Saneraro Kaḇakḇok—Isya snar Farsarser Fasaspar

Munara Swarapepen ḇyuk swaf ḇepyum ḇeko fa kowasen mura ḇe barakas ro fafisu naiwama naisya snaro farsarser fasaspar ya, imnis raris saneraro kaḇakḇok ya. Yahwe pok fa kyara ḇaḇeri fa snonkaku sya simar. Ine ḇefrur fa snonkaku sya na sefafardun kaku rofyor snonkaku siswar ya imar. (1Kor 15:26) Yesus ḇyesneso rofyor myam manfamyan ḇyesi sikanes rofyor Lazarus ryoe. (Yoh 11:33-35) Snar Yesus fyanir mnis kaku Kmari, inja na kokyar Yahwe I kako sne ḇyedi ḇyefafardun rofyor myam kokanes snar snonkaku koswar oso imar. (Yoh 14:7) Yahwe myander kaku fa ḇyuk aḇiḇer faro manfamyan ḇyesi ḇemar kwar sya, ma ko kako koḇaḇir rarirya.​—Ayub 14:14, 15.

Snaro Yahwe ima Allah ḇefanfnom ḇa, inja kokyar na aḇiḇer ya na ifrurna kuker nyan ḇemnis kaku. (1Kor 14:33, 40) Ro fafisu ya nari komam sikram snonkaku ḇemar werḇa, imboi fafisu fa kosaser ma kosrow wer kuker snonkaku ḇesma aḇiḇer sya. Na wawasen saneraro kaḇakḇok rofyor ḇefafardun snar snonkaku waswar ya imar ke? (2Kor 4:17, 18) Na wakofen kasumasa ḇe Yahwe I snar ḇyuk farsarser fasaspar ya ma ikofenḇadir kwar ro mnuk-mnuk ḇero Refo snar snonkaku ḇemar kwar sya na sikenem wer ke?​—Kol 3:15.

• Manseiso bati ma keret ro kina bedi ḇemar kwar sya na wamarisen fa wasrow wer kuker si ro fafisu naiwama?

• Manseiso snon ma bin ḇesouser sfas ro Refo wamarisen kaku fa wasrow ma fawar kuker si?