AWAWOS ḆEPON YA | MALAIKAT—SIMA SISYA KAKU KE? FANDUN FA WAFAWI SI

Fakfuken Kuker Malaikat Sya

Wamarisen fa wakfawi malaikat sya, sima manseisi, moḇsa sisya rai, ma rosai sifrurya ke? Imbe wafawi kankarem ḇyena ido, isya ro Allah Wos Ḇyena, Refo ya. (2 Timotius 3:16) Rosai Refo ikofen na?

Malaikat sima simnis raris Allah. Sikam mankun rur siri. Kopok komam si ḇa snar sima sna ’kraf ma kor ḇa’. Malaikat-malaikat ḇesoasuser sya sḇarek ro nanki ma sifarmyan fanam ḇe Allah.—Lukas 24:39; Matius 18:10; Yohanes 4:24.
Fyorno ido malaikat sya sifasnai si raris snonkaku fa sifrur fararur ḇeramuma ro Allah. Sifrur fararur sena raposa, sfadwer kaḇer si wer.—Hakim-Hakim 6:11-23; 13:15-20.
Refoya fyasnaiḇair ker malaikat sya sḇe snon, ma rofyor sifasnai si ḇe snonkaku ido sisnai ker ḇe snon. Mboi, ḇekakuya sima sakḇe malaikat snon ma bin ḇa. Sakfarḇuk ḇa ma sna romawa ḇa. Osower ido, malaikat sima srama ro supswan ine ḇa. Sḇe kapira ḇa, sḇe romawa ḇa, ḇaido sḇesinan ḇa ramnai simar ḇo sek ḇe nanki ḇe malaikat. Malaikat sima Yahwe iso ḇefrur si. Inja, Refoya dap si ḇe ”romawa-romawa ro Allah ḇenapes”.—Ayub 1:6; Mazmur 148:2, 5.
Refoya ikofenḇair snar wos ḇeḇor ro snonkaku ma wos ro malaikat sya, nasya kako. Ine fyasnaiḇair snar malaikat sya sakna wos ma sakawawose. Kakuḇae, Allah ḇyuk malaikat sya fa sawawos faro snonkaku sya, ḇape imewer kosyom si ḇaido koḇenadi roro si.—1 Korintus 13:1; Fasasna Faro Yohanes (Wahyu) 22:8, 9.
Malaikat sya sibor fa sesyaran-syaran, ma imbude seyuta ma yuta.a—Daniel 7:10; Fasasna 5:11.
Malaikat sya sna ”papoik beḇa kaku”. Sisambraḇ ma sifawinananem syadi ro snonkaku koine. Sima bisa sikren fasaw kaku ro moḇ oso ḇe moḇ ḇese, mboi snonkaku koinema kopok kakfrur roi ḇeradine ḇa.—Mazmur 103:20; Daniel 9:20-23.
Malaikat sima sisambraḇ ma sifawinananem kaku, mboi samambraḇ sena nasyadi ḇa, ma roi ono isya sakfawi na ḇa.—Matius 24:36; 1 Petrus 1:12.
Allah ifrur malaikat sya fa sna kenem ḇese-ḇese, iso rari-rari ḇemnis raris I, ma ḇyuk ḇaḇemkei fa skinfir ro mankunsi. Rupa ra snonkaku koine, malaikat sya bisa skinfir fa sifrur roi ḇekaku oroḇaido roi ḇesasar. Mboi faḇye kaku, malaikat sino sisya skinfir fa sembroḇ faro Allah.—Yudas 6.

a Wos Yunani ro Fasasna 5:11 fyasnaiḇair snar malaikat sya ’sesyaran samfur-risamfur’. Inja, malaikat sya sibor fafayaḇa, bisa seyuta utin ḇe utin ḇaido miliar ḇe miliar!

Raryur Ro Malaikat Ḇero Nanki

Ḇeḇeḇru ro malaikat, Mikhael, iso ḇe mananwir ro malaikat syakam snaro iso ḇesambraḇ kaku ma nya papoik. Refoya fyasnaibos kaku snar Mikhael ima snonsnon ḇese ro Yesus Kristus i.—1 Tesalonika 4:16; Yudas 9.

Serafim ima raryur ro malaikat ḇena kankain ḇekaki kako. Sima sismai syowi kaku ma sna fakamaman ḇeba, isoine sifarmyan fanam ro Allah ris Ḇyedi.—Yesaya 6:1-3.

Kerub ima raryur ro malaikat ḇena kankain ḇekaki kako ma sifrur fararur ḇefandun kaku isoine sifarmyan ḇeri faro Allah. Refoya dapḇair ker malaikat sya sisya ro Yahwe ḇarpon Ḇyedi.—Kejadian 3:24; Yehezkiel 9:3; 11:22.

Malaikat riyuta ḇesesya ḇesmai wawan sya sifarmyan faro Allah Ḇekaki Syadi kawasa Ḇyesi ḇefrur marisen Ḇyena.b—Ibrani 1:7, 14.

b Infa wafawi naborwer kuker malaikat sya, mam fasal ḇe 10 ro syap Rosai Refo Fyarkor Beko? Ma fasfas ḇepupes ro judul ”Mikhael Mananwir ro Malaikat Sya?” ḇeḇefrurya iso Saksi-Saksi Yahwe. Nasya kako ro www.jw.org/bhw.