku ya kwar fa nfarkin kenem yeja. (Yesaya 48:17, 18) Kirine yafawi rosai imbe yafrur ro kenem yeja, inja yasyom Manseren Allah ma yafnoḇek snonggaku ḇesesya fa sakfarkor fa sakfawi I.

Snar yakenem raris ananun ro Refo ya, farḇakḇuk nuḇena nsambraḇ syadi. Nu kako nusmai inai mgun ḇedoser kaku, inai nubanine myambir ma iswar Yahwe I.

Ine kyurfasnai ḇa snar kenem nggoḇena nakain kuker aski pdef. Ḇape, snar fafnoḇek ro Yahwe I nggun snemuk kaku fa nggosusu ḇaḇeri ḇaido nggokyar pdef faro I.​—Amsal 3:​5, 6.